Den Bybel met groter neersticheyt ghecorrigeert (Liesveltbijbel 1542)

¶ Van dat feest der seuender maent, Ende van sine offerhanden.

Dat .xxix. Capittel.

1

⁺ENde den eersten dach der seuender maent, sal heylich bi v heeten, Gheen dienstelic werc en suldy daer inne doen, want het is uwer trompetten dach,

+ A vers 1

2

ende ghi sult brantoffer offeren den HERE, tot eenen sueten rueck, eenen iongen verre, eenen ram, ende seuen onbesmette iarige lammeren.

3

Ende haer spijsoffer, drie thiendendeel bloemen van meele, met olien gemengt opten verre, twee thiendendeel opten ram,

4

ende op elcke vanden seuen lammeren een thiendendeel,

5

Ende oock eenen bock tot eenen sondoffer om v te versoenen, behaluen dat brantoffer vanden maenden, met sijn spijsoffer ende sonder dat dagelicxe brantoffer,

6

met sijn spijsoffer ende met haren drancoffer, na hare rechten, tot eenen sueten rueck, dit is een offer den HERE

7

⁺Den thienden dach van deser seuender maent, sal ooc heylich heeten bi v, Ende ghi sult uwe sielen verootmoedigen, ende geen werck daer inne doen

+ B vers 7

8

maer ghy sult den HERE brantoffer tot eenen sueten rueck offeren eenen iongen verre, eenen ram, seuen onbesmette iarighe lammeren,

9

met haren spijsofferen drie thiendendeelen bloemen meels, met olyen gemengt opten verre, twee thiendendeel opten ram,

10

ende een tiendendeel op elc vanden seuen lammeren,

11

ende eenen boc tot een sondoffer, sonder dat sondoffer der versoeningen ende dat dagelicx brantoffer met sijn spijsoffer, ende met haren drancoffer

12

Den .xv. dach vander seuender maent, sal by v heylich heeten, geen dienstwerc en suldi daer in doen ende ghi sult den HERE seuen daghen vieren,

13

ende ghi sult den HERE brantoffer offeren, tot een offer des sueten ruecx den HERE, Derthien ionghe verren, twee rammen .xiiij. onbesmette iarige lammeren,

14

met haren spijsoffer. Drie thiendendeel bloemen meels met olien ghemengt, op elcken vanden .xiij. verren,

15

twee thiendendeel op elc vanden twee rammen, ende een thiendendeel op elcken vanden .xiiij. lammeren,

16

Ende ooc eenen boc tot een sondoffer, sonder tdagelicx brantoffere met sinen spijsoffer ende sinen drancoffer.

17

⁺Opten anderen dach suldy twelf ionge verren offeren, twee rammen .xiiij. onbesmette iarige lammeren, met haren spijsofferen ende drancofferen

+ C vers 17

18

op die verren op die rammen ende op die lammeren, in haren getale na den rechte, Ende eenen boc tot een sondoffer,

19

sonder dat dagelicx brantoffer, met sinen spijsoffer ende sinen drancoffer

20

Ten derden dage .xi. verren, twee rammen .xiiij. onbesmette iarige lammeren met haren spijsofferen ende drancofferen

21

op die verren, rammen ende lammeren na haren getale ende recht,

22

Ende eenen boc tot eenen sondoffere, sonder dat dagelicx brantoffer, met sinen spijsoffer, ende sinen drancoffer.

23

Ten vierden dage .x. verren, twee rammen .xiiij. onbesmette iarige lammeren,

24

met hare spijsoffer ende drancoffer, ⁺ op die verren, rammen, ende lammeren in haren ghetale na den rechte,

+ D vers 24

25

Ende eenen boc tot een sondoffer, sonder dat daghelicx brantoffer, met sinen spijsoffer ende sinen drancoffer

26

Ten vijfsten dage .ix. verren, twee rammen, veerthien onbesmette iarige lammeren, met haren spijsofferen ende drancofferen,

27

op die verren, rammen, ende lammeren, in haren getale ende rechte,

28

Ende eenen boc tot een sondoffer, sonder dat dagelicx brantoffer, met sine spijsoffer, ende sine drancoffer

29

Ten sesten dage acht verren, twee rammen veerthien onbesmette iarige lammeren, ⁺ met haren spijsofferen ende drancofferen,

+ Op desen dach eest datmen voor die armen, te hoope brenghen plach een ghemeyn goet van al dat God gaf

30

op die verren, rammen ende lammeren, in haren getale nae den rechte,

31

Ende eenen bock tot eenen sondoffer, sonder dat dagelicx brantoffer, met sinen spijsoffer ende drancoffer

32

Ten seuenden dage, seuen verren, twee rammen .xiiij. onbesmette iarige lammeren, met haren spijsofferen, ende drancofferen,

33

op die verren, rammen, ende lammeren, in haren getale naden rechte,

34

Ende eenen boc tot eenen sondoffer, sonder dat daghelicx brantoffer met sinen spijsoffer, ende sinen drancoffer

35

Ten achsten daghe suldi vergaderen, ende tsamen brengen, Ghi en sult dan geen werc doen,

36

maer ghy sult brantoffer offeren, tot eenen offer des sueten ruecx den HERE, Eenen verre, eenen ram, seuen onbesmette iarige lammeren met haren spijsofferen ende drancofferen,

37

opten verre, opten ram, ende op die lammeren, in haren ghetale, na den rechte,

38

Ende eenen boc tot eenen sondoffer, sonder dat dagelicx brantoffer, met sinen spijsoffer, ende sijn drancoffer

39

Dese dingen suldy offeren den HERE in v feesten, dat wtgenomen dat ghi ghelooft, ende vrywillich gheeft totten brantofferen, spijsofferen, drancofferen ende dootofferen,

40

Ende Moses seyde den kinderen van Israel al dat hem die HERE gheboden hadde.