Den Bybel met groter neersticheyt ghecorrigeert (Liesveltbijbel 1542)

Hier wordt verhaelt die wtdeylinghe des lants, Ende oock wat Caleb voor een man wort, bouen alle die andere.

Dat .xiiij. Capittel

1

⁺DIt ist dat dye kinderen Israhel beerft hebben inden lande Canaan, dat onder hen wtgedeelt hebben, dye priester Eleazar, ende Iosua die sone Nun, ende die ouerste vaders onder den stammen der kinderen Israel,

+ A vers 1

2

Si deelden door tlodt onder hen so die HERE Mose gheboden hadde te gheuen, den neghen ende haluen stammen,

3

Want den tween, ende den haluen stam hadde Mose erfdeele gegeuen op gheen side der Iordanen, Maer den Leuiten hadde hi gheen erfdeel ghegeuen onder hen,

4

want die kinderen Iosephs worden twee stammen, Manasse ende Ephraim, Daeromme en gauen si den Leuiten geen deele inden lande, mer steden daer inne te woonen, ende voorsteden voor haer vee ende goeden,

5

so die HERE Mose gheboden hadde, soo deden die kinderen Israel, ende deelden dat lant.

6

Doe ginghen die kinderen Iuda, tot Iosua, tot Gilgal, ende Caleb die sone Iephune, dye Knisite, sprac tot hem, Ghi weet wat die HERE tot Mose den man Gods seyde, ⁺ van mijnen ende uwen weghe in KadesBarnea, ⁺

+ B vers 6

+ nu. xiiij d

7

Ic was veertich iaer out, doen mi Mose die knecht des HEREN wtseynde van KadesBarnea om dat lant te bespieden, ende ic seide hem weder so ict in mijn herte hadde,

8

Mer mijne broeders die met mi opwaerts gegaen waren, maecten den volcke dat herte versaget, mer ick volchde den HERE mijnen God volcomelijck na.

9

⁺Doen swoer mi Mose inden seluen daghe ende sprack Dat lant daer ghi met uwen voet terdet, sal uwe ende uwen kinderen erfdeele eewelijck sijn, daerom dat ghi den HERE mijnen God, volcomelijc nageuolcht hebt,

+ C vers 9

10

ende nv die HERE heeft mi laten leuen, so hi ghesproken heeft. Het sijn nv vijuenueertich iaren, dat die HERE tot Mose seyde doen Israel in die woestijne wandelde,

11

ende nv siet, Ic ben heden vijuentachtentich iaer out, ende ben noch heden inden dage soo sterck, als ic was inden daghe doen mi Mose wtseynde, Gelijc mijn cracht doen was, also is si nv ooc te strijden, ende wt ende inne te gaen.

12

Dus gheeft mi nv dit gheberchte, daer die HERE af ghesproken heeft, in dien dage, want ghi hebt gehoort inden seluen dage, want dye Enakim woonen daer bouen, ende zijn groote ende vaste steden, oft die HERE met mi sijn wilde, dat icse bederue, soo dye HERE ghesproken heeft.

13

Doe seeghende hem Iosua, ende ghaf alsoo Hebron Caleb den sone Iephune tot een erfdeel,

14

daer wert Hebron, Calebs des soons Iephune, des Knisiters erfdeel, tot op desen dach, daerom dat hi den HERE den God Israels volcomelijcken nagheuolcht hadde,

15

Maer Hebron hiet voortijts KiriathArba, ende aldaer waren groote lieden onder Enakim, ende dat lant heeft opgehouden van oorloghe.