Den Bybel met groter neersticheyt ghecorrigeert (Liesveltbijbel 1542)

Hier wert verhaelt hoe dat Iudas houwede ende sijns soons wijf beslaept, Ende hoe si van hem twee sonen ontfanct ende baert.

Dat .xxxviij. Capittel

1

⁺IN dyen tijden ghebuerdet dat Iuda af reysde van sinen broederen, ende ginc by eenen man die Hira hiet, tot Odollam,

+ A vers 1

2

ende Iuda sach aldaer eens Cananiters mans dochter, welcke man Sua hiet, ende namse tot eenen wijue,

3

Ende als hise besliep ontfincse ende baerde eenen soon dye sy hiet Er.

4

Ende anderwerf werdt si beurucht ende baerde eenen soon dyen hiet si Onan

5

Noch baerde si eenen soon dyen hiet si Sela, ende Iuda was te Chesib doen si hem baerde.

6

Ende Iuda gaf sinen eersten soon Er, een wijf die Thamar hiet,

7

mer hi was ^a quaet voor den HERE daerom doode hem die HERE,

a quaet zijn voor den heere, dats sonder vrese quaedt doen. deu. iiij d iiij.reg. xv.b

8

doen sprac Iuda tot sinen soon Onan, legt v by v broeders wijf, ende versaemt v met haer, op dat ghy v broeders saet verwect

9

Mer als Onan wiste dat dat saedt zijn eygen nyedt en soude zijn, als hi by sijns broeders wijf lage, liet hijt op die aerde vallen, ende verdorft, op dat hi sinen broeder geen saet gheuen en soude,

10

dat mishaechde den HERE dat hy dat dede, ende doode hem ooc.

11

⁺Doen sprac Iuda tot zijnder behouder dochteren Thamar, blijft een weduwe in ws vaders huys, tot dat mijn soon Sela groot wort, want hi dachte misscien mochte hi ooc steruen gelijc zijn broeders, Also ginc Thamar ende bleef in haers vaders huys.

+ B vers 11

12

Als nv vele daghen verloopen waren, sterf dese Sua dochtere Iudas wijf, ende na dyen dat Iudas rou gedaen was ginc hi henen om sine scapen te scheeren te Thimnath met sinen Herdere Hira van Odollam.

13

Doen wert Thamar geseyt, Siet, v sweer gaet op te Thimnath, om sine schapen te scheren,

14

⁺doen dede si dye weduwen cleederen van haer dye si droech ende nam eenen sluyer ende verhulde haer, ende ginc sitten aen den wege buyten der poorten te Thimnath, want si sach dat Sela groot worden was, ende si en werdt hem niet te wijue gegheuen.

+ C vers 14

15

Ende als haer Iuda sach, meynde hy twaer een hoere, ⁺ want si had haer aensicht gedect,

+ D vers 15

16

ende hi ginc tot haer aenden wege ende seyde, Laet my doch by v liggen want hi en wist niet dat zijn behoude dochter was. Si antworde, wat wildi mi gheuen, dat ghi bi mi ligt?

17

Hi sprac ic sal eenen bock vander cudden seynden, Si antwoorden, geeft mi dan pant tot dat ghijt mi seynt

18

Hy sprac, wat pant wildi dat ic v gheue, Sy antworde uwen segel, armrinc, ende uwen staf, die ghi in v hant hebt Doen gaf hi haer dat, ende ginc bi haer liggen, ende si ontfinc van hem

19

ende si stont op ende ghinc wech, ende leyde den sluyer af, ende trac die weduwen cleederen weder aen.

20

Iuda sandt den bock met sinen herdere van Odollam, op dat hi dat pant weder haelde vanden wijue, ende hi en vantse niet.

21

⁺Doen vraechde hi den lieden van dier plaetsen, ende seyde, waer is die hoere die buyten aenden wege sadt? Si antwoorden, Daer en heeft geen hoere geweest,

+ E vers 21

22

Ende hi quam weder tot Iuda, ende sprac, Ick en hebse niet vonden, oock seggen die lieden van dier plaetsen, datter geen hoere en heeft gheweest.

23

Iuda sprac, Si hebben dat haer, dat wi misschien nyet bescaemt en worden, want ick heb den bock gesonden, ende ghi en hebtse niet vonden.

24

Na drie maenden wert Iuda gebootscapt, v behoude dochtere Thamar heeft gehoereert, siet daer toe, si heeft van hoereren ontfangen, ⁺ Iuda sprac brengtse voort dat si verbrant worde,

+ F vers 24

25

Ende alsmense voortbrachte, stelde si haer bi haren sweer, ende sprac van dien man heb ic ontfangen, dien dat behoort ende sprack, Kendy ooc wiens dat die segel ende armrinck ende dien stock is?

26

Iuda bekendet ende sprac. Si is gerechter dan ic, want ic en hebbe haer nyet gegeuen mijnen soon Sela, ende hi en besliepse niet meer.

27

Ende als si baren soude, werden daer tweelinghen in haren lichaem beuonden,

28

ende als si baerde quam daer een hant wt. ⁺ Doen nam dye vroeyurouwe ende bant eenen rooden draet daerom, ende sprac, die sal eerst wt comen.

+ G vers 28

29

Als die zijn hant weder in trock, quam zijn broeder wt ende si sprac, waerom is om uwen wille een liesken gescoort, ende men hiet hem Perez,

30

daer nae quam sijn broeder die den rooden draet om zijn hant hadde, men hiet hem Sorah.