Den Bybel met groter neersticheyt ghecorrigeert (Liesveltbijbel 1542)

Hier wort den sonen Leui ende Aarons haren dienst ende officie bescreuen ende geordineert

Dat .iij. Capittel

1

⁺DIt sijn Mose ende Aaron geslachten als die HERE met Mose sprack, in dien tijde opten berch Synai,

+ A vers 1

2

Ende dit zijn die namen van Aarons sonen, sijn eerste geboren was Nadab daer na Abihu Eleasar, ende Ithamar,

3

Dat sijn die namen van Aarons sonen, die priesters gesalft waren, ende haer handen geuult totten priesterdom.

4

Mer Nadab ende Abihu storuen voorden HERE, als si vreemt vier offerden voor den HERE, inder woestinen Sinai, ende en hadden geen sonen, Mer Eleasar ende Ithamar gebruycten dat priesterscap met haren vader Aaron.

5

Ende die HERE sprac met Mose, seggende

6

Doet comen dat geslachte Leui, ende steltse voor den priester Aaron, dat si met hem dienen,

7

ende haer ende der gantser gemeynten waec houden voor die tente des getuychnis, ende dienen in den dienst des tabernakels,

8

ende wachten alle die gereetscap, der tenten des getuychnis, ende die bewaringe der kinderen van Israel, te dienen in den dienst des tabernakels,

9

Ende sult den Leuiten, Aaron ende sinen sonen tot eender ghiften geuen, eenen yegelijcken die sine, wt den kinderen van Israel,

10

Mer Aaron ende sine sonen suldi setten, dat si haers priesterdoms waernemen, Maer in dyen een vreemde om te dienen gaet, ⁺ die sal die doot steruen.

+ B vers 10

11

Ende die HERE sprac met Mose, seggende,

12

Siet ic heb die Leuiten genomen onder die kinderen van Israel, voor alle eerste geboren, die de baermoeder ontdoen, onder den kinderen van Israel, also dat die Leuiten sullen mijn sijn,

13

Want die eerste gheboren sijn mijn, van dier tijt, dat ic sloech alle eerste gheboren in Egipten lant, doen heylichdese ic mi alle eerst geboren in Israel, vanden menscen aen totten vee toe, dat si mijn sijn sullen, ick die HERE

14

Ende die HERE sprac in die woestine Sinai,

15

met Mose seggende. Telt die kinderen Leui, na haerder vaderen huysen ende geslachten, al wat manlic is, van eender maent out, ende daer ouer,

16

Also teldese Mose na den woorde des HEREN, so hi gheboden hadde,

17

Ende dit waren die kinderen Leui met namen, Gerson, Kahath, Merari,

18

Die namen van Gersons kinderen in haren geslachten, waren Libni, ende Simei,

19

Die kinderen van Kahath, in haren geslachte, waren Amram, Iezebar, Hebron, ende Vsiel,

20

⁺Merari kinderen waren in haren gheslachte Maheli, ende Musi, Dit sijn die geslachten van Leui, na haerder vaderen huysen

+ C vers 20

21

Dit sijn die geslachten van Gerson, Die Libniten ende Semeiten,

22

die somme wert bi getal geuonden seuen duysent. ende vijfhondert, al dat manlic was een maent out, ende daer ouer.

23

Ende dat selue geslachte der Gersoniten sal sinen legher maken achter die Tabernakel tegen den westen,

24

haer ouerste sal zijn Eliasaph Iaels soon

25

Ende si sullen waken aen die tente des getuychnis, die tabernakel ende die tente, ende haer decsel,

26

ende den doec in die duere der tenten des getuychnis, dat voorhangende

[p. *]

cleet aenden voorhof, ende den doec in die duere des voorhofs, al dat al omme die Tabernakele, ende al om den outaer ghaet, ende sijn seylen, ende al wat tot sinen dienste behoort

[afbeelding]

