Den Bybel met groter neersticheyt ghecorrigeert (Liesveltbijbel 1542)

Hier worden die laetste woorden Dauids bescreuen, Ende ooc so worden hier die namen der vromer strijdtbaer mannen vertelt.

Dat .xxiij. Capittel.

[p. *]

1

⁺DIt sijn die laetste woorden Dauids, Dauid die sone Isai sprac, Die man sprack die tot eenen gesalfden Gods Iacob op gerecht is, ende een lieflijcke dochter Israhel sprac,

+ A vers 1

2

Die gheest des HEREN heeft door mi gesproken, ende sijn wtspreken is door myne tonge gesciet,

3

Hi sprac, die God Israhel heeft mi gesproken, onthouder Israel die regeerder onder den menscen, die gerechte heerscer inder vreesen Gods

4

Gelijc dat licht is aenden morgen als die sonne op gaet, also dat voor haer scijnsel geen wolcke en blijft ende so dat gras siet opter aerden vanden regen,

5

soo sal mijn huys sijn bi Gode, want hi heeft een eewich verbont met mi ghemaect, ouer al spoedich ende versekert

6

Want dat is al mijn salicheit, ende alle lust dat het sal wasscen, Mer die Belial, sal geheelick ende altemale wt geroyt worden, als doornen, datmen niedt daer af en behoude,

7

Ende diese sullen aentasten, sullense met yseren ende spiesen vernielen, ende men salse met vieren verbernen, dat si ophouden

8

Dit sijn die namen der starcker mannen Dauid Iasabeam, die soon Hachmoni, die principaelste onder den drien, die sine spiese op hief, ende versloech achthondert teenen male

9

Na hem was Eleazar, die sone Dodi, des soons Ahohi, onder den dryen vroomen met Dauid, doen si die Philisteen bescimpten, ende aldaer vergadert waren totten strijde, ende die mannen Israhel af trocken

10

Doen stont hi, ende sloech dye Philisteen, tot dat sine hant moede aent sweert verstijfde. Ende die HERE ghaf een groote salicheyt, tot dyer tijt, also dat het volc hem om keerde na hem, om te roouen

11

Na hem was Samma, die soon Age, des Harathiten, Doen die Philisteen hen vergaderden in eenen rotte, ende aldaer was een stuck ackers, vol wicken, ende dat volc vluchtede voor die Philisteen.

12

Doen tradt hi midden op dat stucke, ende verlostet ende sloech die Philisteen. Ende God gaf een grote salicheyt.

13

Ende dese drie principaelste onder dertich quamen af inden oogste, ⁺ tot Dauiden, inden holle Adullam, ende die rotten der Philisteen lagen inden nederen lande Rephaim.

+ C vers 13

14

Dauid was op de tijt in die borchte, mer der Philisteen volc lach tot Bethlehem,

15

Ende Dauid wert lustich, ende sprack, Wie wil mi te drincken halen vanden water wt den put te Bethlehem, onder die poorte?

16

Doen inbraken die drie vroome mannen inden legher der Philisteen, ende putten oft schepten vanden water, wt den putte te Bethlehem, onder die poorte ende droeghent ende brachtent aen Dauiden. Maer hi en wildes niet drincken. Mer hi goot voor den HERE ende sprac,

17

dat laet die HERE verre van mi zijn dat ic dat doen soude, en ist niet dat bloet der mannen die haer leuen gewaecht hebben, ende derwaerts gegaen sijn, ende hi en wildes niet drincken, Dat deden die drie alder vroomste

18

Abisai Ioabs broeder, die soon ZeruIa, was ooc een principaelste onder den drien,

19

hi hief sine spiese op, ende sloech drie hondert, ende was ooc vermaert onder den dryen, ende die heerlicste onder den dryen, ende was haer ouerste,

20

mer hi en quam onder den drien niet

Ende Benaia, die soon Ioadia des soons Ishail, van groten daden, van Kabzeel, die sloech twee leeuwen der Moabiten, ende ghinck af, ende sloech eenen leeu inden putte, inder sneeu tijt

21

Ende sloech ooc eenen Egiptscen grouwelijcken man die hadde een spiesse in zijn hant, Mer hi ginc tot hem af met eenen stocke, ende nam den Egiptenaer die spiesse wt der hant, ende doode hem met sijns selfs spiesse,

22

Dat dede Benaia, die sone Ioiada, ende was vermaert onder den drien vroomen,

23

ende heerlijcker dan die dertich, maer hi en quam totten dryen toe niet, Ende Dauid maeckte hem tot eenen heymelijcken raet.

24

Asahel die broeder Ioab, is onder den dertigen Elhana sijns ooms soon tot Bethlehem,

25

Samma dye Harodite. Elika, die Harodite,

26

Helez, die Paltite, Ira die soon Ikes, des Thekoiten,

27

Abieser, die Anthotijt, Mehunai die Husathijt,

28

Salmon, die Ahohite, Mererari die Nethophatite,

29

Heleb die soon Baena die Netophatite, Ithai, die sone Ribai van Gibea, der kinderen BenIamin.

30

Benaia, die Pirgathonite, Hidai vander beken Gaas

31

Abialbon die Arbathite

32

Asmaueth die Barhumite, Eliaheba die Saalbonite, Die kinderen Iasen ende Ionathan,

33

Samma dye Hararite, Ahian, die sone Sarar, des Haratiten,

34

Eliphelet, de sone Ahasbai, des soons Maechathi, Eliam die sone Achitophel, des Gilonite,

35

Hezrai, die Carmelite, Parai die Arbite.

36

Ieheal die sone Nathan van Zoba. Ban die Gadite,

37

Seleg die Ammonite Naharai, die Beerrothite, die wapendrager Ioabs des soons ZeruIa,

38

Ira die Iethrite. Gareb die Iethrite,

39

Vria die Hethite, dyer is te samen seuenendertich.