Den Bybel met groter neersticheyt ghecorrigeert (Liesveltbijbel 1542)

Van Iehu, hoe hi eenen coninc ouer Irael ghesalft wert. Ende hoe hi dat huys Ahab ende Iesbeles wt roeyde

Dat .ix. Capittel

1

⁺ELisa den propheet riep eenen der popheten kinderen aen, seggende tot hem, Gort v lendenen, ende neemt dese olicruycke met v, ende gaet henen tot Ramoth in Gilead

+ A vers 1

2

ende als ghi daer coemt, so suldi aldaer sien Iehu, den sone Iosaphats, des soons Nimsi, ende gaet in, ende hiet hem opstaen onder sinen broederen, ende leyt hem in die binnenste camere,

3

ende neemt die olicruycke ende storten op sijn hooft ende spreect, Dus seyt die HERE, ic heb v tot eenen coninc ouer Israel gesalft, ende sult die duere open doen ende vluchten, ende niedt vertoeuen.

4

Ende die iongelinc des propheten die knape, ginc wech tot Ramoth in Gilead,

5

ende doe hi in quam, siet doen saten die hooftlieden des heyrs, ende hi sprac, ghi hooftman Ic heb v wat te seggen. Iehu sprac, Welcken onder ons allen? hi sprac hooftman v

6

Doen stont hi op, ende ginc in, ende goot den olie op sijn hooft, ende sprac tot hem.

7

Dus seit de HERE die God Israel, ⁺ ic heb v tot eenen coninck ghesalft ouer des HEREN volc Israel, ende ghi sult dat huys Ahab ws Heren slaen, op dat ic dat bloet der propheten mijnder knechten, ende dat bloet alder knechten des HEREN wreke vander hant Iesebel,

+ B vers 7

8

also dat dat geheele huys Ahab verga, ende ic wil van Ahab wtroyen, den genen die aen die want pisset, ende den beslotenen ende verlatenen in Israel,

9

ende wil dat huis Ahab maken, als dat huis Ierobeam des soons Nebat, ende gelijc dat huys Bacsa, des soons Ahia,

10

ende die honden sullen Iesebel eten, opten acker te Iesreel, ende niemant en salse begrauen. Ende hi dede die duere open, ende vluchtede

11

Ende doen Iehu wt ginc totten knechten sijns heeren, seyde men tot hem. Staet het al wel? Waeromme is dese rasende tot v gecomen? Hi sprac tot hen. Ghy kennet doch den man wel, ⁺ ende wat hi seyt.

+ iji.re. xxi.f.

12

Si seyden dat en is niet waer, mer geuet ons te kennen. Hi seyde, so ende so, heeft hi met mi gesproken ende geseyt.

13

Soo seyt die HERE ic hebbe v tot eenen coninc ouer Israel gesalft. Doen haesten si, ende elc nam sijn cleet, ende leydet onder hem, bi den sonnen wisere, ende bliesen metter basuynen, ende spraken, Iehu is coninc geworden.

14

Also maecte Iehu die sone Iosaphat, des soons Nimsi een verbont tegen den coninc Ioram, Ioram lach voor Ramoth, in Gilead, met geheele Israel, tegen Hasael den coninc tot Sirien,

15

Mer Ioram die coninc was weder gecomen, dat hi hem te Iesreel soude laten heelen,

[p. *]

vanden slagen die hem die Siriers geslagen hadden doen hi street tegen Hasael, den coninck tot Sirien.

Ende Iehu sprac, Behaget v, soo en sal niemant wt die stadt vluchten, dat hi gae ende bootscappe te Iesreel

16

Ende hi voer op, ⁺ ende reisde te Iesreel, want Ioram lach aldaer. So was Ahasia die coninc Iuda af getrocken om Ioram te besoecken.

+ D vers 16

17

Mer die wachter, dye te Iesreel opten toren stont, sach den hoope Iehu comen, ende sprac. Ic sie eenen hoope.

