Den Bybel met groter neersticheyt ghecorrigeert (Liesveltbijbel 1542)

Als hi haer die goetheyt Gods vertelt heeft, vermaent hijse totter onderhoudnghe sijnder gheboden, ende datse die nemmermeer en souden vergheten, Die vrysteden der dootslageren worden weder gheoordineert.

Dat .iiij. Capittel.

1

⁺ENde nv hoort Israel, die seden ende rechten die ic v leere, dat ghise doen sult, op dat ghi leuen moecht, ende incomen, ende dat lant besitten, dat v die HERE uwer vaderen God geeft,

+ A vers 1

2

Ghi en sult daer niet toe doen, tot dien dat ic v gebiede, ende ghi en sult daer ooc niet af doen, op dat ghy behouden moecht die geboden des HEREN ws Gods, ⁺ die ic v gebiede,

+ ☞

3

Vwe oogen hebben gesien wat die HERE gedaen heeft, ouer BaalPeor, want alle die BaalPeor na wandelen, heeft die HERE v God onder v lieden verdaen,

4

Maer ghi die den HEERE uwen God aenhinct, leeft noch alle opten dach van heden,

5

Siet, ick heb v geleert rechten ende seden, so mi dye HEERE mijn God geboden heeft, dat ghi so doen sout, inden lande daer ghi in comen sult, dat ghijt besitten moecht.

6

Daerom behoudet nv ende doetet, want dat is v wijsheit ende verstant, ⁺ voor allen volcke, als si hooren sullen al dese seden, sullen si seggen. Och hoe wise ende verstandige lieden sijn dat, ende een seer wijs volc.

+ B vers 6

7

Want waer vintmen alsulcken machtigen volc, totten welcken die Goden aldus nakende sijn, also die HERE onse God so dicwils als wi hem aenroepen,

8

Ende waer vintmen alsulcken machtigen volc dat alsulcke gherechtige

[p. *]

seden ende rechten heeft gelijc als dese wetten, die ick voor v legghe, opten dach van heden.

9

Hierom bewaert v siele wel, dat ghi nyet en vergeet die gesciedenissen, die dine oogen gesien hebben, ende dat si wt uwer herten nyet en gaen, al v leuen lanc Ende ghi sultse vercondigen uwen kinderen ende kints kinderen,

10

den dach doen ghy voor den HERE uwen God stont aenden berch Horeb, daer die HERE tot my sprack. Vergadert mi dat volck, dat icse mijn woort laet hooren dat welcke ic hen leeren sal, hoe si mi vresen sullen, alle haer leuen lanck opter aerden, ende dat sijt haren kinderen leeren.

11

Ende ghi quaemt, ende stont onder aenden berch Dien berch bernde tot midden aenden hemel, ende daer was duysternis, wolcken ende donckerheit.

12

Ende die HERE sprac met v vanden midden wten viere, Ghi hoorde die stemme sijnder woorden, mer ghi en saghet gheen ghelijckenisse buyten die stemmme,

13

Ende hi vercondichde v sijn verbont, dat hi v gheboot te doen, te weten die .x. woorden ende hy schreefse op twee steenen tafelen.

14

Ende die HERE geboot mi, in dier seluer tijt, dat ic v leeren soude seden ende rechten, dat ghi daer na doen sout, inden lande daer ghi in trecket, dat ghijt besitten moecht

15

⁺Daerom bewaert nv v sielen wel, want ghi en hebt geen gelijckenisse gesien inden dage als die HERE met v sprac, van wten viere, opten berch Horeb,

+ C vers 15

16

op dat ghi v seluen niet en bederft,

17

ende maect v eenich beelt, dat eenen man gelijc si, of eenen wiue,

18

oft vee opter aerden, of vogel onder den hemel, of gewormpte opter aerden, oft visch inden watere, onder der aerden,

19

dat ghi oock v oogen niet op en heft ten hemele, ende aensiet dye sonne, ende die mane, ende sterren, oft eenich heyr des hemels, ende wort verworpen, ende aenbidtse, ende dientse, die gene die de HERE uwe God geschapen heeft, allen volcken onder alle hemelen tot dienste.

20

Ende die HERE heeft v aengenomen, ende wten yseren houen, te weten, wt Egypten geleyt, dat ghi sijn erfvolc sout sijn, gelijct blijct in desen dage,

21

Ende dye HERE wert toornich op mi, om ws wercx wille, dat hi swoer, ic en soude ouer die Iordane niet gaen noch in dat goede lant niet comen, dat v de HERE v God tot eenen erfdeele geuen sal,

22

mer ic moet in dit lant steruen, ende ic en sal ouer die Iordaen niet gaen, ⁺ ghi sult daer ouer gaen, ende dat goede lant besitten.

+ D vers 22

23

Daerom wacht, dat ghi des HEREN ws Gods verbont niet en vergeet, dat hi met v gemaect heeft dat ghi geen beelden en maect van eenigen gelijckenissen, so die HERE v God geboden heeft.

