Den Bybel met groter neersticheyt ghecorrigeert (Liesveltbijbel 1542)

Dye Heydensche coningen wapenen haer tegen die Israeliten maer die van Gibeon ontrecken haer leuen met liste.

Dat .ix. Capittel.

1

⁺ALs nv dat hoorden alle Coningen dye op gheen side der Iordanen waren, op die geberchten, ende inden nederen lande ende aen allen hauenen der groter zee, ooc die neffens den berch Libanon waren te weten die Hethiten, Amoriten, Cananiten, Pheresiten, Heuiten, ende Iebusiten,

+ A vers 1

2

sloegen si hen eendrachtelic te hoope, dat si tegen Iosua ende tegen Israhel souden strijden.

3

Maer die inwoonders van Gibeon, doe si hoorden wat Iosua met Iericho ende Ai gedaen hadde,

4

so gebruycten si ooc eenen list, si ghinghen henen, ende maecten een bootscap, ende namen oude sacken op hare ezelen ende oude gescoorde wijnflesschen,

5

ende oude ghelapte schoenen aen hare voeten, ende trocken oude ende gelapte cleederen aen, ende allet broot haerder victaelgien was hart, ende scimmelachtich,

6

ende ginghen tot Iosua inden leger tot Gilgal, Ende spraken tot hem, ende tot alle mannen in Israel, Wi sijn wt verren lande gecomen daerom so maect doch nv een vast verbont met ons

7

Doe sprac elc in Israel totten Heuiten. Ghi moecht misschien onder ons woonen, hoe conste ic dan een verbont met v gemaken.

8

⁺Si praken tot Iosua, wi sijn uwe knechten, Iosua sprac tot hen, Wie sijt ghy, ende van waer coemt ghi?

+ B vers 8

9

Si seyden, Dijne knechten sijn wt seer verren landen ghecomen, om des namen wille, des HEREN dijns Gods, want wi hebben sijn geruchte gehoort ende alle dat hi in Egypten gedaen heeft,

10

ende al dat hi den twee coningen der Amoriten op gheen side der Iordanen gedaen heeft. Sihon den coninc te Hesbon ende Og den Coninck tot Basan, dye tot Astharoth woonde,

11

Daeromme spraken onse ouders, ende alle die inwoonders ons lants. Neemt prouande met v op die reyse, ende gaet henen hen te ghemoete, ende segghet tot hen, wi sijn v knechten. Dus maect nv een verbont met ons.

12

Dit is onse broot, dat wi wt onsen huysen tot onsen voetsele namen, twas noch versch doen wi wt trocken tot v, maer nv, siet, ist hart ende schimmelachtich.

13

Ende dese wijnflesschen vulden wi nyeu, ende siet si sijn geschoort. Ende dese onse cleederen ende schoenen sijn out geworden ouer dye alte langhen reyse.

14

⁺Doen namen die hooftlieden hare prouanden, ende en vraechden den mont des HEREN niet. ⁺

+ C vers 14

+ i.re. xiij.a

15

Ende Iosua maecte vrede met hen, ende maecte een verbondt met hen, dat si leuende souden blijuen, ende dye ouerste der gemeynten swoeren hen,

16

Mer ouer drie dagen na dien si een verbondt met hen ghemaect hadden, so quamt voor hen, datse van daer bi waren, ende souden onder hen woonen,

17

Want doen dye kinderen van Israel voort trocken, quamen si opten derden dach, tot haer steden, die hieten Gibeon, Caphira, Beroth, ende Kiriath Iearim,

18

ende en sloechse niet, om dat hen die ouerste der gemeynten gesworen hadden, bi den HERE den God Israel.

19

Doen alle die gemeynte tegen die ouerste morden oft murmureerden, soo spraken alle die ouerste der geheelder gemeynten, wy hebben hen ghesworen biden HERE den God Israel, daerom en moghen wise niet aentasten.

20

Mer dat willen wi hen doen. Laetse leuen, op dat gheen gramscap ouer ons en come, om des eedts wille, dien wi hen ghedaen hebben.

21

Ende die ouerste spraken tot hen, Laetse leuen, dat si houdthouders, ende waterdragers sijn der geheelder ghemeynten, so hen die ouersten gheseyt hebben.

22

Doen riepse Iosua, ende sprac met hen, segghende, ⁺ Waerom hebdy ons bedroghen, ende gheseyt, ghy sijt seer verde van ons, daer ghi doch onder ons woont?

+ D vers 22

23

daerom sult ghi veruloect sijn, also dat van v niet op houden en sullen, knechten die hout houden ende water dragen, totten huyse mijns Gods.

24

Si antwoorden Iosua, ende spraken, het is uwen knechten te kennen gegheuen, dat dye HERE dijne God Mose sinen knecht geboden heeft, dat hi alle

[p. *]

dat geheele lant gheuen wille, ende voor v henen alle inwoonders des lants vernielen wille, doen vreesden wi onse sielen seer voor v ende hebben dit gedaen,

25

Mer nv siet, wi sijn in uwen handen, wat v goet ende recht dunct ons te doen, dat doet.

26

Ende hi dede hen also, ende verlostese vander kinderen van Israels handt, dat sise niet en dooden.

27

Aldus maectese Iosua inden seluen dage tot houthouders, ende waterdragers der ghemeynten, ende totten outaer des HEREN, tot desen dage toe, in die plaetse dye hi verkiesen soude.