18

Doen sprac Ioram. Neemt eenen wagen ende seynt hem tegen, ende spreect. Ist vrede Ende die voerman reet hem tegen ende sprac, So seyt die Coninc, Ist vrede? Iehu sprack, wat ghaet v den vrede aen? keert v achter mi. Dye wachtere vercondichde dat, ende seyde. Die bode is tot hen gecomen, ende en coemt niedt weder.

19

Doen sant hi eenen anderen voerman, doen hy tot hem quam, sprac hi. ⁺ So spreect die Coninck, Ist vrede? Iehu sprac, wat gaet v den vrede aen? keert v achter mi.

+ E vers 19

20

Dat vercondichde die wachter, ende sprac. Hi is tot hen gecomen ende en coemt niet weder, ende het is een driuen, als dat drijuen Iehu des soons Nimsi, want hi drijft, als oft hi ontsinnich waer.

21

Doe sprack Ioram, spannet aen, ende men spien sinen wagen aen, ende si trocken wt Ioram die coninc Israel, ende Ahasia die Coninck Iuda, elc op sinen wagen, dat si Iehu teghen souden comen, ende si quamen hem aen opten arcker Naboth des Iesreeliten

22

Ende doe Ioram Iehu sach sprac hi Iehu ist vrede? Hi seyde, wat vrede. Dijnre moeder Iesebel hoerderie ende toouerie en is noch gheen eynde

23

Doen keerde Ioram sijn hant, ende vluchte, ende sprac tot Ahasia, ⁺ Het is verraderie Ahasia,

+ F vers 23

24

Maer Iehu greep den boge, ende scoot Ioram tusschen den armen, dat den pijl door sijn herte wt voer, ende viel in sinen wagen.

25

Ende hi sprack totten ridder Bidekar, Neempt ende worpt hem op stuc ackers Naboth des Iesreeliten want ic gedincke, dat ghi met mi op eenen wagen sinen vader na voeren, dat die HERE sulcken last ouer hem hief.

26

Wat geldet sprac die HERE, dat ic wil v dat bloet Naboth, ende sijnder kinderen dat ic gisteren sach weder betalen, op desen arcker Dus neemt, ende werpt hem opten acker, na den woorde des HEREN.

27

Doe dat Ahasia die coninc Iuda sach, vluchte hy door den wech, totten huyse des hoofs, Iehu iaechde hem na, ende hiet hem ooc slaen, opten wagen te Gur die bi Ieblaan leget. Ende hi vluchte tot Megiddo, ende sterf aldaer,

28

ende sijn knechten lieten hem voeren te Iherusalem, ⁺ ende begroeuen hem in sinen graue, met sinen vaderen, in die stadt Dauid

+ ij.re. xxij

29

Mer Ahasia, regneerde ouer Iuda, int elfste iaer Ioram des soons Ahab.

30

Ende doen Iehu te Iesreel quam, ende Iesebel dat vernam, blanckette si haer aensicht, ende vercierde haer hooft, ende keeke ter venster wt,

31

ende doen Iehu onder die poorte quam sprac si, ist Simri wel gegaen? die sinen Heere verworchde.

32

Ende hi hief sijn aensichte op ter vensteren, ende sprac, Wie is by my? Doen keerden hen twee oft drie camerlinghen tot hem,

33

hy sprack, stootse van bouen af. Ende si stietense van bouen neder, also dat die want ende die peerden met haren bloet besprengt werden, ⁺ ende si wert vertorden

+ G vers 33

34

Ende doen hi in quam, ende geten ende gedroncken had sprac hi, Besiet doch die veruloecte, ende begraeftse want si is eens conincx dochter.

35

Doen si wech ghingen om haer te begrauen, so en vonden si niet van haer, dan die schedele, ende voet, ende hare vlacke handen.

36

Ende quamen weder, ende bootscaptent hem. Mer hi sprac, Het is dat die HERE gesproken heeft, door sinen knecht Elia Tisbite, ende geseyt. Opten acker Iesreel, sullen die honden dat vleesch Iesebels eten.

37

Also wert den prije Iesebels als eenen drec opten velde inden acker Iesreel also datmen niet geseggen en conste, dat is Iesebel.