Den Bybel met groter neersticheyt ghecorrigeert (Liesveltbijbel 1542)

Hoe datmen den heyr leghere, dye hutten, ende tenten op slaen sal

Dat .ij. Capittel

1

⁺ENde die HEERE sprack met Mose ende Aaron segghende.

+ A vers 1

2

Die kinderen van Israhel, sullen haren leeger maken al omme bi die tente des getuychnis een yeghelijc onder sijn baniere, ende trecken na haers vaders huys

3

Tegen den oosten, sal sijn tente slaen, Iuda met zijnder banieren ende heyre, haer hooftman sal zijn Nahesson Aminadab soon,

4

Ende van sinen heyre was die somme lxxiiij.M. ende seshondert

5

Neuen hem, sal sinen leeger maken, dat geslachte Isachar, haer hooftman Nathaneel Suar soon,

6

ende die somme, van sinen heyre .liiij. duysent, ende vier hondert,

7

Daer toe ooc Sebulons geslachte, haer hooftman Eliab Elon soon,

8

van sinen heyr is die somme, seuentich duysent, ende vierhondert

9

Dat alle die in Iuda leeghere behooren, sijn inder sommen hondert ende seuennentachtich duysent ende vierhondert, die tot haren heyre behooren, ende die sullen voor aentrecken.

10

⁺Tegen den suyden, sal ligghen die scaren ende baniere Ruben met haeren heyre, haer hooftman EliSur, Sedeur soon,

+ B vers 10

11

ende sijn heyr inder sommen .xlvi. dusent vijfhondert.

12

Neuen hem sal sinen leeger maken dat geslachte Simeon, haer hooftman Selumiel SuriSaday soon,

13

ende sijn heyre inder sommen negenen vijftich duysent, drye hondert.

14

Daer toe ooc dat geslachte Gad, haer hooftman Eliasaph Ruel soon

15

ende sijn heyr inder sommen vijf en veertich dusent seshondert, ende vijftich,

16

Dat alle die in Rubens leeger behooren, sijn inder sommen hondert, ende eenen vijftich duysent, vierhondert, ende vijftich, die tot haren heyre behooren, ende sullen die tweede sijn int wt trecken.

17

⁺Daer na sal die tente des getuychnis trecken met den leegere der Leuiten, midden onder den leegeren ende so si haren leeger stellen also sullen si ooc trecken een yegelijc in sijn plaetse, ende onder sijn maniere

+ C vers 17

18

Tegen den westen sal liggen die scare ende baniere Ephraim met haren heyre, haer hooftman sal sijn Elisama Amihud soon,

19

ende sijn heyre inder sommen .xl. duysent, ende vijfhondert

20

Neuen hem sal sinen leeger maken dat geslachte Manasse, haer hooftman Gamaliel PedaZur soon,

21

sijn heyr aen die somme .xxxij.M. ende twee .C.

22

daer toe dat geslachte BenIamin, haer hooftman Abidan Gideons soon,

23

sijn heyr aen der sommen .xxxv.M. ende vier .C.

24

Dat alle die in Ephraims leeger behooren, sijn inder sommen hondert duysent, ende acht .M. ende een hondert, die tot sinen heyr behooren, ⁺ ende si sullen die derde int wttrecken sijn

+ D vers 24

25

Tegen den noorden sal ligghen die scare ende baniere Dan met haren heyr, haer hooftman Abieser Ammi Sadai soon,

26

die somme van sinen heyre .lxij.M ende seuen hondert.

27

Neuen hem sal liggen dat geslachte Asser haer hooftman Pagiel Achrans soon,

28

die somme van sinen heyre .xli.M. ende vijf .C.

29

Daer toe dat gheslacht Naphthali, haer hooftman Ahira Enans soon

30

die somme van sinen heyre .liij.M. ende vier .C

31

Dat alle die in Dan leegher behooren, sijn inder sommen .C lvij duysent, ende seshondert,

32

ende sullen die laetste zijn in wttrecken, met haren banieren

33

Dat is die somme vanden kinderen van Israel, na haren vaderen huysen, ende leeger met haren heyren Seshondert duysent, ende drie dusent, vijfhondert, ende vijftich,

34

mer die Leuiten en werden niet in die somme der kinderen van Israel getelt, so die HERE dat Mose geboden hadde,

35

Ende die kinderen van Israel dedent al, also die HERE Mose geboden hadde, Ende maecten haren leeger onder haer baniere, ende trocken wt, een yegelic in sinen geslachte, na haers vaders huysen.