Den Bybel met groter neersticheyt ghecorrigeert (Liesveltbijbel 1542)

Vanden strijt tegen die Madianiten, ende van die victorie Israels, ende deelinghe der bueten ende roofs.

Dat .xxxi. Capittel.

1

⁺ENde die HERE sprac met Mose segghende,

+ A vers 1

2

Doet wrake ouer die kinderen van Israel, ouer die Madianiten dat ghi daer na vergadert wert tot uwen volcke.

3

Doen sprac Mose totten volcke, seggende, Bereyt onder v lieden volc totten strijde, tegen die Madianiten,

4

wt elcken geslachte duysent, dat si den HERE wraec doen, ouer die Madianiten, dat ghi wt allen den stammen van Israel in dat heyr seyndet,

5

Ende si kosen wt die duysenden van Israel duysent wt eenen geslachte .xij. duysent gewapent ten heyre.

6

Ende Mose santse met Pinehas, Eleazar des priesters sone int heyr, ende dat heylich ghetuygenis ende die trompetten in sijn hant

7

⁺Ende si leyden dat heyr tegen die Madianiten, so dye HERE Mose geboden had, ende si sloeghen doot al dat manlijc was,

+ B vers 7

8

ende ooc die coningen der Madianiten te weten Eui, Ruben, Sur, Hur, ende Reba, die vijf coningen der Madianiten, Bileam Beors sone dooden si ooc metten sweerde.

9

Ende die kinderen van Israel namen geuangen der Madianiten wijuen ende haer kinderen alle haer vee, alle haer haue, ende si roofden alle haer goeden,

10

si verbranden metten viere alle haer steden, haer woningen, ende alle borchten,

11

ende namen alle den roof, ende al watmen ghenemen conde, van menscen ende vee,

12

ende brachtent tot Mosi ende Eleazar den priester ende totter gemeynten der kinderen van Israhel, te weten die gheuangen ende dat genomen vee, ende dat gerooft goet inden legher, opter Moabiten velt, dat aen die Iordane die leyt teghen Iericho.

13

Ende Mose ende die priester Eleazar, ende alle die hooftlieden der gemeynten, ghingen hem te ghemoete buyten den leger.

14

Ende Mose wert toornich op die officiers der scaren, ⁺ die welcke hooftlieden ouer duysent ende die ouer hondert waren, die daer wt den heyre ende strijde quamen,

+ C vers 14

15

ende sprac tot desen. Hebdi al die vrouwen laten leuen?

16

Siet en hebben si niet die kinderen van Israel, door Bileams werc afgekeert, dat si sondichden tegen den HERE aen Peor, ende daer quam ouer die gemeynte des HEREN een plage?

17

Daerom slaghet al doot watter manlic is, vanden kinderen, ende alle wijuen die mans bekent hebben, ende bi gelegen hebben,

18

Mer al die kinderen die van wijfs beelde sijn, ende geenen man bekent, noch bi geleghen en hebben, die behout te lijue,

19

Ende blijft seuen dagen buyten den leger, alle die yemanden gedoot hebben, oft die die verslagene geraect hebben, dat ghi v ontsondiget, inden derden ende seuenden dage, met den genen die ghi geuangen hebt,

20

ende alle clee-deren, ⁺ ende alle ghereetschappe van vellen, ende alle pelswerc, ende alle houten vaten suldy ontsondighen.

+ D vers 20

21

Ende Eleazar die priester sprac, totten hooftlieden des heyrs die inden strijt getrocken waren, Dat is dat gebot des wets, welc dat die HERE Mose geboden heeft,

22

Gout, siluer, metael, yser, ten, loot, al dat vier ghelijden mach, suldy door tvier laten gaen, ende suuerent, dattet metten Besprengwater ontsondicht worde.

23

Mer al tgene dat tvier niet ghelijden en can suldy door dwater laten gaen,

24

ende ghi sult v cleederen wasschen ten seuenden dage, so wordy suyuer, daer na suldy inden leger comen

25

Ende die HERE seyde tot Mosi.

