Den Bybel met groter neersticheyt ghecorrigeert (Liesveltbijbel 1542)

Die HERE openbaert Salomo den Coninc ende belooft hem veel groote dinghen, Salomon gheeft Hiram den Coninc .xx. steden

Dat .ix. Capittel

1

⁺ENde doen Salomo hadde voltimmert des HEREN huys, ende des Conincx huys, ende al wat hi begeert ende lust hadde te maken,

+ A vers 1

2

openbaerde hem die HERE anderwerf, so hi hem geopenbaert hadde te Gibeon,

3

ende die HERE sprac tot hem, Ic heb v gebet ende smeecken ghehoort, dat ghi voor my gesmeect hebt, ende heb dit huys gheheylicht dat ghi getimmert hebt, op dat ic mijnen naem eeuwelick daer soude setten, ende mijn oogen ende mijn herte soude daer altoos sijn,

4

Ende ist dat ghi voor mi wandelt, so v vader Dauid ghewandelt heeft met oprechter herten ende oprechtelic, dat ghi doet al dat ic v gheboden heb, ende mijn seden, ende mijne rechten hout,

5

soo wil ick v beuestighen den stoel ws conincrijcx ouer Israhel eewelic, so ic uwen vader Dauid ghesproken hebbe ende geseyt, ⁺ Het en sal v niet gebreken aen eenen man vanden stoel Israel

+ B vers 5

[p. *]

6

Mer ist dat ghi v van mi af keert, ghi ende uwe kinderen, ende niet en hout mijne geboden ende seden, die ic v voor geleyt hebbe, ende henen gaet ende anderen goden dient, ende die aenbedet,

7

so sal ic Israel wtroeyen vanden lande dat ic hen ghegeuen hebbe, ende dat huys dat ic mijnen name geheylicht hebbe wil ic verlaten van mijnen aensichte. ⁺ Ende Israel sal een spreeckwoort ende een fabel sijn onder alle volcken,

+ de. xxix e Ie xxij c ij.pa ij.a

8

ende dat huys sal ingebroken worden, dat alle die daer voorby gaen sullen, die sullen hen ontsetten ende blasen ende seggen Waeromme heeft die HEERE desen lande ende desen huyse also gedaen?

9

So salmen antwoorden, Om dat si den HERE haren God verlaten hebben, die hare vaders wt den lande Egipti leyde, ende hebben aengenomen ander goden, ende hebben die aengebeden, ende hen gedient Daerom heeft die HEERE al dit quaet ouer hen gebracht.

10

⁺Als nv die twintich iaer om waren, in welcken Salomo die twee huysen tymmerde, des HEEREN huys, ende des Conincx huys.

+ C vers 10

11

Daer toe Hiram die Coninck tot Tyro Salomo Cederboomen ende dennen boomen, ende gout na alle sijn begeerte brachte Doen ghaf die coninc Salomo Hiram twintich steden inden lande Galilea,

12

ende Hiram troc wt van Tyro om die steden te besien, die hem Salomo ghegheuen hadde, ende si en behaechden hem niet,

13

ende sprac, wat steden sijn dat mijne broeder, die ghi mi ghegheuen hebt? ende hietse dat lant Capul tot op desen dach,

14

Ende Hiram hadde den Coninc ghesonden hondert ende twintich ponden gouts.

15

Ende dat selue is dye somma der chijsen oft renten, die dye Coninck Salomo op hief, om des HEREN huys te tymmeren, ende sijn huys, ende Millo, ende die mueren Ierusalem, ende Hazor ende Megiddo, ende Gazer

16

Want Pharao die Coninc wt Egipten was op gecomen, ende had Gazer ghewonnen, ende met vier verbrant, ⁺ ende die Cananiten gedoot die in dye stadt woonden, ende hadde sijn dochter Salomons huysurou tot eender ghiften gegeuen,

+ D vers 16

17

Alsoe tymmerde Salomo Gazer, ende dat neder Bethoron, ende Baelath,

18

ende Thamar inder woestijnen, inden lande,

19

ende alle steden der coren huysen die Salomo hadde, ende alle die steden der waghens, ende die steden der ruyteren, ende waer hi lust toe hadde om te tymmeren, Ierusalem in Libanon, ende inden geheelen lande sijnder heerschappien.

20

Ende allet ouerghebleuen volc vanden Amoriten Hethiten, Pheresiten, Heuiten, ende Iebusiten, die vanden kinderen Israel niet en waren,

21

dier seluer kinderen, dien si na hen ouer lieten blijuen inden lande, die die kinderen Israel niet en consten verbannen, oft wtghewerpen, die maecte Salomo cijsbaer, tot op desen dach,

22

Mer vanden kinderen Israel en maecte hy gheen knechten, mer hi lietse crijschlieden, ende sijn knechten, princen, ende ridderen, ende ouer sine wagens ende ruyters sijn.

23

Ende die officiers die ouer Salomons wercken waren, dier was vijfhondert ende vijftich, die ouer dat volc heerscapten, ende die wercken wt rechten

24

⁺Ende die dochter Pharao trock opwaerts, vander stadt Dauid, in haer huys, dat hi daer ghetymmert hadde, Doen tymmerde hi ooc Millo.

+ E vers 24

25

Ende Salomo offerde tsiaers driemael brantoffer ende dootoffer opten outaer, die hi den HERE ghetymmert hadde, ende wierp daer wieroock ouer voor den HERE, ende dat huys wert also volmaect

26

Ende Salomo maecte ooc schepen tot EzonGe-ber, die bi Eloth leyt aenden oeuer der roder zee, inden lande der Edomiten,

27

Ende Hiram sant sine knechten int schip, die hen opt scip verstonden, ende op die zee beproeft waren metten knechten Salomo

28

ende quamen tot Ophir, ende haelden aldaer vier hondert ende twintich ponden gouts, ende brochtent den Coninck Salomo.