Den Bybel met groter neersticheyt ghecorrigeert (Liesveltbijbel 1542)

Van alderley onreyne vloeden, der mannen ende wijuen.

Dat .xv. Capittel

1

⁺ENde die HERE sprac, met Mose ende Aaron seggende

+ A vers 1

2

Spreect metten kinderen van Israel, ende segt hem als een man van sinen vleesch een vloet vloedet, die is onreyn,

3

want hi is onreyn van dezen vloede, als zijn vleesch van deser vloet draecht, oft een wonde af gheten wort,

4

Alle dien leger daer hi leedt, ende al daer hi op sidt sal oock onreyn wesen.

5

Ende wie sinen legher raect, die sal sijn cleederen wasschen, ende baden hem met water, ende onreyn sijn totten auont.

6

Ende wie sidt daer hi gheseten heeft, die sal sijn cleederen wasschen ende baden hem met watere, ende onreyn sijn totten auont.

7

Wie sijn vleesch raect, die sal sijn cleederen wasschen, ende baden hem met water, ende onreyn sijn totten auont.

8

Als hi sijn speecsel worpt op den ghenen die reyn is, die sal sijn cleederen wasschen, ende baden hem met water, ende onreyn sijn totten auont.

9

Ende die sadel daer hi op sidt, sal onreyn worden

10

Ende wie dat yet raect dat onder hem gheweest is, die sal onreyn sijn totten auont. ⁺ Ende wie alsulcken dinck draecht, die sal sijn cleederen wasschen, ende hem met water baden, ende onreyn sijn totten auont.

+ B vers 10

11

Ende wien dat hi raect, ende te voren sijn handen niet en wascht, die sal sijn cleederen wasschen, ende baden hem met watere, ende onreyn sijn totten auont.

12

Als hi een aerden vat raect dat salmen breken, Mer dat houten vat salmen met water wasschen.

13

Ende als hi reyn wordt van sijnder vloet, so sal hi seuen dagen tellen, na dien hi reyn gheworden is, ende sijn cleederen wasschen, ende sijn vleesch met leuende water baden so is hi reyn.

14

Ende ten achsten dage sal hi twee tortelduuen, oft twee ionge duuen nemen, ende voor den HERE brengen, voor die duere der tenten des ghetuyghenis, ende den priester gheuen.

15

Ende die priester sal

[p. *]

vander eender, een sondoffer maken, ende vander andere, ⁺ een brantoffer, ende hem versoenen voor den HERE, om sijnder vloet wille.

+ C vers 15

16

Als een man inden slaep sijn zaet ontghaet, die sal alle sijn vleesch met water baden, ende onreyn sijn totten auont.

17

Ende alle cleet, ende alle vel, dat met sulcken sade besmet is, sal hi wasschen met watere, ende onreyn zijn totten auont.

18

Een wijf daer een alsulcken man bi leet sullen haer met water baden, ende onreyn zijn totten auont.

19

Als een wijf haers vleeschs bloet vloet heeft, sal si seuen dagen besiden gedaen worden, So wie datse raect die sal onreyn sijn totten auont.

20

Ende al daer si op leet, also lange als si besiden gedaen is, salt onreyn sijn, Ende waer dat si op sidt, sal onreyn zijn.

21

Ende wie haren leger raect, die sal sijn cleederen wasschen, ende baden hem met water, ende onreyn sijn totten auont.

22

Ende wie yet raect daer si op gheseten heeft, sal sijn cleederen wasschen, ende hem met water baden, ende onreyn zijn totten auont.

23

Ende als een man bi haer leet, al die wijle dat si besiden ghedaen is, die sal seuen dagen onreyn sijn,

24

ende dien legere daer hi op ghelegen heeft, sal onreyn sijn.

25

Als een wijf haren bloet vloet lange tijt heeft, niet alleen ter gewoonliker tijt, mer ooc ouer den gewoonliken tijt, So sal si onreyn sijn, so lange als si die vloet heeft, gelijc si ter tijt haers maentstonts, so sal si ooc hier onreyn zijn.

26

Alle legere daer si op leet, al die tijt haers vloets, sal sijn gelijc dien legher haers maentstont. Ende al waer si op sidt, sal onreyn zijn, gelijc dye onreynicheit haers maenstonts,

27

Wie yet daer af aentast, die sal onreyn sijn, ende sal sijn cleederen wasscen, ende baden hem met watere, ende onreyn sijn totten auont.

28

Mer wort si suuer van haerder vloet, soo sal si seuen dagen tellen, daer na sal si reyn sijn,

29

ende ten achsten dage sal si twee tortelduyuen, oft twee ionge duyuen nemen, ende totten priester brengen, voor die duere der tenten des ghetuychnis,

30

⁺Ende die priester sal vander eender een sondoffer maken, ende vander andere, een brantoffer, ende haer versoenen voor den HERE vander vloet haerder onreynicheyts.

+ D vers 30

31

Aldus suldy besorghen dat die kinderen van Israel, haer onsuuerheyt wachten, dat si niet en steruen, in hare onreynicheyt, als si mijn woninghe onreyn maken, die onder v is.

32

Dit is die wet ouer den ghenen, die den vloet heeft ende den genen die dat zaet inden slaep af gaet dat hi daer af onreyn wort,

33

Ende ouer den ghenen die den bloedt vloet heeft, ende wie die vloet heeft, het si man oft wijf, ende als een man bi eender onreynder leyt.