Den Bybel met groter neersticheyt ghecorrigeert (Liesveltbijbel 1542)

Daer worden mannen wtghesonden dat lant te besien ende te verspien, wt dien sommighe nader wedercoemst tvolc veruaerde, ende maectense bloode met haren quaden roep

Dat .xiij. Capittel.

1

⁺ENde die HERE sprac met Mose seggende,

+ A vers 1

2

Seynt mannen wt die dat lant Canaan bespien, dat welcke ic den kinderen van Israel geuen sal, eenen man van elcken geslachte haerder vaderen, die alle hooftlieden onder hen sijn,

3

Mose sandtse wt der woestijnen Paran, nae den woorde des HEEREN die alle gader hoofden waren onder die kinderen van Israel, ende hieten also.

4

Sammua Zacur soon, vanden geslachte Ruben

5

Saphat Hori soon, van Simeons geslachte,

6

Caleb Iephunne soon, vanden geslachte Iuda,

7

Igeal Iosephs soon, vanden geslachte Isachar,

8

Hozea Nuns soo,u vanden geslachte Ephraim,

9

Vanden gheslachte BenIamin, Plati Raphu soon.

10

Vanden geslachte Sebulon, Gadiel Sodi soon

11

Vanden gheslachte Ioseph van Manasse, Gaddi Susi soon

12

Ammiel Gemalli soon vanden geslachte Dan.

13

Sehur Misael soon van Asser geslachte,

14

Nahebi Vaphsi soon, van Naphthali geslachte.

15

Guel Machi soon, van Gad geslachte.

16

Dat sijn die namen der mannen, die Mose wt sant om te bespien dat lant. Mer Hozea Nuns soon noemde Mose Iosua.

17

⁺Als hi sandt om te bespien dat lant Canaan, sprac hi tot hen, trect op ten zuyden waert, ende gaet op dat geberchte,

+ B vers 17

18

ende bespiet dat lant, hoe dattet is, ende dat volc dat daer inne woont, oft sterck oft swac is, luttel van ghetale oft veel,

19

ende wat lant dattet is daer si in woonen oft goet oft quaet is, ende wat steden dat zijn daer si in woonen, oft si met mueren bewaert sijn oft niet,

20

ende wat lant dat si, oft vet oft mager si. Ende oft boomen daer in sijn oft niet Weest ghetroost, ende neemt die vruchten des lants, Het was recht in die tijt der eerster wijnbesien.

[afbeelding]

21

⁺Si ghinghen op, ende bespieden dat lant vander woestijnen Zin tot te Rehob, daermen te Hamath gaet,

+ C vers 21

22

Si gingen ooc op tegen tzuyden, ende quamen tot Hebron daer was Ahiman, Sesai ende Thalmai, Enaks kinderen. Hebron was seuen iaer ghetymmert voor Zoan in Egypten,

23

ende si quamen aen die beke Escol, ende sneden aldaer af een wijnrancke, met eender druyuen, ende lietense twee mannen op eenen stock dragen, daer toe ooc granaet appelen ende vijghen,

24

die plaetse heet die beke Escol, ⁺ om der druyuen wille die dye kinderen van Israel daer afsneden.

+ Escol dat heet een druyue daerom wort die plaetse druyuenbeke ghenoemt

25

Ende si keerden weder na veertich dagen, als si dat lant bespiet hadden,

26

si gingen ende quamen tot Mose ende Aaron, ende tot alle die gemeynte van Israel, in die woestijne Paran te Kades, ende si seyden hem, ende der gantser gemeynten, hoe dat daer stont. Ende si lieten hen sien die vruchten des lants,

27

ende verteldent hen, ende spraken. ⁺ Wi sijn int lant gecomen daer ghi ons sondt, daer melc ende honich in vloeyt, ende dit sijn haer vruchten

+ D vers 27

28

sonder dat daer sterc volc inne woont, ende seer vaste ende grote steden sijn daer, ende wi sagen ooc Enaks kinderen aldaer.

29

Die Amalechiten wonen int lant tegen die zuytside. Die Hethiten, ende Iebusiten, ende Amoriten woonen opt geberchte Die Cananiten woonen aen die zee omtrent die Iordane

30

Caleb stilde dat volc dat teghen Mose was, ende sprac tot hen. Laet ons op trecken, ende dat landt in nemen, want wi sullent wel verwelgen.

31

Mer die mannen die met hem opgetrocken waren, spraken. Wi en sijn niet machtich op te trecken tegen dat volc, want si sijn ons te sterc.

32

Ende si maecten een quaet gheruchte onder die kinderen van Israel, vanden lande dat si be-

[p. *]

spiet hadden, ende seyden. Dat lant daer wi door gegaen sijn om te bespien, verslint sijn inwoonders. Ende alle dat volc dat wi daer in sagen, sijn lieden van grooter lengten,

33

Wi sagen ooc tyrannen aldaer. Enaks kinderen vanden tyrannen, ende wi waren voor onsen ooghen als sprinchanen, ende also waren wi oock in haren ooghen.