Den Bybel met groter neersticheyt ghecorrigeert (Liesveltbijbel 1542)

Van die wet der Nazareen, ende van haerder ordineringhe, van die segeninge oft benedictie der kinderen van Israel

Dat .vi. Capittel.

1

⁺ENde die HERE sprac met Mose seggende,

+ A vers 1

2

Spreect totten kinderen van Israel, ende segt tot hen, Als een man oft een wijf haer afsceyden, om te gelouen een heilige gelofte, dat hi den HERE afgesceyden worde,

3

die sal hem onthouden van wijne ende starcken dranc, wijn, edick, ende starcken dranc, edick en sal hi niet drincken, oock niedt wat wt wijnbesien gheperst wort,

4

hi en sal versce noch drooge wijnbesien eten, also lange als sijn afscheydinghe wt den geloften duert, Oock en sal hi niet eten, datmen vanden wijnstoc maect vander wijnkeernen aen, tot aen die basten

5

Also lange als sijn afscheydinge wter gheloften duert, en sal geen schaer op sijn hooft comen, dat dye tijt wt is, dat hi den HERE af gescheyden is, want hi is heylich, ⁺ ende sal dat hayr op sinen hoofde laten wassen ende sal vry bloots hoofts staen,

+ B vers 5

6

Alle die tijt ouer, die hi den HERE afgesceyden wort en sal hi tot geenen dooden gaen,

7

Hi en sal hem ooc niet onreynich maken, aen die doot sijns vaders, sijns moeders zijns broeders ofte sijns susters,

8

want die heylicheyt sijns Gods is op sijn hooft, ende alle die tijt sijnder afsceydingen, sal hi den HERE heylich sijn.

9

Ende oft yemant voor hem, onuersiens bottelijck sterft, so sal dat hooft sijnder afsceydinghen onreyn worden, ende daer om sal hi sijn hooft bescheeren inden dage sijnder reynigen, dat is inden seuenden dage,

10

ende ten achsten dage, sal hi twee tortelduuen brengen, oft twee ionge duuen, totten priester, voor die duere der tenten des getuychnis,

11

ende die priester sal die eene tot eenen sondoffer bereeden, ende die ander tot eenen brantoffere, ende hem versoenen, om dat hi hem aen eenen dooden besondicht hadde, ende also sijn hooft inden seluen dage heyligen,

12

dat hi den HERE die tijt sijnder afsceydingen voort wt houde ende sal een iarich lam brengen tot eenen scultoffere, ⁺ mer die voorleden dagen sullen te niet blijuen daerom dat sijn afscheydinge ontreynicht is

+ C vers 12

13

Dit is die wet des genen, die afgesceyden geheylicht wort, Als die tijt sijnder afsceydinge wt is, soo salmen hem brenghen voor die duere der tenten des getuygenis,

14

Ende hi sal brengen sijn offer den HERE, een iarich lam, onbesmet tot eenen brantoffer, ende een iarich schaep, sonder smette tot eenen sondoffer,

15

ende eenen ram, onbesmet tot eenen dootoffer, ende eenen korf met ongeheefde koecken, van bloemen van meel, met olye gemengt, ende ongeheefde vladen met olye gestreken, ende haer spijsoffer ende drancoffer

16

Ende die priester salt voor den HERE brenghen, ende sal sijn sondoffere, ende sijn brantoffer bereyden

17

ende den ram sal hi totten dootoffer bereyden den HERE, tot den korue des ongeheefts broots, Ende sal ooc sijn spijsofferen ende drancoffer maken,

18

⁺Ende sal den Nazareum dat hoof sijnder afsceydingen scheren, voor die dueren der tenten des getuychnis, ende sal dat hayr van sinen hoofde sijnder afscheydinghen nemen, ende opt vier worpen dat onder dat dootoffer is,

+ D vers 18

19

Ende sal die gekoecte scouder nemen vanden ram, ende eenen ongeheefden koec wt den korf ende een ongeheefde vlade, ende salt den Nazareum op sijn hant leggen, na dyen dat hy sijn afscheydinghe geschooren heeft

20

Ende salt voor den HERE Weyferen, Dat is heylich den priester metter Weefborst, ende die Hefscouder, Daer na mach die Nazareus wijn drincken.

21

Dat is die wet des Nazareus, die sijn offere den HERE gelooft, voor sijn afsceydinge, buyten dat sijn hant verweruen can, so hi ghelooft heeft, sal hi doen na die wet sijnder heyliginge

22

Ende die HERE sprac met Mose, seggende,

23

Segt Aaron ende sinen sonen ende spreect,

24

Alsoo suldy seggen tot den kinderen van Israel, als ghise gebenedijt..

25

Die HERE gebenedie v, ende behoede v. Die HERE verlichte sijn aensicht op v, ende si v genadich.

26

Die HERE ^a verheffe sijn aensicht op v, ende geue v vrede,

a Aenscht verheffen is een teeken der liefden bewisen psalmus lxxxiij.

27

want ghi sult mijnen naem op die kinderen van Israel leggen, dat icse gebenedije.