Den Bybel met groter neersticheyt ghecorrigeert (Liesveltbijbel 1542)

¶ Van die onreynicheyt eender barender vrouwen van haer reyninghe ende offeren.

Dat .xij. Capittel.

1

⁺ENde die HERE sprac tot Mose seggende.

+ A vers 1

2

Spreect met den kinderen van Israhel ende segt. Ist dat een wijf vanden sade dat si ontfangen heeft een knechtken baert, so sal si seuen dagen onreyn zijn, so lange als si haer crancheyt lijdet,

3

ende inden achsten dage salmen dat vleesch zijns slofkens besnijden.

4

Ende si sal thuys bliuen driendertich dagen, in dat bloet haerder reyninghen, niet heylichs en sal si aentasten, ende totten heylichdom en sal si niet comen, tot dat die dagen haerder reyninghen wt zijn.

5

Maer baert si een meysken, so sal si twee weken onreyn sijn, so langhe als si haer cranckheyt lijdet, ⁺ ende si sal sessensestich daghen thuys blijuen, inden bloede haerder reyninghen.

+ B vers 5

6

Ende als die daghen haerder reyninghen wt sijn voor den sone oft voor die dochter, soo sal si een iarich lam brengen tot eenen brantoffer, ende een ionghe duyue oft een tortelduyue tot eenen sondoffer, dye priester voor die duere der tenten des getuychnis,

7

ende salt offeren voor den HERE, ende versoenense, ende so wordtse suyuer van haer bloetvloet, dat is die wet voor die ghene die een knechtken oft een meysken baert.

8

⁺Ende en vermach haer hant geen scaep, so sal si nemen twee tortelduyuen oft twee ionge duyuen die een tot eenen brantoffer, die ander tot eenen sondoffer, soo salse die priester versoenen, dat si reyn worde.

+ C vers 8