Den Bybel met groter neersticheyt ghecorrigeert (Liesveltbijbel 1542)

Debora die prophetersse met Barack verwint Sisseram, ende verlost dat volck des HEREN

Dat .iiij. Capittel.

1

⁺MAer die kinderen Israel deden voorts quaet voor den HERE, doen Ehud, ghestoruen was,

+ A vers 1

2

Ende die HERE, vercochtse in die handen Iabin, der Cananiten Coninc, ⁺ die tot Hazor sadt, ende sijn velthooftman was Sissera, ende hi woonde tot Haroseth der heydenen.

+ i.re. ij.a. Erictonius een Prince van Athenen maecte in Griecken den eersten waghen.

3

Ende die kinderen Israels riepen totten HERE, Want hi had .ix.C. ijseren wagens, ende dwanc die kinderen Israel met gewelt .xx. iaer

4

Tot dier tijt was rechtersse in Israel die Prophe-tersse Debora, een huysurouwe Lapidoths,

5

ende si woonde onder die palmen Debora, tusschen Rama ende BethEl, opt gheberchte Ephraim, ende die kinderen Israel quamen voor haer op int geberchte. ⁺

+ Debora prophetersse rechtet in Israel dye seste

6

Die selue seynde henen, ende liet roepen Barac, den sone AbiNoan, van Kedes Naphtali, ende dede hem seggen

En heeft v die HERE, die God Israel niet geboden, gaet henen ende trect opten berch Thabor, ende neemt thien duysent mannen met v, vanden kinderen Naphtali ende Sebulon, ⁺

+ Den oorspronck der strijden van Troyen begonst hier voor cristus gheboorte, M.ccc. ende xxiiij inden ouderdom der werelt, drie.M. acht.C.ende .lxxv iaer.

7

Want ic wil Sissera den velthooftman Iabin, tot v trecken, aen dat water Kison met sinen waghens, ende met sijnder menichte, ende wil hem in uwen handen gheuen.

8

Barack sprac tot haer. ⁺ Ist dat ghi met mi trect, so wil ic trecken, mer en trect ghi met mi niet, so en wil ic niet trecken

+ B vers 8

9

Si sprac, Ic wil met v trecken, mer den prijs en sal v niet sijn op dese reyse, die ghi doet, mer die HEERE sal Sissera in eens wijfs hant ouergeuen. Aldus maecte haer Debora op, ende trock met Barac tot Kedes.

10

Doen riep Barac Sebulon ende Naphtali tot Kedes, ende troc te voete met thien duysent mannen, Debora reysde ooc met hem.

11

Heber die Keniter was vanden Keniten, Vanden kinderen Hobab Mose swager getroken, ende hadde sine tenten op geslagen, bi die eycke Zaanaim neffens Kedes

12

Doen wert Sissera te kennen ghegheuen, dat Barac die sone AbiNoan, opten berch Thabor getrocken ware,

13

ende hi riep alle sine wagenen tsamen .ix.C. ijseren wagenen, ende alle dat volc dat met hem was, van Harozeth der heydenen, aen dat water Kison,

14

Debora sprac tot Barac. Op, dit is den dach in welcken v die HERE Sissera in uwen handen heeft ghegeuen, want die HERE sal voor v wtreysen. ⁺ Aldus troc Barac vanden berghe Thabor, ende die thien duysent mannen hem na.

+ Sibille delphica propheteerde in dese tijdt, wat tijdts voor den strijdt van Troyen, Hoe dat dye soone Goods, mensche soude worden voor cristus gheboorte M.iij. iaer

15

Mer die HERE maecte grouwel oft veruaerde Sissera, met alle sine wagens ende heyr, ende verscrictese voor die scerpte des sweerts, voor Barac, ⁺ Also dat Sissera van sinen wagen spranc, ende vluchte te voete,

+ C vers 15

16

Barac iaechde die wagens na, ende den heyr tot Harozeth der heydenen toe, ende alle theyr Sissera viel inder scerpten des sweerts, Also datter niet een ouer en bleef,

17

Mer Sissera vluchte te voete in die tente Iael, des wijfs Heber des Keniters, want die coninc Iabin tot Hazor, ende dat huys Heber des Keniters stonden met malcanderen in vrede

18

Iael ghinc wt Sissera te gemoete, ende seyde tot hem, wijct mijn here, wijct tot mi, en vreest niet, ende hi weec tot haer in, in haer tente, ende si decte hem met eenen mantel

19

Hi sprac tot haer, Lieue geeft mi een weynich waters te drincken, want mi dorstet, Doen dede si open eenen melcpot, ende ghaf hem te drincken, ende decte hem Ende hi sprac tot haer,

20

Gaet inder tenten duere, ⁺ ende als yemant coemt, ende vraecht oft yemant hier is, so segt, Nyemant

+ D vers 20

21

Doen nam Iael dat wijf Heber eenen nagel vander tenten, ende eenen hamer in haer hant, ende ginc lijfelijck oft heymelic tot hem in, ende sloech hem den nagel door tslaep van sinen hoofde, alsoo dat hi ter aerden sanc Hi ontslumerde, ende wert amachtich ende sterf.

22

Doen Barack Sissera na iaechde, so ginc hem Iael te gemoete daer wt, ende sprac tot hem. Coemt hier ic wil v den man thoonen dien ghi soect, ende doen hi tot haer in quam, lach Sissera doot, ende die naghel stac in sinen slaep.

23

Also vernederde God op die tijt

[p. *]

Iabin der Cananiten Coninc, voor die kinderen Israel,

24

ende die hant der kinderen Israel ginc ende verdructe Iabin der Cananiten Coninc, tot dat si hem wtroeyden,

25

doen sanc Debora ende Barack dye sone AbiNoam in die tijt, ende seyden