Den Bybel met groter neersticheyt ghecorrigeert (Liesveltbijbel 1542)

Wie dat wten leeger verdreuen sal worden, Ende vanden ghebode der zeloerscap des mans teghen sinen wijue.

Dat .v. Capittel

1

ENde die HERE sprac tot Mose, seggende.

2

Gebiet den kinderen van Israel dat si wten leegere doen alle lazarige ende alle die van etter vloyen, ende die aen die dooden onreyn worden sijn,

3

Beyde man ende wijf, sullen buyten den leegher gaen, dat si haren leeger niet onreynich en maken, daer in ic onder hen lieden woonen,

4

ende die kinderen van Israel deden also, ende dedense buyten voor den leegere, so die HERE Mose ghesproken hadde.

5

Ende die HERE sprac met Mose seggende, segt den kinderen van Israel, ende spreect tot hen,

6

Als een man oft een wijf sonde doet, aen eenen mensce, ende daer mede ouertreet des HEREN gebot, so heeft de siele een schult op haer,

7

ende si sullen haer sonde bekennen die si gedaen hebben, ende sullen haer scult versoenen met dier sommen, ⁺ ende dat vijfste deel daer bouen daer toe doen, ende den ghenen geuen, aenden welcken si haer beschuldicht hebben,

+ B vers 7

8

Mer en is daer niemant tegenwoordich, dien die schult versoent worde, die hi aen hem beschuldicht heeft, so salment tegen den HERE versoenen, voor den priester, wtgenomen, den ram der versoeningen, daer mede dat hi versoent wort

9

Desgelijc sal alle Hefoffer van alle die kinderen van Israel heiligen ende den priester offeren sal hem toebehooren,

10

Ende wie yet heylicht, sal ooc des priesters sijn Ende wie yet den priester geeft, sal ooc des priesters sijn

11

Ende die HERE sprac met mose, seggende, Segt den kinderen van Israel, ende spreeckt tot hen,

12

als eens smans wijf doolt, ende sondicht tegen hem,

13

ende yemant beslaeptse vleeschelijc, ende dat is den man verborghen voor sinen oogen, ende twort bedeckt, dat si onsuyuer worden is, ende hi en canse niet betuyghen, want si en is daer niet in beuonden,

14

ende die quaet vermoeyende geest ontsteect hem, dat hi om sijn wijf beruert wort, si si onreyn oft niet onreyn,

15

so sal hijse totten priester bren-

[p. *]

ghen, ende sal eenen offer brengen voor haer, een thiendendeel Epha gersten meels, ende en sal daer geen olye op ghieten, noch wierooc daer op doen, want het is eens quaets vermoeyens offere, ende een beruchtich offer, dat die misdaet beruchticht.

16

Dus salse die priester brengen ende voor den HERE stellen,

17

ende vanden heylighen water nemen in een aerden vat, ende stof vanden vloer des Tabernakels int watere doen,

18

Ende sal dat wijf voor den HERE stellen, ende haer hooft ontdecken, ende dat beruchtich offer, dat welcke eens vermoeyens offer is, op haer hant leggen, ende die priestere sal in sijn hant hebben bitter veruloect water,

19

ende sal dat wijf besweeren, ende tot haer seggen, En heeft v geen man beslapen, ende en hebdi van uwen man niet gedoolt, dat ghi v niet ontreynicht en hebt, so en sullen dese bittere veruloecte wateren v niet scaden

20

Mer hebdi van uwen man ghedoolt, dat ghi onsuyuer sijt, ⁺ ende heeft v yemant beslapen, buyten uwen man,

+ C vers 20

21

so sal die priester dat wijf besweeren, met alsulcken vloecke, ende sal tot haer seggen, Die HERE sette v tot eenen vloecke, ende tot een sweringe onder uwen volcke, dat die HERE v dgye doe verrotten, ende uwen buyc bersten laten,

22

so moet dat vermaledijde water in v lijf gaen, dat uwen buyc berste, ende v dgie verrotte ende dat wijf sal seggen ^a Amen, Amen

a Amen is een hebreusche woort, ende is soo vele als het moet also ghescieden, ende alst ghedubbelt wort ist so wel te sterker Io. v ende .vi.

23

⁺Aldus sal die priester desen vloec op een cedelken scrijuen, ende met den watere af wasscen, ende sal den wiue vanden bitteren veruloecten water te drincken geuen,

+ D vers 23

24

Ende als dat veruloect water in haer geghaen is, dattet haer bitter wort,

25

sal die priestere van haerder handt nemen dat offere des vermoyens, ende tot eenen spijsoffere voor den HERE Weyferen, ende opten outaer offeren,

26

te weten, hi sal een hant vol vanden spijsoffer nemen voor haer ghedachtenis, ende opten outaer ontsteken,

27

ende daer na den wijue dat water te drincken gheuen, Ende als si dat water gedroncken heeft. Is si onreyn, ende heeftse haer besondicht aen haren man, so sal dat veruloeckt water in haer gaen, ende verbitteren haer, dat haer den buyc bersten, ende die dgie verrotten sal, ende dat wijf sal eenen vloec zijn onder haren volcke,

28

mer en is alsulcken wijf niet geontreynicht, mer reyn, soo en salt haer niet scaden, ende sal connen kinderen draghen

29

Dit is die wet des quaet vermoeyens, als een wijf van haren man wijct ende onreyn wort,

30

oft als een man des quaet vermoeyens geest ontsteeckt, dat hi om sijn wijf beruert wort,

31

dat hijse stelle voor den HERE, ende die priester met haer doe al na dese wet Ende die man sal onsculdich sijn van deser misdaet, mer dat wijf sal haer misdaet draghen.