Den Bybel met groter neersticheyt ghecorrigeert (Liesveltbijbel 1542)

Hi verhaelt haer weder die geboden Gods, ende hi vermaent ende beueelt haer die scherpelijcken te onderhouden.

Dat .v. Capittel.

[p. *]

1

⁺ENde Moses riep alle Israel, ende seyde tot hen, Israel hoort die seden ende rechten, die ic heden voor uwen ooren spreke ende leertse ende onthoutse, dat ghi daer na doet,

+ A vers 1

2

die HERE onse God heeft met ons een verbont gemaect te Horeb,

3

ende hy en heeft dit verbont met onsen vaderen niet ghemaect, mer met ons, wi die hier heden sijn, ende alle leuen,

4

Hi heeft van aengesicht tot aengesicht met ons, wten vier opten berghe ghesproken,

5

Ic stont tot dier tijt tusscen den HERE ende v, om v te bootscappen des HEEREN woort, want ghi vreesdet vier. ende ghi en ginct opten berch niet, ende hy sprack.

6

Ic ben die HERE v God, ⁺ die v wt Egypten lant geleyt heeft, wten diensthuyse.

+ Exod xxliij.a Psalmo lxxx.

7

Ghi en sult geen ander Goden hebben voor mi,

8

Ghi en sult v gheen beelden maken van eenigerhande maecsele, noch dat bouen inden hemel, oft onder opter aerden, ende inden water onder der aerden is,

9

Ghi en sultse niet aenbidden noch hen dienen, want ic ben die HERE v God, een liefhebbende zeloers God, ⁺ die de misdaet der vaderen versoect op die kinderen int derde ende vierde lit den genen die mi haten,

+ Exod. xxiiij.a.

10

ende betoone barmherticheyt in veel duysenden den genen die mi liefhebben, ende mijn gheboden houden

11

Ghi en sult den naem ws HEEREN ws Gods niet te vergeefs in uwen mont gebruycken, ⁺ want de HERE en sal dien niet ontschuldich houwen die sinen naem te vergeefs gebruyct.

+ B vers 11

12

Den Sabboth dach suldi behouden, dat ghi hem heilicht, gelijc v die HERE v God geboden heeft,

13

ses dagen suldy arbeyden, ende alle v werc doen,

14

ende ten .vij. dage is den Sabbath, den HERE uwen God, ghy en sult geen werc doen, noch v soon, noch dochter, v knechte, v ioncwijf, uwen osse, uwen ezel ende v vee, ende de vreemdelinc die binnen dijnre poorten is, op dat v knecht, ende v maert rusten gelijc ghi.

15

Want ghi sult gedachtich wesen, dat ghi ooc een knecht in Egipten lant waert, ende die HERE v God, heeft v van daer geleyt, met een machtigen hant, ende wtgereeten arm, daerom heeft v gheboden die HERE v god, dat ghi den saboth houden sult

16

Ghi sult v vader ende v moeder eeren, ⁺ so v de HEERE dijn God geboden heeft, op dat ghi lange tijt leuen moecht opter aerden, ende dat v wel geschie inden lande, dat die HERE v God v geuen sal

+ Ex xxv Mathe. xv.a mat. v.c. Roman. xiij.b

17

Ghi en sult niet dootslaen,

18

Ghi en sult geen ouerspel doen,

19

Ghi en sult niet stelen,

20

ghi en sult geen valsce getuygenis geuen tegen uwen naesten, Ghy en sult ws naesten wijf niedt begeeren. Ghi en sult ws naesten huys niet begheeren, acker, knecht, ioncwijf, osse, ezel oft yet dat hi heeft

21

Dat sijn die woorden die de HEERE sprac tot uwer gantser gemeynten, opten berch van wten viere der wolcken ende der duysterheyt, met eender groter stemmen,

22

⁺Ende hi en dede daer niet meer toe, ende hy screefse op twee steenen tafelen, ende hi gafse mi

+ C vers 22

23

Doe ghi die stemme van wter duysternissen hoordet ende saecht den berch met vier bernen, quaemdi tot mi, ende alle die ouerste van uwen geslachte, ende douders, ende spraect,

24

Siet wi hebben gesien den HERE onsen God ende zijn heerlicheyt ende grootheyt, ende wi hebben zijn stemme van wten vier gehoort, heden hebben wi gesien dat God metten menschen spreect, ende si bliuen leuende,

25

ende nv, waerom sullen wi steruen, ende dat groot vier ons verslinden? Ist dat wi des HEREN ons Gods stemme meer hooren, so moeten wi steruen.

26

Want wat is alle vleesch, dattet soude mogen hooren die stemme des leuendigen Gods, van wten viere spreken, so wi gehoort hebben, ende leuendich blijuen

27

Gaet ghi daer toe, ende hoort al wat die HERE onse God seyt, ende segget ons, Al wat dye HERE onse God met v spreken sal, dat willen wi hooren ende doen.

28

Als de HERE die stemme uwer woorden hoorde die ghi met mi spraect, sprack hi tot mi, Ick heb gehoort die stemme van desen volcx woorden dye si met v geproken hebben. ⁺ Het is al goet wat si gesproken hebben,

+ D vers 28

29

Och oft si alsulcken hert hadden dat si mi vreesden ende dat si mijn geboden hielden haer leuen lanc, op dat hen wel gheschieden mochte, ende haren kinderen eewelijck.

30

Daerom gaet ende segt hen, gaet thuys in v tenten, Ende ghi sult hier voor mi staen,

31

ende ic sal v seggen, alle die geboden, seden ende rechten, die ghi hen leeren sult, dat si daer na doen, inden lande dat ic hen gheuen sal te besitten.

32

Daerom onthout dat ghi dat doet, so v die HERE v God geboden heeft, ende en wijct niet, noch ter rechter noch ter slincker,

33

mer wandelt alleen in die wegen die v die HERE v God geboden heeft, op dat ghi leuen moecht, ende v wel gesciede, ende lange leuen moecht, int lant dat ghi besitten sult.