Den Bybel met groter neersticheyt ghecorrigeert (Liesveltbijbel 1542)

Die stadt Ai wort ingenomen, ende die borghers worden al verslaghen. Ende die Coninc leuendich geuangen, ende gehangen, dye stadt wort verbernt, Iosua meact den HERE eenen outaer opten berch Ebal, die seegeningen ende vermaledidingen worden gelesen ghelijck als bouen Deuterenomij int .xxvij. gheseyt is

Dat .viij. Capittel.

1

⁺ENde die HERE sprack tot Iosua, en vreest noch en versaget niet Neemt met v alle oorloochs volc, ende maect v op, ende trect op tot Ai, Siet daer, ic hebbe den coninc Ai, met sinen volcke ende sijnder stat ende lande, in uwen handen gegeuen,

+ A vers 1

2

ende sult met Ai haren coninc doen also ghi met Iericho, ende haren coninck gedaen hebt, wtgenomen, dat ghi haren roof ende haer vee onder v deelen sult, mer bestellet een achterhoedinge, oft legt lagen achter die stadt.

3

⁺Doen maecte hem Iosua op, ende alle crijsch volc op te trecken tot Ai, ende Iosua vercoos dertich duysent strijtbaer mannen ende santse wt bider nacht

+ B vers 3

4

ende geboot hen ende sprac. Siet toe, ghi sult lagen leggen achter die stadt, maer en maect v niet alte verre vander stadt ende sijt al tsamen bereet.

5

Ic ende alle tvolc dat met mi is sullen ons ter stadt maken, ende als si tegen ons wt comen gelijc te voren, so willen wi vluchten,

6

op dat si ons daer wt na volgen, tot dat wise daer wt vander stadt trecken. Want si sullen wanen dat wi voor hen vlyen, so wi te voren deden. Ende als wi voor hen vlien

7

so sult ghi v opmaken wt der lagen oft achterhoedinghe, ende die stat in nemen, Want die HERE v God salse in uwen handen geuen.

8

Mer als ghi die stadt ingenomen hebt, so steectse aen met vier, na den woorde des HEEREN doet, Siet ic hebt v geboden.

9

Also santse Iosua wech, ende si gingen henen totter plaetsen der lagen, ende hielden tusschen BethEl ende Ai, tegen twesten waert aen Ai

10

Mer Iosua bleef dien nacht onder dat volc, ende maecte hem smorgens vroech op, ende ordineerde dat volc, ⁺ ende troc opwaerts metten Ouden van Israel, voor dat volc henen tot Ai,

+ C vers 10

11

ende allet crijsch volc dat bi hem was, troc opwaerts, ende si gingen toe, ende quamen tegen die stadt, ende maecten haren leger tegent noorden voor Ai, also datter mer een dal en was tusschen hen ende Ai,

12

Hi had vijf duysent mannen genomen, ende in die lagen gestelt tusscen BethEl ende Ai, westwaert ter stadt,

13

ende si stelden dat volc des heelen legers, dat tegent noorden der stadt was, also dat het laetste reycte tegent westen der stadt, Also ginc Iosua henen inder seluer nacht midden int dal.

14

Als die Coninc van Ai dat sach, haesteden si, ende maecten hen vroech op, ende die mannen der stadt gingen wt, om Israel ten strijde teghen te gane, met al haren volcke, recht voor dat velt. Want hi en wist niet dat hem lagen gestelt waren achter die stadt,

15

Iosua ende alle dat volc werden madt ende crachteloos voor hen, ende vloden opten wech der woestinen.

16

Doen riep alle dat volc inder stadt datmen hen nae soude iaghen, ende si iaechden Iosua oock na, ⁺ ende si rechten hen seluen buyten vander stadt,

+ D vers 16

17

also datter niet een man binnen BethEl ende Ai en en bleef, die niet wt en trock om Israel na te iagen, ende lieten die stadt open staen, op dat si Israel na souden iagen.

