Den Bybel met groter neersticheyt ghecorrigeert (Liesveltbijbel 1542)

Van gheloften, Ende dat vry iaer

Dat .xxvij. Capittel

1

⁺ENde die HERE sprac met Mose seggende.

+ A vers 1

2

Spreect metten kinderen van Israel, ende segget, Als yemant den HERE een bysonder ghelofte doet scattende sijn siele,

3

soo sal dit die schattinghe sijn Eens mans beelde .xx. iaer out, tot in dat .lx. iaer suldy op .l. sikels, naden sikel des Heylichdoms scatten,

4

eens wijfs beelde, op .xxx. sikel.

5

Is hi .v. iaer out tot .xx. iaren, soo suldy hem scatten op .xx. sikels alst eens mans beelde is. Mer een wijf, op .x. sikels.

6

Is hi een maent out, totten vijf. iaren toe suldi hem scatten op .v. silueren sikels, alst eens mans beelde is, maer eens wijf, op .iij. silueren sikels,

7

Is hi tsestich iaer out oft daer ouer, so suldi hem schatten op .xv. sikels alst eens mans beelde is, mer eens wijfs, op thien sikels

8

Is hi te arm tot sulcker scattingen, so sal hi voor den priester staen, ende die priester sal hem schatten, hy sal hem schatten na dyens hant die daer gelooft heeft dat hijt verweruen can

9

⁺Maer ist eenich dier datmen den HEERE offeren mach, al watmen den HERE geeft, is heylich

+ B vers 9

10

men en sals niet wisselen noch mangelen, een goet om een quaet, oft een quaet om een goet, wisselet yemant een beeste om die ander, so sullense alle beyde den HERE heylich sijn,

11

mer is dat dier onreynich datment den HERE niet offeren en mach, so salment voor den priester stellen,

12

ende die priester salt scatten, oft goet oft quaet is, ende het sal by des priesters schatten bliuen,

13

mer wilt yemant lossen, die sal den vijfsten deel bouen die schattinghe gheuen

14

Als yemant sijn huys heylicht, den HERE tot eenen heylichdom, so salt die priester scatten oft goet oft quaet is, Ende daer na dat die priester scattet, soo salt blijuen,

15

Ende oft die gene dyet gheheylicht heuet lossen wilt, ⁺ so sal hi den vijfsten deel siluers, ouer dattet ghescat is, daer op gheuen, so salt sijn worden

+ C vers 15

16

Als yemant een stuck ackers den HEERE heylicht van sinen erfgoede, so sal hi gescat worden nae dye vruchten die hi draghet. Draecht hi een Homor garsten, so sal hy vijftich sikel siluers ghelden,

17

Heylicht hi sinen acker vanden Gulden iaer aen, soo sal den acker na sijnder weerden gelden.

18

Heeft hi hem gheheylicht nae den Gulden iare, so sal die priester rekenen, nae die ouer iaren, totten gulden iare toe, ende daer na minder schatten.

19

Maer wilt die ghene, die den acker gheheylicht heeft, den acker lossen, soo sal hi den vijfsten deel siluers, ouer dat hi gheschat is, daerop geuen, so sal hi weder sijn worden,

20

maer en wilt hijs niet lossen, ende vercooptment eenen anderen, so en sal hi hem niet meer lossen,

21

maer den seluen acker, als hi inden Gulden iare los wt gaet, sal den HERE heylich sijn gelijc eenen gheconsacreerden acker ende sal des priesters erfgoet sijn

22

Als yemant den HERE eenen acker heylicht, die hi ghecocht heeft, ende sijn erfgoet niet en is,

23

so sal hem die priester rekenen, wat hi ghelt totten Gulden iare toe, ende hi sal inden seluen daghe, alsulcken scattinge gheuen den HERE, tot eenen Heylichdom.

24

Maer inden ghulden iare, sal hi weder keeren totten ghenen dien hem vercocht heeft, dat hi sijn erfgoet inden lande si.

25

Alle weerderinge sal geschien, na den sikel des Heylichdoms, Eenen Sykel maect .xx. Gera

26

Die eerste gheboren onder dat vee, die den HERE anders toebehoort, en sal nyemant den HEERE heylighen, het si een osse oft schaep, ⁺ wandt hi behoort den HEERE,

+ exo. x.b nu. iij.g eze. xlv.d

27

maer is aenden vee yet onreyns, soo salment lossen, nae sijnder weerden,

28

ende daer ouer gheuen dat vijfste deel, maer en wilt hijt niet lossen, so salment vercoopen na sijnder weerden men en sal gheene gheconsacreert vercoopen, noch lossen dat den HERE gheconsacreert is, van allen dat hem toebehoort, het si een mensch, vee oft acker want alle gheconsacreerde, ⁺ is dat alder heylichste den HERE,

+ D vers 28

29

men en sal ooc gheenen geconsacreerden mensche lossen, maer hi sal die doot steruen

30

Alle thiende des lants, beyde vanden sade des landts, ende van vruchten der boomen, behooren den HERE, ende sullen den HERE heylich sijn,

31

maer wilt yemant sijn thiende lossen, dye sal tvijfste daer bouen meer geuen,

32

Ende alle thiende van runderen, ende schapen, ende wat onder die roeden gaet, dat is een heylighe thiende den HERE,

33

men en sal niet vragen oft goet of quaet si, men sals oock niet wisselen, mer wisselet yemant, soo salt beyde heylich sijn, ende niet gelost worden.

34

Dit sijn die gheboden die de HERE Mose gheboot totten kinderen van Israel, opten berch Sinai.

Hier eyndt dat derde boeck Mosi Leuiticus.