Den Bybel met groter neersticheyt ghecorrigeert (Liesveltbijbel 1542)

¶ Ioab straft den Coninck om dat hi truerich was, den stamme Israels vliet elc in sijn tente, den stamme Iuda blijft aen Dauiden, Semei vint genade, des gelijcx ooc Mephiboseth, Barsiilai bewijst den Coninck Dauiden veel vrientschappen

Dat .xix. Capittel

1

⁺ENde het wert Ioab gebootscapt, Siet die Coninck weent ende draecht rouwe ouer Absalon,

+ A vers 1

2

ende wt der victorien dyes daechs, wert eenen rouwe onder al dat volc, Doen dat volc gehoort hadde in dyen dage, dat hem die Coninc om sinen sone becommerde,

3

ende dat volc onstal, ofte verstac hem wech op dyen dach, dat het in die stadt niet en quam, gelijc hem een volc versteect dat tot scanden geworden is, alst inder strijt geulucht is,

4

Die Coninc hadde sijn aensicht bedect, ende riep luyde, Och mijn soon Absalon, Absalon mijn sone mijn sone

5

Ioab quam totten Coninc in huys ende sprack, ⁺ Ghi hebt heden alle uwe knechten beschaemt, dye heden uwe, ende uwe sonen ende uwe dochteren, uwer wiuen, ende uwer concubinen sielen behouden oft gesalueert hebben,

+ B vers 5

6

om dat ghi lief hebbet die v haten ende hatet die v lief hebben. Want ghi laet v heden mercken, dat v niet en leyt aen die hooftlieden, noch aen die knechten, want ic mercke heden wel, waer dat Absalon v mer en leefde, ende wi alle doot waren, dat dochte v recht sijn

7

Dus maect v nv op, ende gaet wt ende spreect met uwen knechten vriendelijc? Wandt ic sweere v bi den HEERE, en ghaet ghi niet wt, daer en sal gheen man desen nacht ouer v blijuen, dat sal v arger sijn dan allet quaet dat ouer v ghecomen is, van uwer ioncheyt op, tot nv toe.

8

Doen maecte hem die Coninc op, ende sadt in die poorte. Ende men seyt allen den volcke, Siet, die Coninc sidt in die poorte. Doen quam allet volc voor den Coninc, Maer Israel was geulucht, elc in sijn tente.

9

⁺Ende allet volc in allen stammen Israel twisteden ende spraken. Die Coninc heeft ons verlost vander hant onser vyanden, ende verloste ons vander Philisteen hant ende heeft wt den lande moeten vluchten, voor Absalon

+ C vers 9

10

Dus is Absalon gestoruen inden strijdt, dyen wy ouer ons gesalft hadden, waerom sijt ghi nv so stille dat ghi den coninc niet weder en haelt?

11

Die coninck eynde tot Sadok ende AbIathar den priesteren, ⁺ ende dede hen seggen, Spreect metten Ouders Iuda, ende segt, waerom wilde ghi die leste sijn, den coninc weder te halen in zijn huys (want die redene alles Israels was voor den coninc comen, in sijn huys)

+ ij.re. ij.d.

12

ghi sijt mijn broeders, mijn been ende mijn vleesch, waerom wildi ghi dan die leste sijn den coninc weder te halen

13

Ende segt tot Amasa, en sijt ghi niet mijn been ende mijn vleesch? God doe mi dit ende dat, waer ghi niet velthooftlieden en sult sijn voor mi v leefdage lanck in Ioabs stede.

14

Ende hi neychde dat hert alle der mannen Iuda als eens mans, ende si seynden henen totten coninc Coemt weder ghi, ende alle v knechten.

15

Alsoe quam dye coninc weder, Ende doen hi aen die Iordane quam, soe waren die mannen Iuda tot Gilgal gecomen, om af te trecken, ⁺ den coninc te gemoete, dat si den coninc ouer die Iordane souden leyden,

+ D vers 15

16

Ende Semei dye sone Gera, des soons Iemini, die tot Bahurim woonde, haestede hem, ende trock metten mannen Iuda af, den coninck Dauid te ghemoete,

17

ende daer waren dusent mannen met hem, van BenIamin, daer toe ooc Siba, die knape wt den huyse Saul met sinen vijfthien sonen ende twintich knechten, ende spoeden hen door die Iordane voor den Coninc wech,

18

ende merckten dat

[p. *]

heyr bereet, dat si dat gesin des conincx ouer souden voeren, ende doen dat hem behaechde

Semei die sone Gera viel voor den coninc neder doen hi ouer die Iordane voer,

19

ende sprac totten Coninc. Mijn heere en rekent mi die misdaet niet toe ende en gedenct niet dat v knecht v lijden aen dede, in dyen dage, Doen mijn here die coninc wt Ierusalem ginc, ende die coninc en neme dat niet ter herten,

20

want v knecht bekent dat ic gesondicht hebbe, ende siet. Ic ben heden die eerste gecomen, onder den geheelen huyse Iosephs, dat ic mijnen here den coninc te gemoet af troc

21

⁺Mer Abisai die sone SeruIa, antwoorde ende sprac. En soude Semei daeromme niet steruen daer hi doch den gesalfden des HEREN geuloect heeft

+ E vers 21

22

Dauid sprac. Wat heb ic met v heden te doen ghi kinderen SeruIa, dat ghi mi heden tot Sathan wilt worden? Soude heden yemant steruen in Israel? Meynt ghi dat ic niet en weet dat ic heden een coninc geworden ben ouer Israel?

