Den Bybel met groter neersticheyt ghecorrigeert (Liesveltbijbel 1542)

¶ Dit zijn die volcken die God ouerblijuen laet, om Israel te oeffenen, ende te proeuen, met den welcken Israel houwelijcken maect, ende daer door den HERE vertoornt, waeromme hijse straffet, maer so dicwils als si tot hem roepen, so verlost hijse wonderlijcken.

Dat .iij. Capittel.

1

⁺DIt zijn die volcken, die die HERE liet blijuen, dat hi Israel aen hen soude proeuen, die vanden oorloghe Canaan nyet en wisten,

+ A vers 1

2

Alleen daerom, dat die gheslachten der kinderen Israel souden weten, ende leeren strijden, dye te voren daer af niet en wisten,

3

Te weten, dye vijf heeren der Philisteen, ende alle Cananiten, ende Zidoniten, ende Hethiten dye aenden berch Libanon woonden vanden berghe BaalHermon aen, tot datmen coemt te Hemath,

4

Die selue bleuen, om Israel daer aen te proeuen, datmen onderuonde, oft si den gebode des HEERE ghehoor gheuen, die hi haren vaderen gheboden hadde door Mose.

5

Doen die kinderen Israel also woonden onder dye Cananiten, Hethiten, Amoriten, Pheresiten, Heuiten, ende Iebusiten,

6

so namen si van haren dochteren tot wijuen, ende gauen hare dochteren der gheenre sonen, ende dienden der gheenre afgoden,

7

ende deden quaet voor den HERE, ende verghaten haers HEREN haers Gods, ende dienden Baalim, ende Aseroth. ⁺

+ Athniel was die derde richter, In deser tijt was Saturnus Iupiters vader, al soomen seydt, ende was wt dat Eylant van Creten, in Italien aldaer hi regneerde, Hy was die eerste die tlandt vedt makede met mest, daer af hietmen hem stercutus, ende dye Romeynen hieten aldaer af, stercoriani, dye werelt had ghestaen drie .M acht .C. iaer, ende xxv. voor cristus gheboorte M.ccc. ende .lxxiiij. Troys regneerde in Dardanim, ende hy stichte dye stadt van Troyen dat rijck der griecken verginc, ende slabacte wat

8

Doen verbolch die gramschap des HEREN ouer Israel, ende vercochtse onder die handen Chusan Risathaim, den coninck tot Mesopotamia, ende die kinderen van Israel dienden also Cusan Risathaim, acht iaer.

9

Doen riepen die kinderen van Israel totten HERE ende die HERE verwecte hen eenen salichmaker, diese verloste Athniel, die sone Knas, Calebs ioncsten broeders,

10

ende den gheest des HEREN quam ouer hem, ende wert rechter in Israel, ende trock wt totten strijde, ende die HERE ghaf den Coninck tot Sirien Cusan Risathaim, in sine handen, also dat sine hant ouer hem te sterck wert.

11

Doen was dat lant veertich iaren stille, ende Athniel die sone Knas sterf.

12

⁺Maer die kinderen Israel deden noch voort quaet voor den HERE, Doen stercte dye HERE Eglon den Coninck der Moabiten, tegen die kinderen van Israel, om dat si quaet deden teghen den HERE,

+ B vers 12

13

ende vergaderde die kinderen Ammon, ende dye Amalekiten, ende hi trock henen, ende sloech Israel, ende nam die palm stadt in,

14

ende die kinderen Israhel dienden Eglon der

[p. *]

Moabiten coninck, achtien iaren.

15

Doen riepen si totten HERE, ende die HERE verwecte hen eenen salichmaker Ehud, den soon Gera, des soons Iemini, die was een man die sijn slincker hant gebruycte, gelijc sine rechter hant.

Ende doen die kinderen Israel, door den seluen, gauen sonden aen Eglon, der Moabiten coninc,

16

soo maecte hem Ehud eenen tweesnijdenden stootdeegen, eenen spanne lanc, ende gorden onder sijn cleedt, op sijnder rechter dgien,

17

ende bracht die ghiften Eglon der Moabiten Coninck.

18

Eglon was een seer vet man, ende doe hi die ghifte ouer hadde gheleuert, so liet hi dat volc, die die ghifte gedragen hadden, ende keerde om vanden goden tot Gilgal, ende dede hem seggen

19

Ic hebbe, ⁺ O Coninck, v wat heymelicx te seggen, Ende hi hiet swijgen, ende si ghinghen wt van hem alle die om hem stonden

+ C vers 19

20

Ende Ehud quam tot hem in, Hi sadt in dat ghetafelde somerhuys, dat voor hem alleen was, Ende Ehud sprac, Ic heb v wat van Gode te segghen.

21

Doen stont hi op van sinen stoel, Ehud stac sijn slincke hant wt, ende nam den stootdeeghen van sijnder rechter dgien, ende stieten hem in sinen buycke,

22

also dat ooc den hecht, den yser na daer in volchde, ende dattet vette den hecht besloot, want hi en trac den deegen wt sinen buycke niet, also dat den drec van hem ghinc,

23

Maer Ehud ghinc ter achter dueren wt, ende dede die duere achter hem toe, ende slootse

24

⁺Doen hi wt was, so quamen sine knechten in, ende sagen dat die duere des somerhoofs ghesloten was ende spraken, hi is misschien ten stoel ghegaen, inden ghetafelden somerhuyse.

+ D vers 24

25

Maer doen si so langhe wachteden, tot dat si hen schaemden, Want niemant en dede die duere der looueren open, ⁺ si namen den sluetel ende dedense op, Siet, doen lach haer here opter aerden doot,

+ Ehud die vierde richter.

26

Ehud was ontloopen die wijle dat si vertoefden, ende ginc voorbi die afgoden, ende vluchte tot Seriath toe

27

Ende doen hi daer in quam, so blies hi die basuyne opt geberchte Ephraim, ende die kinderen Ephraim trocken met hem vanden geberchte, ende hi voer hen henen,

28

ende hi sprac tot hen, Volget mi nae, Want dye HERE heeft v die Moabiten, uwe vianden, in dinen handen gegeuen, Ende si iaechden hen na, ende si vercreghen die hauen aen die Iordane in, die tot Moab gaet, ende en lietender niemant ouer gaen,

29

ende sloeghen die Moabiten, in dier tijt, bi thien duysent mannen, also datter niet een en ontquam

30

Aldus worden die Moabiten in die tijt onder die handen der kinderen van Israel vernedert, ende dat lant was tachtentich iaer stille. ⁺

+ Sangar die vyfste richter.

31

Daer na was Samgar die sone Anat, die sloech ses hondert Philisteen, met eenen ossen stoc, ende verloste Israel oock