Den Bybel met groter neersticheyt ghecorrigeert (Liesveltbijbel 1542)

Die Ephraimiten heffen haer ooghen op tegen Iephthah ende worden verslagen.

Dat .xij. Capittel.

[afbeelding]

1

⁺ENde die van Ephraim riepen ende gingen ten Noorden waert, ende spraken tot Iephthah. Waerom sidi inden strijdt getrocken tegen die kinderen Amon, ende en hebt ons niet geroepen, dat wi met v hadden ghetrocken? wi willen v huys met v metten vier verbernen. ⁺

+ A vers 1

+ Nicostratade heeft in deser tijt eerst dye latijnsche letteren geuonden

2

Iephthah sprac tot hen? Ic ende mijn volc hadden een grote sake teghen die kinderen Amon, ende ic riep v aen, maer ghi en hilpt mi niet wt haren handen,

3

Doen ic sach datter geen salichmaker en was so stelde ic mijn siele in mijn hant, ende trock wech tegen die kinderen Amon, ende die HERE gafse in mijn hant, waeromme coemt ghi tot mi op, om tegen my te strijden?

4

⁺Ende Iephthah vergaderde alle mannen in Gilead, ende street tegen Ephraim, ende die mannen in Gilead sloegen Ephraim, daerom datse seyden, Ghi Giliaditen sijt als veltuluchtige voor Ephraim, onder Ephraim ende Manasse,

+ B vers 4

5

Ende die Gileaditen namen in, die hauen der Iordanen, voor Ephraim. Als dan die veldtvluchtige Ephraiten spraken, Laet mi door gaen, so seyden die mannen van Gilead. Sidi een Ephraite? Als si antwoorden neen, so deden si hem spreken, Schiboleth

6

ende hi sprac Siboleth, ende en conste hijt niet te recht geseggen, so grepen si hem ende sloeghen hem aen die hauen der Iordanen, also dat tot dier tijt van Ephraim .xlij duysent vielen.

7

Iephthah oordeelde Israel ses iaren Ende Iephthah die Giliadite sterf, ende wert begrauen onder die steden tot Gilead.

8

⁺Na desen oordeelde Israel, ⁺ Ebzan van Bethlahem,

+ C vers 8

+ Ebzan die .xiij. richter

9

die hadde dertich sonen, ende dertich dochteren sette hi wt, ende dertich dochteren nam hi van buyten sinen sonen,

10

ende oordeelde Israhel seuen iaer, ende sterf, ⁺ ende wert begrauen tot Bethlahem.

+ D vers 10

11

Na desen oordelde Israel Elon, ⁺ een Sebulonijt ende oordelde Israel thien iaer ende sterf,

+ Elon die .xiiij richter

12

ende wert begrauen tot Aialon, inden lande Sebulon

13

Na desen oordelde Israel Abdon een soon Hillel, ⁺ een Pirgathonijt,

+ Abdon dye .xv. richter

14

die hadde veertich sonen, ende dertich neuen, die op tseuentich ezel vuelens rijden, ende oordelde Israel acht iaer,

15

ende sterf, ende wert begrauen tot Pirgathon, inden lande Ephraim, opten gheberchten der Amalekiten.