Den Bybel met groter neersticheyt ghecorrigeert (Liesveltbijbel 1542)

¶ Wt die menichte der weldaden Gods, dye si ontfanghen hebben, ende wt dye oueruloedighe duechden des landts, dat si ontfanghen sullen, so verwect hijse te onderhouden die geboden Gods.

Dat .xi. Capittel

1

⁺DAeromme suldy den HEERE uwen God lief hebben, ende houden sijn seden sijn rechten ende gheboden alle v leuen lanc,

+ A vers 1

2

ende bekent heden dat welcke uwe kinderen heden niet en weten, noch ghesien en hebben, te wetene, die onderwisinge des HEREN ws Gods, sijn grote, ende ooc sijn machtige hant, ende wtgerecten arm,

3

ende sijn teekenen ende wercken die hi gedaen heeft onder den Egyptenaren, aen Pharao den coninc van Egipten, ende aen alle sijn lant,

4

Ende wat hi aender Egyptenaren macht gedaen heeft, aen haer rossen ende wagenen doen hi dat water des rooden zees ouer hen bracht, doen si v na iaechden, ende die HERE verdedese tot op desen dach.

5

Ende wat hi v ghedaen heeft in dye woestine, tot dat ghi in dese plaetse gecomen sijt

6

Wat hi Dathan ende Abirom gedaen heeft Eliabs kinderen, die Rubens soon was, hoe dat de aerde haren mont ontdede, ende verslontse met haren gesin ende tenten, ende met alle haer goeden die si hadden midden onder alle Israhel. ⁺

+ nu. xvi d.

7

⁺Vwe oogen hebben die grote wercken des HEEREN gesien die hi gedaen heeft,

+ B vers 7

8

Daerom suldy alle die geboden houden, die ic v heden gebiede, op dat ghi gesterct wert in te comen, ende dat lant in te nemen daer ghi henen reyst, dat daer ghy henen gaet

9

om dat te besitten, ende om dat ghi langhe leuen muecht in dat lant dat die HERE uwen vaderen gesworen heeft hen te gheuen, ende haren sade, een lant daer melck ende honich in vloeyt

10

Want dat lant daer ghi henen gaet, om dat te besitten en is niet gelijc Egypten lant, daer ghi wtgetrocken sijt, daer als ghi uwe saet saeyde, so moste ghijt vochtich maken, om te veruerschen, ghelijc eenen koolhof.

11

Mer het heeft berghen ende velden, die dye wateren des hemels vanden reghen vochtighen,

12

dat welcke de HERE uwe God altijt voorsiet, ende sijn oogen sijn altijt daer op, vanden beginne des iaers tot aen dat eynde.

13

Ist dat ghi mijn geboden hoort, die ic v heden gebiede, also dat ghi den HERE uwen God lief hebt ende hem dient, wt al uwer herten, ende wt al uwer sielen,

14

so sal ic in uwen lande regen geuen tot sijnder tijt, vroech ende spade, dat ghi v graen in moecht doen, uwen most ende olye,

15

ende ic sal uwen vee gras gheuen opten velde, dat ghi eten muecht, ende versaedt worden.

16

Maer wacht v, dat uwe herte nyet bedrogen en worde, ende also af wijcke, ende diene ander goden, Ende aenbiddense,

17

ende dat dan den toren des HEEREN

[p. *]

op v come, ende sluyte dan den hemel toe, datter geenen regen en come, ende dat die aerde haer groeysel nyedt en geue, ende dat ghi dan ooc haest vergaet vanden goeden lande, dat die HERE v gegeuen heeft.

18

Daeromme neemt nv dese woorden ter herten, ende in uwe siele, ende bintse tot eenen teeken in uwe handt dat si een gedincteeken sijn voor uwe ooghen,

19

ende leertse uwen kinderen, dat ghi daer af spreken sult, als ghi in uwe huys sidt, oft als ghi opten weghe gaet als ghi gaet neder liggen, oft opstaet,

20

ende scrijftse aen die posten van uwen huyse, ende aen uwe poorten,

21

op dat ghi ende uwe kinderen lange moecht leuen in dat landt dat die HEERE uwen vaderen gesworen heeft, hen te gheuen, also lange als die dagen vanden hemel opter aerden sijn sullen.

22

Want ist dat ghi dese geboden hout, die ic v gebiede, daer na doende, uwen HERE uwen God lief hebbende, ende wandelt in alle sine wegen, ende hem aenhangt,

23

so sal die HEERE al dit volck voor v henen verdrijuen, dat ghi besitten sult groter ende stercker volc, dan ghi sijt.

24

Alle plaetsen die die solen van uwen voeten sullen treden, die sullen v sijn van die woestijne aen, ende oock vanden berch Libanus, vanden watere Phrat, tot aen die wterste zee, sullen uwe palen sijn.

25

Ende nyemant en sal v mogen wederstaen, Vwe vreese ende uwen anxt, ⁺ sal die HERE laten comen, ouer alle landen daer ghi inne reyst, So hi v gheseyt heeft.

+ D vers 25

26

Siet ic stelle heden voor v oogen gebenedijnghe, ende vermaledijnghe.

27

Die gebenedijnge, ist dat ghy gehoorsaem sijt, den geboden des HEEREN ws Gods, die welcke ic v heden ghebiede,

28

Die vermaledijnge, ist dat ghi niet en sijt gehoorsaem den geboden des HEEREN ws Gods, ende ist dat ghi wijct vanden wege die ic v heden ghebiede, ende ander goden na wandelt, die ghi niet en kent.

29

Als die HEERE v God, v brengt in dat landt daer ghi in comen sult, om dat te besitten, dan suldy die gebenedijnghe stellen opten berch Grisim, ende die vermaledijnge opten berch Ebal,

30

die welcke sijn op dander side vander Iordanen, inden wege totten westenwaerts, inder Cananiten landt, die op tblack velt tegen Ghilbal ouer woonen, bi dat bosch More,

31

Want ghi sult ouer die Iordaen gaen, om in te gaen ende dat lant te besitten, dat v die HERE v God ghegeuen heeft,

32

dat ghijt besitten ende bewonen sout, daeromme wacht nv, dat ghi doet na alle die rechten ende seden, die ick v heden voorlegghe.