Den Bybel met groter neersticheyt ghecorrigeert (Liesveltbijbel 1542)

¶ Vanden oproer ende secten Chore, Dathan, ende Abiram, ende haer straffinghe.

Dat .xvi. Capittel.

1

ENde Korah Iezehars sone, de Kahath sone was, Leui soon, met Dathan ende Abiram, die sonen Eliab, ende On, Peleth soon, van Rubens sonen,

2

stonden teghen Mose op, met sommige mannen vanden kinderen van Israel, twee hondert ende .L. hooftlieden der gemeynten, raetsheeren ende vermaerde lieden,

3

ende si vergaderden tegen Mose ende Aaron, ende spraken tot hen, ghi makes mi te veel, want alle dye ghemeynte is ouer al heylich, ende die HERE is onder hen lieden, waerom verhefte ghi v ouer die gemeynte des HEREN.

4

Als Mose dat hoorde, viel hi op sijn aensicht,

5

ende sprac tot Korach ende sinen aenhangers. Morgen sal de HERE kenlic maken welc die sine zijn, ende dye welcke heylich sijn om tot hem te comen, Wien hi verkiest, dye sal tot hem genaken.

6

Hierom doet dit, neemt wierooc vaten, ghi Korah ende alle v aenhangers,

7

ende doet vier daer inne, ende doet daer morgen ruecwerc op voor den HERE, ende so wien die HERE kiesen sal, die sal hey-

[p. *]

lich sijn, ghi makes te veel, ghi kinderen Leui.

8

Ende Mose sprac tot Korah. Hoort doch ghi Leui, sonen,

9

ist niet genoech, dat dye God van Israhel v afghescheyden heeft vander gemeynten van Israel dat ghi comen soudt, ende dat ghi doen sout den dienst inden tabernakel des HEREN, ende voor de gemeynte gaedy ooc om te dienen.

10

Hi heeft v, ende al v broeders die kinderen Leui, met v tot hem laten comen, ende ghi suect nv ooc dat priesterdom,

11

ghi, ende alle v aenhanghers, maect een verbont tegen den HERE. Wat is Aaron, dat ghi teghen hem murmureert.

12

Ende Mose sant, ende liet Dathan ende Abiran roepen, Eliabs sonen. Si antwoorden, Wy en comen daer niet,

13

Ist niet ghenoech dat ghi ons wt den lande van Egypten gheleyt hebt? daer huenich ende melc in vloeyt, om dat ghi ons dooden soudt in die woestijne, ten si dat ghi ooc heerschappije ouer ons hebt?

14

Hoe wel hebdi ons gebracht in een landt daer melc ende honich vloeyt, ende ghi hebt ons ackers ende wijnbergen tot een erfdeel gegeuen, Wildy den lieden ooc die ooghen wtsteken? wi en comen daer niet

15

Doen wert Mose seer gram ende sprac totten HEERE, En aensiet doch niet haer spijsoffer, Ic en hebbe ooc niet eenen ezele van henlieden genomen, ende ic en hebbe nyemanden van hen lieden eenich leet ghedaen. Ende hi seyde tot Korah,

16

ghi ende alle uwe aenhangers sult morgen voor den HERE staen, Ghi, ende si ende Aaron.

17

Ende een yegelijc neme sijn wieroocx vat, ende legge ruecwerc daer op, ende come totten HEERE, een yeghelijc met sinen vate, dat sijn twee hondert ende vijftich vaten,

18

Ende een yegelijc nam sijn vat ende dede vier daer inne, ende dede ruecwerck daer op, ende si ghinghen voor die duere der tenten des ghetuygenis, ende Mose ende Aaron ooc.

19

Ende Korah vergaderde al die gemeynte tegen hen, voor die duere der tenten des ghetuyghenis.

20

Maer die heerlicheyt des HEREN openbaerde voor alle die ghemeynte, Ende die HERE sprack met Mose ende Aaron seggende,

21

Sceydet v van deser gemeynten, dat icse haestelijck mach verderuen,

22

Ende si vielen op haer aensicht, ende spraken, God, God, die geester van alle vleesch, Oft een man ghesondicht heeft, wildy daerom thoornich sijn op alle die ghemeynte?

23

Ende die HERE sprac met Mose seggende

24

Segt der ghemeynten ende spreect, Sceyt v van Korach Dathans ende Abirams tenten.

