Den Bybel met groter neersticheyt ghecorrigeert (Liesveltbijbel 1542)

Van die gheloften die van man ende wijf ghedaen worden.

Dat .xxx. Capittel

1

⁺ENde Mose sprac totten ouersten der gheslachten vanden kinderen van Israel.

+ A vers 1

2

Dit is dat die HERE geboden heeft,

3

Als een man den HERE eenige belofte doet, oft eenen eedt sweert, ende alsoe zijn siele verbint, die en sal sijn belofte niet breken, mer hi salt al doen, alsoot wt sinen monde ghegaen is

4

Als eens wijfs beelde den HERE een ghelofte doet, ende haer verbint als si noch in haers vaders huys is, ende noch maecht is,

5

ende haer gelofte, ende verbont, dye si ouer hare siele doet, coemt voor haren vader, ende swijget hi dan, so sal si sculdich sijn, al haer gelofte, ende al haer verbont dat si ghedaen heeft, daer si haer siele mede verbonden heeft,

6

Maer als haer vader dat hoort ist dat hi in dien dage dat wederseyt, so sullen haer beloften, ende haer verbondenissen, die si ouer haer siele ghedaen heeft, te nyeute wesen. Ende die HERE sal haer genadich zijn, om dattet hare vader wederseit heeft

7

⁺Heeft si eenen man, ende heeft op haer een gelofte oft heeft si laten gaen wt haren lippen een verbindinge haerder sielen,

+ B vers 7

8

ende die man hooret, ende swijcht hi in dien dage stille, so ghelt haer belofte ende verbindinge, daer si haer siele mede verbonden heeft,

9

Mer ist dattet die man wederseyt, als hijt hoort, so is haer gelofte los, die si op haer heeft, ende die verbindinghe die si wt haer lippen heeft laten ghaen, ouer haer siele, ende die HERE sal haer ghenadich sijn

10

⁺Een weduwe ende verstootene, so wat dat si belooft heeft, haer siele verbindende, sullen si gheuen

+ C vers 10

11

Also yemants huysgesin ghelooft oft verbint met eenen eedt haer siele,

12

ende die huyshere hooret, ende swijget, ende en keeret niet, so is die gelofte van weerden, ende al dat die siele belooft heeft,

13

Mer ist dat die huyshere wederseyt, als hijt hoort, so en ist niet van

[p. *]

weerden, wat wt haren lippen gegaen is, dat si belooft oft daer si haer siele mede verbonden heeft, want die huyshere heuet los gemaect, ende die HERE sal hem ghenadich sijn,

14

Ende alle beloften ende eeden, daermen mede verbint, ⁺ om die siele te ootmoedighen, mach die huyshere cracht gheuen oft te nyeute doen,

+ D vers 14

15

Also wanneer hi daer toe swijghet vanden eenen dage totten anderen, soo maket hijt van weerden, alle dye geloften ende verbindingen die si op haer heeft, om dat hi in dien dage geswegen heeft doen hijt hoorde,

16

Ist dat sake dat hijt te nyeute doen wil, nae dat hijt ghehoort heeft, so sal hi die misdaet dragen

17

Dat sijn die wetten die die HERE Mosi gheboden heeft tusscen man ende wijf, tusschen vader ende dochter, al die wile als si noch maecht is in haers vaders huys.