Den Bybel met groter neersticheyt ghecorrigeert (Liesveltbijbel 1542)

¶ Die HERE beueelt Mosi die tente op te rechten, Ende alle dinck daer inne te oordineren ende toe te bereeden

Dat .xl. Capittel

1

⁺ENde die HERE sprac met Mose seggende,

+ A vers 1

2

Ghi sult den tabernakel der tenten des getuychnis oprechten, inden eersten dage der eerster maent,

3

Ende ghy sult die arcke des getuygenis daer in setten, ende dat voorcleet voor die arcke hangen

4

Ende ghi sult die tafele daer inne brenghen, ende toe bereyden ende den candelaer daer stellen, ende die lampen daer

[p. *]

op setten,

5

Ende den gulden rueck outaer suldy voor dye Arcke des getuygenis setten, ende in die duere des Tabernakels suldy den doecke hanghen,

6

Den outaer des brantoffers suldy setten voor die duere vanden tabernakel der tenten des ghetuygenis,

7

ende dat hantuat suldi setten tusschen die tente des ghetuychnis, ende den outaer, ende doen daer water inne,

8

ende stellen den voorhof daeromme, Ende den doec ophangen in die duere des voorhoofs.

9

Ende ghi sult die salfolye nemen, ende den Tabernakele, ende al dat daer inne is, saluen, ende gi sulten wijen met alle sijne ghereedtschap, op dat si heilich sijn.

10

Ende ghi sult den brantoffere outaer saluen ende alle sijn ghereetschap, ende wijen hem, dat hy dat alder heylichste sy.

11

Dat hantuat ende sijn voeten suldy oock saluen ende wijen.

12

⁺Ende ghi sult Aaron ende sijne sonen voor die duere der tenten des getuyghenis brenghen, ende met water wasschen,

+ B vers 12

13

Ende ghy sult Aaron die heylighe cleederen aen trecken, ende saluen ende wijen hem dat hi mijn priester si,

14

Ende ghi sult sine sonen daer ooc brengen, ende den engen rock suldy hen aendoen

15

ende saluense ghelijckerwijs dat ghy haren vadere ghesaluet hebt, dat sy mijn priesters sijn. Ende dese saluinghe sullen si hebben tot eenen eewighen priesterdom, by haren nacomelinghen.

16

Ende Mose dedet also als hem die HERE geboden hadde

17

Aldus werdt den tabernakel opgherecht inden tweeden iare, inden eersten daghe des eersten maents,

18

Ende alse Mose oprechte, stelde hi die voeten ende dye barderen ende rijchelen, ende hi rechte op die calomnen,

19

ende spreyde die tente wt bouen den Tabernakel, ende hi leyde dat decsel der tenten bouen daer op, so de HERE hem gheboden hadde.

20

⁺Ende hi nam dat ghetuygenis, ende leydet in die arcke, ende hi dede die hantboomen aen die arcke, ende hi dede den genaden stoel op die arcke,

+ C vers 20

21

ende hi bracht die arcke inden Tabernakel, ende hi hinck die gordijne voor die arcke des ghetuyghenis, so hem die HEERE gheboden hadde.

22

Ende hi stelde die tafel in die tente des ghetuygenis, in deen side vanden Tabernakel noortwaerts buyten voor dat voorhanghende cleet,

23

ende hi bereyde dat broot daer op, voor den HERE, so de HERE Mosi geboden hadde.

24

Ende hi sette den candelaer ooc daer in tegen dye tafel ouer, in die Suydtside des tabernakels,

25

ende hi dede lampen daer op voor den HERE, soe hem die HERE geboden hadde.

26

Ende hi sette den gulden outaer daer inne, voor dat voorhangende cleet.

27

Ende hi

[afbeelding]

maecte rueck daer op, van goeden ruecwerc so hem die HERE gheboden hadde.

28

Ende hinc den doec in die duere des tabernakels, mer den brantoffer outaer sette hi voor die duere vanden tabernakel der tenten des getuygenis.

29

Ende hi offerde daer op brantoffer ende spijsoffer, so hem die HERE geboden hadde.

30

Ende dat hantuat stelde hi tusschen de tente des getuygenis ende den outaer, ende hi dede water daer inne om te wasschen.

31

⁺Ende Mose ende Aaron ende sijn sonen, wiesschen haer handen ende voeten daer wt,

+ D vers 31

32

want si moesten haer wasschen, als si in die tente des ghetuyghenis gaen souden, oft totten outaer comen, so hen die HERE geboden hadde.

33

Ende hi rechte den voorhof op, om den Tabernakel, ende om den outaer al omme, ende hi hinc dat cleet in die poorte des voorhofs.

Also voleynde Mose alle dat werc.

34

Doen bedecte een wolcke die tente des getuygenis, ende de heerlicheyt des HEREN veruulde den Tabernakele,

35

ende Mose en conde in die tente des getuygenis niet gegaen, die wile dat die wolcke daer op bleef, ende die herlicheit des HEREN die wooninge veruulde

36

Ende wanneer die wolcke den Tabernakele liet, dan trocken die kinderen van Israel ende reysden.

37

Alse

[p. *]

die wolcke niet en liet, dan en reysden si niet, tot dien dage toe datse haer ophief,

38

want die wolcke des HEREN was sdaechs op den tabernakel, ende des nachts wasser vier voor dye ooghen van alle den huyse van Israel, also langhe als si reysden.

¶ Hier eyndet dat tweede boeck Exodus.