25

Ende Mose stont op, ende ghinck tot Dathan ende Abiram, Ende die ouders van Israhel volchden hem na,

26

ende sprac metter gemeynten seggende. Wijct van die tenten deser godlooser menschen, ende en raect niet wat hen toebehoort, op dat ghi misscien niet en vergaet in eenich van haren sonden,

27

Ende si ghinghen op vanden wooningen Korah, Dathan, ende Abiram, Maer Dathan ende Abiram quamen wt, ende traden aen die duere haerder tenten, met haren wijuen, sonen ende kinderen

28

Ende Mose sprac, Daer bi suldy mercken dat dye HERE my ghesonden heeft dat ick alle dese wercken doen soude, ende niet en doe van mijnder eygender herten.

29

Ist dat si steruen, soo alle menschen steruen oft besocht worden, als alle menschen besocht worden, so en heeft mi die HERE niet gesonden,

30

Mer doet die HERE yet nyeus, so dat die aerde haren mont op doet, ende verslintse met allen dat si hebben ende dalen si nederwaert totter hellen leuendich, so suldy weten dat die lieden den HEERE gelastert hebbe

[afbeelding]

31

Ende als Mose dese woorden alle ghesproken had, so schuerde die aerde onder hen,

32

ende dede haren mont op, ende verslontse, met haren tenten, ende met alle den menschen die bi Korach waren, ende met alle hare haue,

33

ende daelde leuendich onder totter hellen, met al dat si hadden, ende die aerde ouerdectese, ende si vergingen vander gemeynten.

34

Ende geheele Israel, die al om hen stonden, vloden van haren roepe, segghende, dat ons die aerde ooc niet en verslinde.

35

Ende dat vier quam ooc wt vanden HERE, ende verslinde die twee hondert ende vijftich mannen, die dat ruecwerc offerden

36

Ende die HEERE sprac met Mose, seggende, ⁺ Segt Eleazar Aarons des Priesters soon, dat hy die vaten opheffe wten brant, ende stroye dat vier hier ende daer,

+ Apteros dye Coninc van Creten vant eerst dye manier om dat huenich vanden byen te vergaderen, ende tot spijse te gebruycken sijnder dochter soon Auidis geheeten die na hem trijck besadt dye maeckte veel goeder rechten in Creten hy was deerste die die osschen inden ploech sette.

37

want die vaten des zondaers sijn geheylicht door haerder sielen,

38

datmen daer blec af slae, ende den outaer daer mede behange, want si sijn gheoffert voor den HERE, ende gheheylicht, ende sullen den kinderen van Israhel tot een teeken sijn.

39

Ende Eleazar die priester nam die metalen vaten die die verbernde geoffert hadden, ende sloeger blec af den outaer mede te behanghen,

40

tot een ghedachtenisse den kinderen van Israel, dat nyemant vreemts dye niet en is van Aarons sade, comen en soude te offeren ruecwerck voor den HERE, op dat hen nyedt en gheschiede, so Korach ende sinen medeplegeren, soo die HERE hem gheseyt hadde door Mose.

41

Des anderen morgens murmureerde alle die gemeynte der kinderen van Israel, tegen Mose ende Aaron ende spraken. Ghi hebt des HEREN volc gedoot,

42

ende als dye gemeynte vargaderde tegen Mose ende Aaron, keerden si hen totter tenten des getuygenis, ende siet doen bedecte die wolcke die tente, ende die heerlicheyt des HEREN openbaerde,

43

ende Mose ende Aaron gingen in voor die tente des getuyghenis,

44

Ende die HEERE sprac tot Mose segghende,

45

Gaet wt deser gemeynten, ic salse verslinden, ende si vielen op haer aensicht.

46

Ende Mose sprack tot Aaron. Neemt dat vat, ende neemt vier daer inne vanden outaer, ende legt daer reucwerc op, ende gaet haestelijck totter ghemeynten, ende versoentse. ⁺ Want die thoornighe gramschap is vanden HEERE wtghegaen, ende die plaghe is aengegaen onder den volcke.

+ G vers 46

47

Ende Aaron nam so hem Mose gheseyt hadde, ende liep midden onder die gemeynte, ende siet, die plage was begonst,

48

ende hy maecte rueck, ende versoende dat volc, ende stont tusscen den dooden ende den leuenden, ende die plage hielt op,

49

Die met dier plagen ghestoruen waren, waren .xiiij. duysent ende .viij.C. wtgenomen die in Korachs bedrijf storuen.

50

Ende Aaron quam weder tot Mose, voor dye duere der tenten des getuygenisse, ende die plage hiel op

[p. *]

[afbeelding]