26

Neemt die somme des roofs vanden geuangenen, beyde van menschen ende vee, ghi ende die priester Eleazar met den ouersten vaderen, vander gemeynten,

27

ende geeft die helft den genen die inden crijch ende int heyr geweest hebben, ende dander helft der gemeynten.

28

Ende ghi sult den HERE, een Hefoffere offeren vanden crijschlieden die int heyr getrocken sijn, vanden vijf honderden een siele, beyde van menscen runderen, ezelen, ende scapen,

29

van haerder helft suldijt nemen, ende den priester Eleazar gheuen, tot eenen Hefoffer den HERE,

30

Maer vander helft der kinderen van Israel suldy nemen van vijftigen een stuc goets, beide van menscen, runderen, ezelen, ende scapen, ende van alle vee, ende geuet den Leuiten, die die wake houden vanden tabernakel des HEREN.

31

Ende Moses ende Eleazar die priester, deden so dye HERE Mosi geboden had,

32

Ende den ouerblijuenden buet, die dat heyr gerooft had, was sesmael hondert duysent, ende .lxxv. duysent scapen

33

.lxxij. duysent runderen

34

.lxi. duysent ezelen,

35

Ende die wijfs persoonen die geen mans bekent en hadden, noch bi gheleghen en hadden .xxxij. duysent sielen

36

Ende die helft, die den genen die int heyr ghetrocken waren toebehoorde, ⁺ was inden getale .ccc. mael ende .xxxvij. duysent, ende .ccccc. scapen

+ E vers 36

37

Daer af quamen den HERE ses hondert, ende .lxxv. scapen.

38

Item sessendertich duysent runderen, daer af quamper den HEERE lxxij.

39

Item .xxx. duyzent ende vijf hondert ezelen, daer af quamper den HERE .lxi.

40

Item vander menscen sielen .xvi. duysent sielen, daer af quamender den HEERE .xxxij

41

Ende Mose gaf desen Hefoffer des HEEREN, den. priester Eleazar, so hem die HERE geboden had

42

Maer dander helft die Mose den kinderen van Israel toe deelde, ⁺ vanden crijschs lieden

+ F vers 42

43

(te weten) die helft die der ghemeynten beuiel, was oock drie hondert mael ende seuendertich duysent, ende .ccccc. scapen,

44

Sessendertich duysent runderen

45

.xxx. duysent ende vijf hondert ezelen

46

.xvi. duysent menschen sielen.

47

Ende Moses nam van deser helft der kinderen van Israel, ooc dat vijftichste stuc, beyde van menschen ende van vee, ende gaft den Leuiten, ⁺ die die wake hielden vanden tabernakel des HEREN, also die HERE Mose geboden hadde.

+ G vers 47

48

Ende die hooftlieden die ouer duysenden des heyrs volcx waren, die quamen tot Mose, te weten die ouer duysent, ende ouer .C. waren,

49

ende spraken tot Mose, Dijn knechten hebben die somme genomen vanden crijschlieden, die onder onse handen geweest sijn, ende daer en gebreect niet een,

50

daerom brengen wi den HERE ghiften, Al wat een yegelijc vonden heeft, van gulden ghereetschappe, ketenen, armringhen, ringhen, ooc spansels, ende haecken, op dat onse sielen versoent werden voor den HERE

51

Ende Mose ontfinc van hen lieden, metten Priester Eleazar, dat gout van alderley iuweelen,

52

Ende

[p. *]

alle dat Hefoffer van goude dat si den HERE hieuen was sesthien dusent, ende seuen hondert ende vijftich sickels, vanden hooftlieden die ouer duysent ende die ouer hondert waren,

53

want die crijschlieden hadden gherooft een yeghelijc voor hem seluen,

54

Ende Mose met Eleazar die priester, ontfinc dat gout vanden hooftlieden, die ouer duysent, ende die ouer hondert waren ende brachtent in die tente des getuygenis, tot een gedachtenisse den kinderen van Israel voor den HERE