27

Dit sijn Kahaths geslachten, Die Amramiten die Iezthariten, die Hebroniten, ende Vsieliten,

28

dat manlic was, een maent out, ende daer ouer, bi den getale acht duysent, ende seshondert, ⁺ die die wake des heylichdoms houden,

+ E vers 28

29

ende sullen haren leeger maken aen die side des Tabernakels, tegen die zuyt side,

30

hare ouerste sal sijn. Elisaphan Vsiels soon,

31

Ende si sullen wachten die arcke, die tafel, den candelaer, die outaren, ende alle die gereetschap des heylichdoms, daer si aen dienen, ende den doec, ende wat tot sinen dienste behoort,

32

Mer die ouerste bouen alle, die ouersten der Leuiten, sal Eleazar sijn, Aarons soon des priesters ouer die ghene die daer ghecoren sijn te bewaren die wake des Heylichdoms.

33

Dit sijn Merari gheslachten, Die Maheliten, ende Musiten,

34

die inden ghetale waren ses duysent, ende twee hondert, al wat manlic was, een maent out, ende daer ouer,

35

haer prince sal sijn Zuriel Abihail soon, ende sullen haren leegher maken aen die side des Tabernakels, teghen den noorden,

36

Ende si sullen in haer behoet hebben, die barderen ende rijchelen ende calomnen, ende voeten des Tabernakels, ende alle sijn ghereetschap, ende sinen dienst,

37

Daer toe ooc die calomnen al om vanden voorhoue, met den voeten, ende naghelen, ende seylen.

38

Mer voor den Tabernakel, ende voor die tente tegen den oosten, sullen Mose ende Aaron, ende sine sonen haren leeger maken, dat si dat heylichdom wachten, onder die kindereu van Israel, Als een vreemdelinc daer onder ghaet, die sal die doot steruen,

39

Alle dat ghetal der Leuiten die Mose ende Aaron telden, bi haren gheslachten, na dat woort des HEREN, al wat manlijc was, van eender maent, ende daer ouer was twee ende twintich duysent

40

Ende die HEERE sprac tot Mose. Telt alle die eerste gheboren van mans maecksele, onder den kinderen van Israhel, een maent out, ende daer ouer, ende neemt dat ghetal haerder namen,

41

Ende die Leuiten suldy mi den HEERE wtnemen, voor alle die eerste geboren der kinderen van Israel, ende der Leuiten vee, voor alle eerste geboren des vees der kinderen van Israel,

42

Ende Mose telde, so hem die HEERE gheboden hadde, alle die eerste geboren onder die kinderen van Israel,

43

ende men vant inden getale der namen alder eerstgeboren, wat manlijck was, een maent out ende daer ouer, inder sommen, twee ende twintich duysent, twee hondert, ende drye ende tseuentich

44

⁺Ende die HERE sprack met Mose seggende,

+ G vers 44

45

Neemt die Leuiten, voor alle eerste geboren, onder die kinderen van Israhel, ende dat vee der Leuiten, voor haer vee, dat die Leuiten mijn des HEREN sijn.

46

Maer dat los gheldt, vanden twee hondert ende drye ende tseuentich, die vanden eerste geboren der kinderen van Israhel daer comen, bouen dat ghetal der Leuiten

47

suldy vijf sikel nemen van elcken hoofde, nae den sikel des Heylichdoms (twintich Gera doet eenen sikel)

48

Ende ghy sult dat selfde ghelt dat daer so ouercomende is ouer haer ghetal, Aaron ende sinen sonen gheuen,

49

Dus nam Mose dat los gelt datter ouer quam bouen der Leuiten getal,

50

vanden eerste geboren vanden kinderen van Israel, duysent, driehondert, ende vijf ende tsestich, na den sikel des Heylichdoms,

51

ende ghaft Aaron, ende sinen soonen, nae den woorde des HEREN, soo die HERE Mose gheboden hadde.