Den Bybel met groter neersticheyt ghecorrigeert (Liesveltbijbel 1542)

Van reyninghe der lazarie, Ende wat offer dat hi gheuen sal.

Dat .xiiij. Capittel

1

⁺ENde die HERE sprac tot Mose, segghende.

+ A vers 1

2

Dat is die wet der lazarien als hi ghereynicht worden sal. Hi sal totten priester comen, ⁺

+ Marci. viij.a ende i.a Lu. v.b.

3

Ende die priester sal wten leghere gaen, ende besien, hoe dat teeken der lazarien aenden lazarighen heel gheworden is,

4

Ende hi sal ghebieden den ghenen die te reynighen is, dat hi twee leuende voghelen neme, dye suyuer zijn, ende cederen hout ende roset verwe ende Ysope.

5

Ende hi sal ghebieden, den eenen vogel te dooden in een aerden vat aenden leuenden watere,

6

Ende sal den leuenden vogel nemen, met den cederen houte rosetverwe ende Ysope, ende in des vogels bloet doppen aenden leuenden watere,

7

ende besprenghen den ghenen die te reynighen is van zijnder lazarien seuenmael, ende reynighen hem also, ende laten den leuenden voghele int veldt vry vlieghen.

8

Die ghesuyuerde sal sijn cleederen wasschen, ende alle zijn hayr af scheren, ende baden hem int watere, soo is hi reyn, daer na sal hi gaen inden leger, ende sal noch seuen dagen buyten sijnder tenten blijuen.

9

Ende inden seuenden dage sal hi sijn hayr af scheren van sinen hoofde, vanden baerde, vanden wijnbrauwen dat alle dye hayren sijns lichaems af gheschoren sijn, ende sal sijn cleederen wasschen, ende sine vleesch int water baden, so is hi reyn.

10

Ende ten achsten dage sal hi twee lammeren sonder smette, ende een iarich scaep sonder smette nemen, ⁺ ende drie thiende bloemen vanden meele tot eenen spijsoffer, met olye ghemengt, ende een Log olyen.

+ B vers 10

11

Dan sal dye priester desen ghereynichden, ende die dingen stellen voor den HERE voor die duere der tenten des ghetuygenis,

12

ende sal dat een lam nemen, ende offeren tot eenen sculdoffer, met dat Log olyen, ende sal dat voor den HERE weysteren,

13

ende dat lam daer nae dooden, daermen dat brantoffer, ende den sondoffer doodet, te weten, in die heylige stede. Want so dat sondoffer des priesters is, so is ooc dat sculdoffer des priesters, Want het is dat alderheylichste.

14

Ende die priester sal vanden bloede nemen vanden schuldoffer, ende doen den ghetuychden op dat lapken vander rechter ooren, ⁺ ende opten duym van sijnder rechter hant, ende opten grooten teen van sinen rechten voete

+ C vers 14

15

Daer na sal hi die olye nemen wt dat Log, ende op sijns selfs des priesters slincke hant ghieten,

16

ende met sinen rechten vinger in die olie doppen die daer in sijn slincke hant is,, ende sprenghen met sinen vinger die olie seuenmael voor den HERE.

17

Die olye die daer ouerblijft in zijn hant, sal hi den ghereynichden op dat lapken van zijnder rechter ooren doen, ende opten rechten duym, ende opten groten teen van sinen rechten voet, bouen op dat bloedt des schuldoffers,

18

die olye die dat

[p. *]

ouerblijft in zijn hant, sal hi op des ghereynichdens hooft doen, ende hem versoenen voor den HERE,

19

ende hy sal dat sondoffer bereyden ende den ghereynichden versoenen om zijns onreynicheyts wille.

20

Ende hi sal daer na dat brantoffer dooden, ende salt opten outaer offeren met den spijsoffer, om hem te versoenen, so is hi reyn.

21

Ist dat hi arm is, ende met sinen handen so vele nyet en vercrijcht, so sal hi dan nemen een lam tot eenen schuldoffer om op te Weysteren, om hem mede te versoenen, ende een thienden deel bloemen vanden meel met olyen gemengt tot een spijsoffere, ende een Log olyen,

22

of twee tortelduyuen oft twee ionge duyuen, die hi met sijnder hant verweruen can, dat die een si een sondoffer, dye ander een brantoffer,

23

ende brenghense ten achsten daghe van zijnder reyningen totten priestere, voor die duere der tenten des ghetuyghenis, voor den HERE.

24

⁺Dan sal die priester dat lam tot eenen sculdoffer nemen, ende dat Log olyen, ende salt al weysteren voor den HERE,

+ D vers 24

25

ende dat lam dat schuldoffer dooden, ende nemen vanden bloede des selfs sculdoffers, ende doent den gereynichden op dat lapken van zijnder rechter ooren, ende opten duym van sijnder rechter hant, ende opten groten teen van sinen rechten voet,

26

ende die olye in des priesters slincker hant ghieten,

27

ende met sinen rechten vingere die olie die in zijn slincke hant is, seuenmael sprenghen voor den HERE.

