Den Bybel met groter neersticheyt ghecorrigeert (Liesveltbijbel 1542)

¶ Hier worden sommighe insettinghen vertelt, ende principalijc wat totten Tabernakel behoort wordt hier bestelt Tvolc brengt meer danmen behoeft. Hier worden ooc constelijcke wercmeesters gheordineert

Dat .xxxv. Capittel.

1

⁺ENde Mose verghaderde alle die ghemeynte der kinderen van Israel, ende sprac tot hen. Dit ist dat die HEERE gheboden heeft, dat ghi doen sult

+ A vers 1

2

Ses dagen suldy v werck doen, den seuensten dach suldy heylich houden, den Sabboth der rusten des HEEREN, so wie dat eenich werck daer inne doet, die sal steruen.

3

Ghi en sult gheen vier aensteken inden Sabboth dach, in allen uwen wooninghen

4

Ende Mose sprac tot al der gemeynten der kinderen van Israhel. Dit ist dat die HEERE gheboden heeft.

5

Gheeft onder v Hefoffer den HERE, also dat een yeghelijck wt vrijer herten brenghe den HEERE den Hefoffer, gout, siluer, metael,

6

gheel side schaerlaken, rosetroot, witte side, ende gheyten hayr,

7

roode rams vellen, hemeluerwighe vellen, ende vueren hout,

8

olye totter lampen, ende specerie tot salfolye, ende tot goeden ruecwerck,

9

Onix ende seer dierbaer ghesteente tot den lijfrock, ende tot den borstlap.

10

⁺Ende so wie onder v wijs van herten is, die come ende make dat die HERE gheboden heeft,

+ B vers 10

11

te wetene den Tabernakel met sijnder tenten ende decsele, ringhen, berderen, rijchelen, calomnen, ende voeten

12

Die arcke met haren hantboomen, den Ghenaden stoel, ende dat voorhancsel,

13

Die tafele met haren hant-boomen, ende alle haer ghereetschap, ende dat thoonbroot,

14

Den candelaer om te lichten, ende sijn ghereetschap, ende sijn lampen, ende die olye tot den lichte,

15

Den ruecoutaer met sinen hantboomen, Die salfolye ende specerie tot den ruecwercke, Den doec voor die duere des Tabernakels,

16

Den brantoffer outaer met sinen metalen rooster, hantboomen, ende alle zijn gheretschap, Dat handuat met sinen voete,

17

Dat tapijt des voorhoofs met sinen calomnen, ende voeten, ende den doeck der dueren aent voorhof,

18

Die naghelen des Tabernakels, ende des voorhoofs met haren zeylen,

19

Die cleederen der officien totten dienste inden heylighen, die heylige cleederen des priesters Aaron, met sijnder sonen cleederen tot den priesterdom.

20

⁺Doen ghinc die geheele ghemeynte der kinderen van Israel wech van Mose,

+ C vers 20

21

ende een yeghelijc bracht zijns herten gaue, Ende al wat si wt vrijen wille wouden, brochten si tot den Hefoffer den HEERE, tot den wercke der tenten des ghetuyghenis, ende tot allen sinen dienste, ende totten heylighen cleederen,

22

Het brochten beyde man ende wijf, wie dat ghewillich van herten was, armringhen, oorringhen, ringhen, gordels, ende alderley gulden iuweelen, daer toe bracht een yeghelijc gout totten Weefoffer den HEERE,

23

Ende wie dat gheel side hadde, schaerlaken, rosetroot, witte side, gheyten hayr, roode rams vellen, ende hemel blaue vellen, die brachtent

24

Ende wie siluer, ende metael hadde, die brachtent totten Hefoffer den HEERE, Ende wye vueren hout bi hem vandt, die bracht tot alderley werc des Gods dienst

25

Ende die wijse wijuen van herten, sponnen met haren handen, ende brochten haere spinwerck van gheelder siden, schaerlaken, rosetroot, ende witter siden.

26

⁺Ende die wijuen die hooch verstant hadden inder wijsheydt, die sponnen gheyten hayr,

+ D vers 26

27

Dye Vorsten brochten Onix ende dierbaer gesteente tot den lijfroc, ende den borstlap,

28

ende specerie, ende olye tot den lichtuaten, ende tot salfolye, ende tot den goeden ruecwerck.

29

Aldus brochten die kinderen van Israhel vrywillich beyde man ende wijf, tot alderley werc, dat die HERE gheboden hadde door Mose, datmen maken soude.

30

Siet, die HERE heeft met namen gheroepen Bezaleel Vrijs soon, Hur soon was vanden geslachte Iuda,

31

ende hi heeft hem veruult metten gheest Gods, dat hi wijs, verstandich, constich si tot alderley werc

32

constelijc te arbeyden int gout, siluer, ende metael,

33

edel steen te snijden ende in te setten, houdt te tymmeren, te maken alderley constelijck werck,

34

ende hi heeft onderwijsinghe in sijn herte ghegheuen, met Ahaliab den soon Ahisamach, vanden gheslachte Dan,

35

Hi heeftse met wijser herten veruult om te maken alderley werck, te snijden, te wercken ende steken met gheelder siden, schaerlaken, rosetroot, ende witte side, ende met weuen, dat si maken alderley werck, ende constelijcken arbeyt verdincken, ofte vinden