Den Bybel met groter neersticheyt ghecorrigeert (Liesveltbijbel 1542)

MirIam ende Aaron murmureerden tegen Mosen, ende MirIam wordt Melaetsch.

Dat .xij. Capittel.

1

⁺ENde MirIam ende Aaron spraken tegen Mosen, om sijns wijfs wille, die moorinne, die hi tot eenen wijne genomen had ende spraken, Spreeckt die HEERE alleen door Mose?

+ A vers 1

2

Spreect hi ooc nyedt door ons?

3

Ende de HERE hoordet. Mer Mose was een seer saechtmoedich mensche bouen alle menschen der aerden.

4

Ende haestelic sprac die HERE tot Mose ende tot Aaron ende MirIam, ghi lieden drie gaet wter tenten des getuychnis, ende si gingen alle drie wt.

5

⁺Doen quam die HEERE af, in een calomne des wolcx, ende stont inder tenten dore, ende riep Aaron ende MirIam, ende die twee ginghen wt,

+ B vers 5

6

ende hy sprack, hoort mijn woort, is yemant een propheet des HEREN, dien sal ic openbaren in een ghesichte, oft in eenen droom sal ic met hem spreken,

7

Mer also niet met mijnen knechte Mose, die in alle minen huyse getrou is,

8

mondelijc spreec ic met hem, ende hi siet den HERE in sijnder ghedaenten, niet door doncker woorden oft ghelijckenissen, waerom hebdy dan niet geureest, contrarie mijnen knechte Mose te spreken.

9

⁺Ende den toren des HEREN wert op hen gram ende ginc wech,

+ C vers 9

10

ooc weec de wolcke vander tenten, ende siet doen was MirIam lazerich als snee, ende Aaron keerde hem tot MirIam ende sach datse lazerich was,

11

ende sprac tot Mose, Och mijn HERE en legt die sonde op ons niet, dat wi sottelic gedaen ende gesondicht hebben,

12

dat dese niet en si als een doode dat van sijnder moeder lichaem coemt, die lazarie heeft die helft haers vleeschs verslint.

13

⁺Mose riep totten HERE seggende, och God maectse ghesont.

+ D vers 13

14

Die HEERE sprack tot Mose, waert dat haer vader haer int aensicht gespogen had. en soude si niet seuen dagen haer scamen? Laetse seuen dagen besluyten buyten den leeger, daer na laetse weder ontfaen.

15

Also wert MirIam .vij. dagen gesloten buyten den leeger, ende dat volc en troc niet voorder, tot dat MirIam opgenomen wert.

16

Daer na troc dat volc van Hazeroth, ende maecte haren leger in die woestijne Paran