18

Doen sprac die HERE tot Iosua, recht die lancie wt, die ghi in v hant hebt tegen Ai, want ic wilse in uwen handen geuen, Ende doen Iosua die lancie teghen die stadt wtrechte, die in sijn handt was,

19

doen brack die achterhoedinge oft laghe haestelic op, wt haerder plaetsen, ende liepen na dien dat hi zijn hant wt rechte, ende si quamen in die stat ende wonnense, ende haesten ende stakense met vier aen,

20

ende die mannen van Ai keerden hen ende sagen achter hen den rooc der stadt opgaen ten hemel toe,

[p. *]

ende si en hadden geen ruymte te vlyen, noch herwaerts noch derwaerts, ⁺ ende dat volc dat totter woestijnen vluchtede, keerde hem om, om hem na te iaghen.

+ E vers 20

21

Ende doen Iosua ende dat gantse Israel sach dat die lage die stadt gewonnen hadde, want den roock der stadt opginc, so keerden si wederom, ende sloegen die mannen van Ai.

22

Ende die in die stadt waren quamen ooc wt, hen teghen, also dat si midden onder Israhel quamen, van derwaerts, ende herwaert, ende sloegense tot datter nyemant onder hen ouer en bleef, noch en ontquam

23

ende grepen den coninc Ai leuende ende brachten hem tot Iosua,

24

Ende doen Israel alle die inwoonders tot Ai verworcht hadden, opten velde, ende dye hen na geiaecht hadden inder woestijnen, si vielen alle in dye scherpte des swaerts, tot dat si al vernielt waren. Doen keerde hen alle Israel tot Ai, ende sloegense metter scerpten des swaerts,

25

Ende alle die op dien dach vielen, van mannen totten wijuen toe, die waren twaelf duysent, altemael mannen van Ai.

26

⁺Iosua en track sijn hant niet weder af, daer mede hi die lancie wtrechte, tot dat alle dye inwoonders Ai verbannen worden,

+ F vers 26

27

sonder dat vee, ende den roof der stadt deelde Israel wt onder hen na den woorde des HEEREN, dat hi Iosua geboden hadde,

28

Ende Iosua verbernde Ai wt, ende maecter eenen eewigen hoope af die noch heden daer is.

29

Ende liet den Coninc Ai aen eenen boom hangen, tot tsauonts toe, Mer doen de zonne onder was gegaen, doen geboot hi, datmen sinen lichame vanden boom doen soude, ende worpen hen onder de statpoorten, ende maectender eenen grooten steenhoope op hem, die tot desen dage toe daer is.

30

Doen stichte Iosua den HERE, den God Israel eenen outaer opten berch Ebal,

31

so Mose die knecht des HEREN geboden hadde den kinderen Israel also in dat boec der wet Mose gescreuen staet, ⁺ eenen outaer van geheelen steenen, daer ouer men met geenen yseren en quam, ende offerde den HEERE daer op, brantoffer ende dootoffer,

+ ex. xx.d. deu. xx.a

32

ende screef aldaer op de steenen die ander wet Moyse, die hi voor die kinderen van Israel screef.

33

Ende alle Israel, met sinen ouders, ende officiers knechten, ende rechteren, stonden tot beyde siden der arcken, tegen den priesteren wt Leui, die die arcke des verbonts des HEREN droeghen, die vreemdelingen also wel als die ingeseten, haer helfte neffens den berch Grisim, ende dander helft neffens den berch Ebal, so Mose die knecht des HEREN te voren geboden hadde, te seegenen dat volc Israel.

34

Daer nae liet hi wtroepen alle die woorden der wet, vanden segenen ende vloecken, so het gescreuen staet inden wetboec.

35

Daer en was gheen woort dat Mose geboden hadde, dat Iosua niet wt en hadde laten roepen, voor die geheele gemeynte Israel ende voor die wijuen, ende voor die kinderen, ende vreemdelinghen die onder hen wandelden.