Den Bybel met groter neersticheyt ghecorrigeert (Liesveltbijbel 1542)

¶ Ioseph bediet den twee gheuanghenen haren droom, Ende voorseyt haer wat haer ghebueren sal.

Dat .xl. Capittel.

1

⁺ENde het gebuerde daer na, dat dye schenckmeestere des Conincx van Egypten, ende die backmeester misdeden teghen haren heer den Coninck van Egypten,

+ A vers 1

2

Ende Pharao wert ouer haer toornich,

3

ende lietse setten in des hoofmeesters huys inder gheuanckenissen daer Ioseph gheuanghen lach,

4

ende dye Hoofmeestere stelde Ioseph ouer haer, dat hy hen diende, ende si saten daer sommige dagen.

5

⁺Ende het droomde hen beyden den schencker ende den backer, in eender nacht, eenen yegelicken eenen eygen droom, ende een yeghelicx droom had sijn bediedinge.

+ B vers 5

6

Als nv des morgens Ioseph tot hen binnen quam, ende sach dat si suer sagen,

7

vraechde hi hen, ende sprac, Waerom siedy heden quadelic?

8

Sy antwoorden, Wy hebben ghedroomt, ende en hebben nyemant diet ons wtlegghe. Ioseph sprac, wtleggen hoort God toe, vertellet toch my.

9

Doen vertelde dye schencker sinen droom Ioseph, ende seyde tot hem. My droomde datter een wijnstock voor my was,

10

dye hadde drie rancken, ende hi groeyde, wiesch ende bloeyde, ende zijn druyuen werden rijp,

11

Ende ic hadde Pharaos napt in mijn hant, ende namse ende dructese wt inden napt, ende gaf den napt Pharao in die hant.

12

⁺Ioseph sprac, dat is die bediedenisse, drie rancken zijn drie daghen,

+ C vers 12

13

nae drie daghen sal Pharao v hooft verheffen, ende v weder den napt in die hant gheuen, soo ghy te voren deet, als ghi sijn Schencker waert,

14

Mer ghedenct mijnder wanneer dat v wel gaet, ende doet barmherticheyt aen my, dat ghi Pharao vermaent dat hi mi wt desen huyse brenghe,

15

wandt ick ben heymelick ghestolen wt den Hebreeuschen lande, ooc en hebbe ic hier niet misdaen, dat si mi op geleyt hebben.

16

⁺Als die backer sach dat die bediedinge goet was, sprack hi tot Ioseph, Mi heeft gedroomt ick droech drie gheulochten koruen op mijn hooft, ende inden ouersten korf alderley ghebacken spijse Pharaoni,

+ D vers 16

17

ende die vogelen aten wt den korue op mijn hooft.

18

Ioseph antwoorde ende sprac, dit is die bediedinge, drie koruen sijn drie dagen,

19

ende na drie dagen sal Pharao v hooft verheffen, ende v aen dye galghe hangen, ende die vogelen sullen v vleesch aen v eten.

20

Ende het gheschiede des derden daechs, doen hielt Pharao sijnder gheboorten dach, ende hy bereyde een maeltijt allen sinen knechten, ende verhief dat hooft des ouersten schenckers, ende dat hooft des backermeesters, onder sinen knechten,

21

ende stelde den ouersten schencker weder in sijn officie, dat hi den napt Pharaoni in sijn hant gaf,

22

Maer den backermeester dien liet hi hanghen so hem Ioseph bediet hadde,

23

mer die schencmeester en ghedacht niet aen Ioseph, mer hy vergat sijnder.