Den Bybel met groter neersticheyt ghecorrigeert (Liesveltbijbel 1542)

Datmen te voren alle offerhande totter dueren der woningen sal brenghen. Datmen gheen bloet eten en sal, Noch van een beest die van selfs ghestoruen is.

Dat .xvij. Capittel

1

⁺ENde die HERE sprack met Mosi seggende,

+ A vers 1

2

Segt Aaron ende sijnen sonen, ende al den kinderen van Israel, ende segt tot hem

3

Dit is dat dye HERE gheboden heeft. Wie dat wt den huyse van Israel eenen osse oft lam, oft geyte slaet inden legher, oft buyten voor den leger,

4

ende niet voor die duere der tenten des getuygenis en brengt, dattet den HERE tot eenen offer ghebracht worde voor die wooninge des HEREN, die sal des bloets schuldich zijn, als dye gene die bloet gestort heeft, ende alsulcken mensch sal wtgheroeyt werden, wt sinen volcke.

5

Daer om sullen die kinderen van Israel haer offer die si opten vryen velde offeren willen, voor den HERE brengen, ⁺ die duere der tenten des getuygenis, totten priester ende aldaer haer dootoffer den HERE offeren,

+ B vers 5

6

Ende die priester sal dat bloet opten outare des HEREN sprenghen, voor die duere der tenten des ghetuygenis, ende dat vet ontsteken tot eenen soeten ruec den HERE,

7

ende gheensins hare offer voortaen meer, den duuelen te offeren, met den welcken si hoereren, Dat sal een eewich recht zijn bi haer ende haren nacomelingen,

8

Daer om suldi tot dyen seggen, Welcke mensche vanden huyse van Israel, oft ooc een vreemdelinc die onder v is, die een offer oft een brantoffere doet,

9

ende en brengt dat niet voor die duere der tenten des getuygenis, ⁺ hijt den HERE doet, die sal ooc wt geroeyt worden van sinen volcke.

+ C vers 9

10

Ende elc mensch hi si vanden huyse van Israel, oft een vreemdelinc onder v die ergens bloet eedt, tegen dyen sal ic mijn aensicht setten, ende sal hem midden wt sijn volc verdriuen,

11

want des vleeschs siele, is inden bloede, ende ic hebt v totten outaer ghegeuen, dat uwe siele daer mede versoent werde.

12

Want dat bloet versoent dat in die siele is, Daerom heb ic geseyt den kinderen van Israel, Gheen siele en sal onder v lieden bloet eten, oock geene vreemdelinc, die onder v lieden woont.

13

Ende elc mensche van v lieden, hy si vanden huyse van Israel, oft een vreemdelinc onder v, die een dier oft vogel vanget oft iaecht, ⁺ en eedt, die sal des seluen bloet storten, ende met aerden bedecken, Want alle vleesch leeft inden bloede,

+ D vers 13

14

ende ic hebbe den kinderen van Israel geseyt, Ghi en sult geens lichaems bloet eten, Want dat leuen van alle vleessche, is in sijn bloet. Wie dattet eedt, die sal wtgeroeyt worden,

15

Ende wat siele, van een aes, oft dat vanden wilde verschuert is, hi si een ingeboren oft vreemdelinc, die sal sijn cleederen wasschen ende hem met water baden, ende onreyn sijn totten auont so is hi reyn

16

waer dat hi sijn cleederen niet wasschen noch hem niet baden en sal, so sal hi sine misdaet dragen