Den Bybel met groter neersticheyt ghecorrigeert (Liesveltbijbel 1542)

¶ Vanden spijsofferen met bloemen vanden meele, ende menigerley gheback, onghesuert.

Dat .ij. Capittel.

1

⁺ALs een siele den HERE een spijsoffer doen wil so salt van bloemen vanden meel sijn ende hi sal olie daer op ghieten, ende wieroock daer op leggen,

+ A vers 1

2

ende dat alsoe brengen totten priesteren Aarons sonen. Dan sal die priester sijn hant vol nemen vanden seluen bloemen vanden meele, ende olie met al den wieroock ende ontstekent tot eender ghedachtenisse, opten outaer ⁺ Dat is een offer ^a dat wel riect voor den HERE

+ B vers 2

a Goeden rueck voor den Heere, sijn dye gebeden der ootmoedigher ende geloouiger, ghelijck Apoca. int .viij. gheseyt wort

3

Datter ouerblijft vanden spijsoffer, sal Arons zijn ende sijnder sonen, Dat sal dat alder heylichste sijn vanden offeren des HEREN.

4

Maer wil hi een spijsoffer doen van dat gebacken is inden ouen so neme hi een tarwen koeck ongheheeft, ⁺ met olye ghemengt. Ende ongheheefde vladen met olye ghestreken

+ B vers 4

5

Maer is uwe spijsoffer vet vant gebacken inder pannen, so salt van ongeheefden bloemen meele met olye ghemengt sijn,

6

ende ghy sullet in stucken deylen, Ende olye daer op ghieten, soo ist een spijsoffer.

7

Maer is uwe spijsoffer vet opten rooster ghebacken, so suldijt van bloemen vanden meele ende met olye maken.

8

Ende ghi sult dat spijsoffer dat ghi alsoo maken wilt den HERE, tot den priester brenghen die salt totten outaer brenghen,

9

ende des seluen spijsoffers Heffen tot een ghedachtenisse, ende ontsteken op den outaer. Dat is een offer dat wel rieckt voor den HERE.

10

Datter ouerblijft, sal Aarons ende sijnder sonen sijn. Dat sal dat alderheylichste sijn vander offeren des HEREN.

11

Alle spijsoffer die ghi den HERE offeren wilt, suldy sonder gheheefde deech maken.

12

⁺Want geen gheheeft deech noch geen honich en sal daer onder sijn. Dat den HERE tot een offere ontsteken worde. Mer tot den offere der eerstelingen suldyse den HERE offeren. Maer op gheenen outaer en sullen si comen tot eenen sueten ruecke.

+ C vers 12

13

Alle spijsoffer suldi souten, Ende uwe spijsoffer en sal nemmermeer sonder sout des verbonts ws Goods sijn, want in alle uwe offeren suldy sout offeren.

14

Maer wildy een spijsoffer den HERE doen vanden eersten vruchten, so suldy die nyeuwelinghen aenden viere drooghen, ende cleyn stooten, ende alsoo suldy die spijsoffer uwer eerster vruchten offeren,

15

ende ghi sult daer olye op doen, ende wierooc daer op legghen so ist een spijsoffer.

16

Ende die priester sal van datter ghestooten is, ende vander olyen met al den wieroock ontsteken tot een ghedachtenis. Dat is een offer den HERE.