Den Bybel met groter neersticheyt ghecorrigeert (Liesveltbijbel 1542)

In Raphidim twistede dat volck met Mose om des waters wil, ende dat selue gheeft haer die steenrootse, Ende na dien strijden si teghen Amalek

Dat .xvij. Capittel.

1

⁺ENde alle die gemeynte der kinderen van Israel troc wt der woestinen Zin, hare dachreyse so hen die HERE beual, ende si maecten haren legere in Raphidim, ende daer en had dat volc geen water te drincken,

+ A vers 1

2

Ende si hadden twist met Mose seggende, Geeft ons water dat wi drincken, Mose sprac tot haer Waerom kijft ghi tegen mi? waerom tempteerdi den HERE.

3

Doe dat volc aldaer ooc dorst had na twater, murmureerden si tegen Mose seggende, Waerom hebdi ons laten trecken wt Egypten, dat ghi ons, ende onse kinderen ende onse vee van dorste laet steruen.

4

⁺Mose riep totten HERE ende sprac, Hoe sal ict metten volcke doen, Het en schilt niet veel si en sullen mi steenen?

+ B vers 4

5

Die HERE sprac tot Mosi, gaet voor dat volc ende neemt somige ouders van Israel met v, ende neemt dijn roede in v hant, daer ghi dat water mede sloecht ende gaet,

6

Siet ic sal aldaer voor v staen, op eenen steen in Horeb, daer suldi den steen slaen, dan sal daer water wt loopen, dat dat volc drincke, Mose dede also voor den ouders van Israel,

7

Doen hietmen die stede Massa Meriba, om den twist wille der kinderen van Israel, ende om dat si den HERE tempteerden, ende geseyt hadden, Is die HERE onder ons oft niet.

8

⁺Doe quam Amalek ende streedt teghen Israel in Raphidim,

+ C vers 8

9

Ende Mose sprac tot Iosua, Kiest mannen wt, trect ende strijt tegen Amalec, Morgen sal ic staen op tsop vanden hoeuele, ende die roede Gods in mijn hant hebben, Ende Iosua dede so hem Mose geseyt had, dat hi tegen Amalec strijden soude,

10

Mose ende Aaron ende Hur clommen op die soppen des hueuels,

11

ende die wijle dat Mose sijn hant op hief, so verwan Israel, Mer als Mose sijn hant neder liet, so verwan Amalek.

[afbeelding]

[p. *]

12

Mer Mose handen waren swaer, daerom namen si eenen steen ende leydenen onder hem, dat hi daer op sitten soude, Ende Aaron ende Hur onderhielden hem sijn handen op elcker siden een, ⁺ Also en werden sijn handen niet moede tot dat die sonne onder ginc,

+ Iu. iij. Sa. vi.d

13

Ende Iosua verwan Amalek, ende sijn volc, door des sweerts scerpte.

14

Ende die HERE sprack tot Mose, scrijft dat tot eender gedenckenisse, in een boec, ende beuelet inden ooren van Iosua, Want ic sal Amalek van onder den hemel wtworpen, datmen zijns niet meer en gedencke,

15

Ende Mose maecte den HERE eenen outaer, ⁺ ende hiet hem des HEREE, Nissi,

+ nu xx.b Psalmo lxxxvij.

16

Want hi sprack, Dye strijdt des HEEREN teghen Amalek, sal sijn door een hant onder Gods behoet, van kinde tot kints kinde.