Den Bybel met groter neersticheyt ghecorrigeert (Liesveltbijbel 1542)

Dauid dwinghet die Philistijnen, ende die andere omliggende natien.

Dat .viij. Capittel

1

⁺ENde het geuiel daer na dat Dauid die Philisteen sloech, ende cranctese, ende nam den diensttoome vander Philisteen hant.

+ A vers 1

2

Hi sloech die Moabiten ooc also neder, dat hi twee deelen totter doot bracht, ende een deel bi den leuene liet, Also worden die Moabiten Dauiden onderdanich, dat si hem giften toe droegen.

3

⁺Dauid sloech oock HadadEzer den soon Rehob, coninc tot Soba, dat hi henen trock om sine macht weder te halen aenden water Phrath,

+ B vers 3

4

Ende Dauid vinc wt hen duysent ende seuen hondert ruyters. ende .xx. dusent voet volc, ende verleemde alle waghens ende behielt hondert wagens ouer?

5

Mer die Siriers van Damasco quamen te hulpen, HadadEser, den coninc tot Soba, Ende Dauid sloech der Siriers tweentwintich dusent mannen

6

ende leide volc tot Damasco in Siria, Also wert Siria Dauid onderdanich dat si hem giften toe droegen, Want die HERE halp Dauid werwaerts hi troc.

7

Ende Dauid nam die gulden schilden die HadadEzers knechten toebehoorden ende brachtse te Ierusalem,

8

Mer van Betha ende Berothai den steden HadadEser, nam die coninc Dauid seer veel metaels.

9

⁺Mer doen Thoi die coninc te Hemath hoorde dat Dauid alle macht des HadadEzers hadde geslagen

+ C vers 9

10

seynde hi Ioram sinen soon tot Dauid, om hem vriendelic te grueten, ende om hem te seegenen, dat hi tegen HadadEser gestreden ende hem geslagen hadde, wandt Thoi hadde eenen strijt tegen HadadEser, Ende hy hadde met hem silueren, guldenen, ende eerene cleynodien.

11

Welcke die coninck Dauid den HEERE ooc

[p. *]

heylichden met den siluere ende goude dat hy den HERE heylichde van allen heydenen die hi onder hem bracht

12

van Sirien ende Moab, vanden kinderen Ammon, vanden Philisteen, van Amalek, vanden roof HadadEser den soon Rehob coninc te Zoba.

13

Ooc maecte hem Dauid eenen name, doen hy weder quam, ende die Siriers sloegen int sout dal .xvij. dusent Ende hi leyde volc in alle Edumea,

14

ende geheele Edom was Dauiden onderworpen, want dye HERE halp Dauid waer hi henen troc. ⁺ Also was Dauid coninc ouer geheel Israel,

+ D vers 14

15

Ende hi dede recht ende gherechticheit alle den volcke Ioab die soon SeruIa was ouer dat heyr.

16

Mer Iosaphat die soon Ahilud, ⁺ was Cancellier,

+ Scriba oft schrijuer, biden Ioden was die gene dye de scrifte den volck leerde als Esd. vij.a

17

Sadok die soon Ahitob ende Abimelech de sone AbIathar waren priesters. Seraia was schrijuer

18

Benaia die soon Ioiada ende Chreti, ende Pleti, die sonen Dauid waren priesters.