24

Want dye HERE v God, is een verslindende vier, ende een zeloersche God.

25

Als ghi kinderen crijcht, ende kints kinderen, ende dat lant bewoont, ende ghi v verderft, ende maect v beelden van eenigen maecsel, doende quaet voor den HERE uwen God, dat ghi hem vertoornt.

26

So roep ic heden ouer v tot getuygen, hemel ende aerde, dat ghi terstont vergaen sult, van dien lande, daer ghi in gaet ouer die Iordane om te besitten, Ghi en sult daer niet lange wesen, maer ghi sult vergaen,

27

ende die HERE sal v verstroyen, onder tvolc, ende ghi sult een ouerbliuende cleyn volcxken sijn onder die heydenen daer v de HERE brengen sal.

28

Aldaer suldi den goden dienen die met menscen handen gemaect sijn, hout ende steen, die niedt en sien, noch en hooren noch en eten, noch en riecken.

29

⁺Als ghi daer den HERE uwen God sult soecken so suldy hem vinden, ist dat ghi hem van gantser herten, ende van gantser sielen soect.

+ E vers 29

30

Als ghi verdruct sult worden, ende alle dese dingen sullen v begrijpen, inden laetsten dagen suldi weder totten HERE uwen God comen, ende sijnder stemmen gehoorsaem wesen,

31

Want die HERE v God, is een barmhertich God, hi en sal v niet verlaten noch verderuen, hi en sal ooc niet vergheten des verbonts dat hi uwen vaderen ghedaen heeft ende dat hi hen gesworen heeft.

32

Want vraecht na den voorleden tijden, die voor v geweest sijn, van dien dage aen, doe God den mensce opter aerden sciep, vanden eenen eynde des hemels, totten anderen, oft sulcken groten dinc oyt geschiet is,

33

oft des gelijc gehoort si, dat eenich volc Gods stemme ghehoort heeft wten viere spreken so ghi gehoort hebt, ende nochtans leefdi,

34

ende of God heeft willen ingaen, dat hy hem een volc soude nemen midden wt eenen volcke, door versoeckinge, door teekenen, door wonderlijcke dingen door strijt, door een machtige hant, ende door eenen wtgerecten arm, ende door grote visioenen, so die HERE v God dat al gedaen heeft in Egipten voor dinen oogen

35

⁺Ende ghi hebt dit gesien, om dat ghi weten sout, dat die HERE een God is, ende gheen ander meer, dan hi alleen.

+ F vers 35

36

Vanden hemel heeft hi v sijn stemme laten hooren, dat hi v leeren soude. Ende opter aerden heuet hi v ghetoont sijn groote vier, ende van wten vier hebdy sijn woort ghehoort, om dat hi uwe vaderen lief ghehadt heeft, ende haer saet na hen vercoren heeft

37

Ende hi heeft v wt Egypten geleyt, met sinen aensichte door een grote cracht, om dat hi verdrijuen soude voor v een groot volc, ende starcker dan ghi sijt,

38

ende v daer in brengen, dat hi v haer lant gheuen soude, tot een erfdeel, soot opten dach van heden blijct

39

Daerom suldi heden weten, ende in dine herte ouerleggen, dat die HERE een God is bouen inden hemel, ende onder opter aerden, ende geen ander meer,

40

dat ghi sijn geboden ende zeden hout, die ic v heden ghebiede, dat v ende uwen kinderen na v, wel gesciede, ende dat ghi lange leuen moget, in dat landt dat v die HEERE v God gheuen sal.

41

Doen verscheyde Moyses drie steden op gheen side der Iordanen, tegen der sonnen opganc,

42

dat daer in soude vlieden, wie dat sinen naesten onuerhoets doot slaet, ende dat hi hem te voren geen vyant geweest en is, die sal in een van dien steden vlyen, op dat hi leuendich bliue,

43

Die stadt Bezar inder woestijnen int effen lant onder die Rubiniten gelegen, ende Ramoth in Gilead onder die Gaddijten, ende Golan in Basan, onder die Manassiten geleghen.

44

⁺Dit is die wet die Mose voorgeleyt heeft den kinderen van Israel, ende dit sijn die getuygenissen, ende seden ende rechten,

+ G vers 44

45

die Moses den kinderen van Israel seide, doen si wt Egypten getrocken waren,

46

op dye ander side vander Iordanen, in dat dal tegen dat huys Peor, inden lande Sihon des conincx vanden Amoriten, die te Hesbon sadt, den welcken Moses ende de kinderen van Israel sloegen, doen si wt Egipten getrocken waren,

47

ende besaten zijn lant. Ende ooc Og des conincx tot Basans lant, die twee coningen waren der Amoriten, die op dander side der Iordanen waren teghen der sonnen opganck,

48

van Aroar aen, welc aen den oeuer leyt van die beke Arnon tot aenden berge Sion, ende dat is Hermon

49

ende al dat black velt op dander side der Iordanen tegent Oosten tot aen die zee inden blacken velde, ende aenden berch Pisga.