28

Datter ouerblijft in sijnder hant, dat sal hi byden gereynichden op dat lapken van zijnder rechter ooren, ende opten duym van zijnder rechter hant, ende opten grooten teen van sinen rechten voet doen, bouen op dat bloet des sculdoffers,

29

die ouerbliuende olye in zijnder hant, sal hi den ghereynichden op dat hooft doen, om hem te versoenen voor den HERE,

30

ende daer nae vander eender tortelduyuen oft ionger duuen, so sijn hant heeft moghen vercrijgen, een sondoffer,

31

van dye ander een brantoffer maken, met den spijsoffere, ende die priester sal also den ghereynichden versoenen voor den HERE.

32

Dat is die wet voor den lazarighen, die met zijnder hant niet vercrijghen en can, dat tot zijnder suyueringhen behoort.

33

⁺Ende die HERE sprack tot Mose ende Aaron, segghende.

+ E vers 33

34

Als ghi int lant Canaan coemt dat ic v te besitten gheue, ende aldaer yewers in eenen huyse van uwer besittinghen een lazarich teeken verschijnt,

35

soo sal die comen, dien dat huys toebehoort, ende bootscappent den priester ende seggen. Mi dunct datter een lazarich teeken is aen mijnen huyse.

36

Dan sal die priester heeten dat si dat huys wtruymen eer dan die priester daer ingaet om dat teeken te besien, op dattet niet al onreyn en worde, datter inden huyse is, daer na sal die priester ingaen om dat teeken te besien.

37

Als hi dat dan besiet, ende beuint dat daer aen dien muer des huys gheel oft rootachtige putkens zijn, ende die ghedaente neder dan die ander muer is,

38

so sal hy ten huyse ter dueren wtgaen, ende dat huys seuen dagen toe sluyten.

39

Ende als hi ten seuensten daghe daghe weder coemt, ende siet dat dat teeken voorder gheten heeft aen des huys muer,

40

so sal hi die steenen heeten wtbreken daer dat teeken in is, ende buyten voor die stadt, in een onreyn plaetse worpen,

41

⁺ende dat huys salmen binnen rontommme scrabben, ende sullen dat afghescrapte stof buyten voor die stadt in een onreyn plaetse schudden,

+ F vers 41

42

ende ander steenen nemen, ende in haer stede doen, ende ander stof nemen, ende dat huys beworpen.

43

Als dan dat teeken weder coemt, ende wtbreect aenden huyse, na datmen die steenen ende dat stof wtgetrocken ende dat huys anders beworpen heeft,

44

soo sal die priester ingaen, ende als hi siet, dat dat teeken voorder gheten heeft, aenden huyse so ist sekerlijc een verslindende lazarie, aenden huyse, ende tis onreyn,

45

daeromme salmen dat huys afbreken steen ende hout, ende alle stoffe die aenden huyse is, ende ghi sullet buyten vueren voor die stadt, aen eenen onreynen hoec.

46

Ende wie dat in dat huys gaet, also lange alst besloten is, die is onreyn totten auont.

47

Ende wie daer inne leet, oft daer in eet, die sal sijn cleederen wasschen.

48

⁺Waer dat die priester siet, als hi daer ingaet, dat dit teeken niet voorder aenden huyse gegeten en heeft, na dien dat huys beworpen is, so sal hijt reyn seggen,

+ G vers 48

49

want dat teeken is heel worden. Ende voor een sondoffer nemen, voor dat huys twee vogelen, cederen hout, ende rosetverwe wolle, ende Ysope,

50

ende den eenen vogel slaen in een aerden vat, aen een leuende water,

51

ende dan salmen nemen dat Cederen hout, die rosetverwe wolle, den ysope, ende den leuenden vogel,

52

ende in dat bloet des dooden voghels doopen, aenden leuenden water, ende dat huys seuenmael daer mede besprengen,

53

ende sal also dat huys suuer spreken met den bloede des vogels met den leuenden water metten leuenden vogele, met den cederen hout, metter Ysopen, ende metter rosetverwen wolle,

54

Ende sal den leuenden vogele laten buyten voor die stadt int vry velt vlieghen, ende dat huys versoenen, so ist reyn.

55

Dit is die wet ouer alle teekenen der lazarien, ende grillicheit ouer die lazarie der cleederen ende der huysen,

56

ouer die buylen lichtende, smetten, clare, wit,

57

op datmen wete wanneer yet reyn oft onreyn is. Dat is die wet der lazarien.