23

Ende die coninc sprac tot Semei, ghi en sult niet steruen ende die coninc swoer hem

24

Mephiboseth die soon Saul quam ooc af, den coninc te gemoete. Ende hi en had sine voeten noch sinen baert niet scoon ghemaeckt, ende sine cleederen niet ghewasscen, van dyen daghe aen, doen die Coninc wech gegaen was, totten dage toe, dat hy met vrede quam.

25

Als hi nv tot Ierusalem quam, om den Coninc te gemoete te gaen, so sprac die coninck tot hem. Waerom en sijt ghi niedt met mi ghetrocken MephiBoseth? Ende hi sprac,

26

Mijn Heere coninck mijnen knecht die heuet zeer onrechtelic met mi geleeft, Want v knecht dacht ick wil eenen ezel saylen, ende daer op rijden, ende totten coninck trecken, want v knecht is lam,

27

Daer toe heeft hi uwen knecht ouer gedraghen voor mijnen heere den Coninck, Maer mijn Here dye coninc is als een Enghel Gods, ende mach doen wat hem behaecht, ^{+ +}

+ F vers 27

+ ij.re xvi genesis xxxiij. he. xvi b

28

Wandt alle mijns vaders huys en is niet geweest dan lieden des doots voor mijnen Here den Coninck, Soo hebdy uwen knecht ghesedt, onder die, die op v tafele eten, wat heb ic voorder gherechticheyt, oft voorder te roepen aen den Coninc?

29

Die coninc sprac tot hem Wat spreect ghi noch voorder van uwen dingen? Ic heb geseyt Deelt ghi ende Siba den acker, met malcanderen,

30

MephiBoseth sprac totten coninck, ghi neemt oock al wech na dien mijn here coninc met vreden thuys gecomen is.

31

Ende Barsillai die Gadijt quam af van Roglim, ende leyde den coninc ouer die Iordane, dat hi hem in die Iordane gheleyde soude doen,

32

ende Barsillai was zeer out, wel tachtentich iaer, hi hadde den coninck besorcht, die wile dat hi tot Mahanaim was want hi was een zeer degelic man,

33

Ende die coninc sprac tot Barsillai, Ghi sult met mi ouer trecken, Ic wil v bi mi besorgen te Ierusalem,

34

Mer Barsillai sprack totten coninc, ⁺ Wat ist dat ic noch te leuen hebbe, dat ic metten coninc op te Hierusalem soude trecken?

+ G vers 34

35

Ick ben heden .lxxx. iaer out, Hoe soude ic onderkennen, wat goet ofte quaet is, of smaken, wat ic ete of drincke, oft hooren, wat die sangers oft sangerssen singen Waeromme soude v knecht mijnen here, den coninc voorder beswaren?

36

V knecht sal weynich metten coninc ouer die Iordaen gaen. Waerom wil mi die coninck sulcke vergeldinge doen?

37

Laet uwen knecht wederom keeren dat ic in mijnder stadt sterue, bi mijns vaders ende mijns moeders graf. Siet, daer is v knecht Simeham dyen laet met mijnen here den coninc ouer trecken ende doet hem, wat v wel beualt.

38

Die coninc sprac, Simeham sal met mi ouertrecken, ende ic wil hem doen, wat v wel behaecht, Oock al wat ghi aen mi verkiest, wil ic v doen.

39

Ende doen allet volc ouer die Iordane gegaen was, ende die coninc ooc, so custede die coninc Barsillai, ende seegende hem ende hi keerde weder tot sine plaetse,

40

ende die coninc troc ouer tot Gilgal ende Simeham die troc met hem, ende alle tvolc Iuda hadde den coninc ouer geleyt, mer des volcx Israel, en was mer die helfte daer

41

Ende siet, doe quamen alle die mannen Israel totten coninc, ende seyden tot hem, Waerom hebben v onse broeders, die mannen van Iuda gestolen, ende hebben den coninc ende sijn huys, ouer die Iordane geleit, ende alle mannen Dauids met hem?

42

Doen antwoorden die van Iuda, dien van Israel, Die coninc behoort ons na toe, wat sijt ghy gram daerom, meynt ghi dat wi vanden coninc voetsel ofte giften ontfangen hebben?

43

So antwoorden dan die van Israel, dyen van Iuda, ende seyden, Wi hebben tienmael meer byden coninck Daer toe oock bi Dauiden, dan ghi, Waerom hebdi mi dan so cleyn geacht, dat, dat onse niet dat eerste geweest en is, onsen coninc te halen? Mer die van Iuda spraken harder, dan die van Israel