Den Bybel met groter neersticheyt ghecorrigeert (Liesveltbijbel 1542)

¶ Van dootoffer, heyloffer, vreedoffer, oft danckoffer, ende dat vette.

Dat .iij. Capittel.

1

⁺ENde wilt hi offeren een dootoffer vanden runderen, het si een osse oft coee, so sal hi offeren voor den HERE dat gene dat sonder smette is,

+ A vers 1

2

ende hi sal zijn hant op des selfs dootoffers hooft leggen, ende dodent voor die dore der tenten des ghetuygenis. Ende die priesteren Aarons sonen, sullen dat bloet sprengen, al om ende om op den outaer.

3

Ende si sullen vanden dootoffere den HERE offeren (te weten) alle dat vet des inghewants,

4

ende die twee nieren, ⁺ metten vette dat daer aen is, aenden lendenen, ende dat nette dat aen die leuere is, ende oock aen die nieren.

+ B vers 4

5

Ende Aarons sonen sullent ontstekent opten outaer tot eenen brantoffer, op dat hout dat opten viere leyt Dat is

[p. *]

een offer dat wel riect voor den HEERE.

6

Is sijn dootoffer van cleyn vee, het si een manneken oft een wijfken, so salt sonder smette sijn.

7

Ist een lammeken, ⁺ so sal hijt voor den HERE brenghen,

+ C vers 7

8

ende sal sijn hant op des selfs offers hooft leggen, ende doodent voor die tente des ghetuygenis, ende Aarons sonen sullen dat bloet al om op den outaer sprengen,

9

ende also vanden dootoffer den HERE offeren, te weten, tvet, den heelen steert met den rugge, ende dat vet dat dat inghewant bedect, met alle den vette des inghewants,

10

ende die twee nieren metten vette dat aen dye lendenen is, ende dat nette om die leuere, aenden nieren daer toe.

11

Ende dye priester salt ontsteken opten outaer tot eender spijsen des offers den HERE.

12

Mer ist dat een gheyte sijn offer is, ende brengt hijse voor den HERE,

13

⁺soo sal hi sijn handt op haer hooft leggen, ende doodense voor die tente des getuyghenis. Ende Aarons sonen sullen dat bloet alom op den outaer sprenghen,

+ D vers 13

14

ende hi sal daer af een offer offeren den HERE, te weten, dat vet dat dat ingewant bedect,

15

ende alle dat vet dat aen dat inghewant is, Dye twee nieren metten vette dat daer aen die lendenen is, ende dat nette dat aen die leuere is, ende ooc die nieren.

16

Ende die priester salt ontsteken opten outaer totter spijsen des offers, tot eenen sueten ruecke.

17

Alle tvet behoort den HEERE, Dat sal wesen een eewige sede bi uwen nacomelinghen, in alle uwe wooninghen, dat ghy noch gheen vet noch bloet en sult eten.