Den Bybel met groter neersticheyt ghecorrigeert (Liesveltbijbel 1542)

Van Balack der Moabiten coninck, ende van Balaam den waersegger

Dat .xxij. Capiittel

1

⁺ENde als Balak Ziphor soon sach, al dat gene dat Israel gedaen hadde, den Amoriten, ende dat si seer beefden voor dit volc, dat seer groot was,

+ A vers 1

2

ende dat den Moabiten grouwelde voor die kinderen van Israel,

3

so sprac hi totten Oudersten der Midianiten, Nv sal desen hoop op knagen al watter rontom ons is, gelijc een osse tcruyt inden velde af knaghet.

4

Ende Balak Ziphor soon was in dien tijde Coninc der Moabiten. Ende hi sandt boden wt tot Bileam Beors sone, die een waerseggher was, die woonde aent water vanden lande der kinderen sijns volcx, dat si hem roepen souden, ende liet hem seggen. Siet daer is een volc wt Egipten getrocken, dat bedect dat aensicht der aerden, ende leyt tegen mi,

5

Daerom coemt nv ende veruloect mi dat volc, want het is mi te machtich, oft ic dat verslaen mochte, ende wt mijnen lande drijuen, ⁺ Want ic weet, wie dat ghi ghebenedijt die is ghebenedijt, ende wie ghi vermaledijt, die is vermaledijt.

+ B vers 5

6

Ende die ouders der Moabiten gingen wech met den Ouders der Midianiten, ende hadden den loon der waerseggers in haren handen, ende gingen tot Bileam in, ende seyden hem Balaks woort

7

Ende hi antwoorde hem, Blijft hier te nacht, so sal ic v seggen, so mi die HERE seggen sal Aldus bleuen die vorsten der Moabiten bi Bileam

8

Ende God quam tot Bileam ende sprac. Wie sijn die lieden die bi v sijn?

9

Bileam sprack tot God, Balak Ziphor soon der Moabiten coninc, heeft tot mi ghesonden seggende.

10

Siet een volc isser wt Egipten ghe-trocken, ende bedect dat aensicht des landts, daerom coemt nv ende vermaledijt hen, oft ic met hen strijden mochte ende verdrijuense.

11

Mer God sprac tot Bileam, en gaet niet met hem, noch en veruloect dat volc niet want het is ghebenedijt

12

Doen stont Bileam des morghens vroech op, ende sprac tot Balaks vorsten, ⁺ Gaet henen in v landt, want die HERE en wils niet gehengen dat ic met v trecke.

+ C vers 12

13

Ende die vorsten der Moabiten gingen wech ende quamen tot Balak, ende spraken, Bileam weygherde hem met ons te trecken,

14

Doen sandt Balak noch groter ende heerlijcker vorsten dan die waren

15

Als dese tot Bileam quamen spraken si tot hem. Also doet v segghen Balak Ziphor soon, en vertrect toch niet tot mi te comen,

16

want ick sal v hoochlijc eeren, ende wat ghi mi segghen sult dat sal ic doen, Coemt doch ghi vermaledijt mi dit volc

Bileam antwoorde, ende sprac tot Balaks dienaren,

17

Al gaef mi Balak sijn huys vol siluers ende gouts, so en soude ick doch niet connen ouertreden dat woort mijns HEREN mijns Gods, cleyn oft groot te doen,

18

⁺daerom blijft ooc toch nv hier ooc dese nacht, dat ic weten macht wat die HERE voorder met mi spreken sal

+ D vers 18

19

Doen quam God des nachts tot Bileam, ende sprac tot hem, sijn die mannen gecomen om v te roepen? soo gaet ende treckt met hen, Maer wat ic v seggen sal dat suldy doen.

[afbeelding]

20

Doen stont Bileam des morgens vroech op, ende sadelde sijn ezellinne, ende troc metten vorsten der Moabiten

21

Maer Gods toren wert gram, om dat hi wech trock, Ende die Engel des HEREN stont inden wege, om hem te wederstaen. Ende hi reet op sijn ezellinne ende twee knechten waren met hem,

22

ende die ezellinne sach den Engel des HEREN inden wege staen, ende sijn sweert wtgetrocken in sijn hant, Ende die ezellinne weeck wten wege, ende ginc opten velde, mer Bileam sloechse dat si inden wege soude gaen

23

Doen ginc die Engel des HEREN inden pat staen byden wijnberch, daer op beyde siden mueren waren,

24

⁺ende doen die ezeliinne den Engel des HEREN sach drongse haer aenden muer, ende clemde Bileams voet aenden muer, ende hi sloechse noch meer

+ E vers 24

25

Doen ginc die Engel voorder, ende ginc staen aen eenen engen hoec, daer gheenen wech en was te wijcken, noch ter rechter noch ter slincker,

26

Ende doen die ezellin den Engel des HEREN sach vielse op haer knien onder Bileam Doen wert Bileam toornich ende gram, ende sloech die ezellinne metten stocke

27

Ende doen dede die HEERE der ezellinnen den mont op, ende si sprac tot Bileam. Wat heb ic v gedaen, dat ghi mi nv driemael hebt geslagen?

28

Bileam sprack totter ezellinnen, om dat ghi mi bespot hebt Och hadde ic nv een sweert in mijne hant, ick soude v dootslaen.

29

Die ezellinne sprac tot Bileam. En ben ic niet v ezellinne, daer ghi op pleecht te sitten

[p. *]

tot sijnder tijt tot op desen dage? plach ic oock v oyt also te doen? Hi antwoorde, ende seyde, Neen.

30

⁺Doen opende die HERE Bileam die ooghen dat hi den Engel des HEREN sien soude inden wege staen, ende een wtghetrocken sweert in sijn hant, ende hi neychde hem, ende bucte met sinen aensicht,

+ F vers 30

31

Ende die Engel des HEREN sprac tot hem, Waerom hebdi uwe ezellinne nv driemael gheslagen? Siet ic ben wtgegaen, om v te wederstaen, want desen wech is tegen mi,

32

ende die ezellinne heeft mi gesien, ende dryemael voor mi gheweken, ende en hadse voor mi nyet geweken. so soude ic v nv ooc gedoot hebben, ende die ezellinne leuendich behouden hebben.

33

Doen sprac Bileam totten Engel des HEREN, Ick heb ghesondicht, want ic en hebs niet geweten, dat ghi tegen my stont inden wege Ende en belieuet v niet, so sal ick wederom keeren

34

Die Engel des HEREN sprac tot hem, trect wech metten mannen, mer ghi en sult anders niet spreken, dan dat ic v seggen sal, Also troc Bileam met Balaks vorsten

35

Als Balak hoorde dat Bileam quam, troc hy hem tegen in die stadt der Moabiten, die daer leyt in dye palen van Arnon, die welcke aen dat wterste vanden palen leyt,

36

⁺ende sprac tot hem. En hebbe ic tot v nyet ghesonden, ende v laten roepen? Waerom en sidy dan tot mi niet gecomen? meyndy dat ick v niet en soude connen gheeeren?

+ B vers 36

37

Bileam antwoorde hem, Siet ic ben ghecomen tot v, mer hoe can ic yet anders gespreken dan dat mi God inden mont gheeft, dat moet ic spreken.

38

Aldus troc Bileam met Balak, ende si quamen in die strate vander stadt.

39

Ende Balak offerde runderen ende schapen, ende sandtse Bileam ende den vorsten na, die daer bi hem waren.