Den Bybel met groter neersticheyt ghecorrigeert (Liesveltbijbel 1542)

Vanden rijcke des vromen Conincx Hiskie, ende hoe hem Senacherib verwan ende benaude.

Dat .xviij. Capittel

1

⁺TEn derden iare Hosea des soons Ela des Conincx Israel, werdt coninck Hiskia, die sone Ahas des conincx Iuda,

+ A vers 1

2

ende was .xxv. iaer out doen hy coninck wert, ende regneerde .xxix. iaer te Ierusalem,

3

sijn moeder hiet Abi, een dochter Sacharia, ende dede dat den HERE wel behaechde, ghelijck sijn vader Dauid,

4

hi dede die Hoochten af, ende brack die calomnen, ende roeyde die Boschken wt, ende stiet dye metalen slange in stucken, die Mose gemaect hadde.

5

Want tot dier tijt toe hadden die kinderen Israel gerooct, ende men hietse Nehustan, hi betroude vast inden HEERE den Godt Israel, dat na hem sijns gelijcken niet en was onder alle coningen Iuda, noch voor hem gheweest,

6

Hi aenhinc den HEERE, ende en weec niet achterwaerts van hem af, ende hielt sine geboden, die de HEERE Mose geboden hadde,

7

ende die HERE was met hem, Ende waer hi wt troc dede hi cloeckelic Daer toe wert hi afuallich vanden coninc van Assirien, ende en was hem niet onderdanich,

8

Hi sloech die Philisteen oock tot Gaza toe, ende hare palen van die sloten aen, tot aen dye vaste steden.

9

⁺Inden vierden iaer Hiskia des Conincx Iuda, ⁺ dat was dat seuenste iaer Hosea des soons Ela, des Conincx Israel, doen troc Salmanasser die coninc tot Assirien opwaerts tegen Samaria, ende belegherdese, ende wontse na drie iaren

+ B vers 9

+ ij.reg. xxij.a. ecclesia. xlviij.c. Esaie xxxvi.

10

inden sesten iaer Hiskia, dat is int negenste iaer Hosea des conincx Israel, Doen wert Samaria gewonnen,

11

Ende die Coninc van Assirien voerde Israel wech tot Assirien, ende settese tot Halah, ende Habor aent water Gosan, ende in die steden der Meden,

12

om dat si die stemme des HEREN haers Gods niet ghehoort en hadden, ende zijn verbont voorbi gegaen hadden ende al wat Mose die knecht des HEREN geboden hadde, dien en hadden si geen gehoort noch ghedaen

13

⁺Inden veerthienden iaer des conincx Hiskia, troc op Senaherib die coninc tot Assyrien tegen alle vaste steden Iuda, ende namse in, Doen seynde Hiskia die Coninc Iuda, totten coninc van Assyrien tot Lacis, ende liet hem seggen,

+ C vers 13

14

Ic heb mi besondicht, keert af van mi, Wat ghi op legt dat wil ick dragen, Doen leyde die Coninc van Assyrien op Hiskia den Coninck Iuda, drie hondert ponden siluers, ende dertich ponden gouts,

15

Also gaf Hiskia alle dat siluer dat inden huise des HEREN, ende inden schatten des Conincx huys geuonden wert,

16

Ter seluer tijt brack Hiskia dye Coninc Iuda die dueren aenden tempel des HEREN ende die platen die hi selue hadde doen ouertrecken, ende gafse den coninc van Assyrien.

17

Ende die coninc van Assyrien sandt Thartan ende den ouersten camerlinck, ende ouersten schencker van Lachis totten coninc Hiskia, met grooter macht, tot Ierusalem, ende si trocken op, ende doen si quamen, hielden si aenden waterganc bi den hooghen poele, dye daer leyt aen der straten op den acker des volders, ⁺ ende riep den Coninc,

+ D vers 17

18

Doen quam wt tot hem Eliakim dye sone Hilkia, die hoofmeester, ende Sebena die scriuer ende Ioath die sone Assaph die cancellier, Ende dye opperste schencker sprac tot hen.

19

Lieue, segt den Coninc Hiskia, so spreect die grote Coninc, die coninc van Assyrien.

20

Wat is dat torten oft die stoutheyt daer ghi v op verlaet, Meynt ghi datter noch raet ende macht is te strijden? Waer op verlaet ghi v dan nu, dat ghi van mi afgeuallen sijt,

21

Siet, verlaet ghi v op dien gebroken rietstock, op Egypten, die welcke ist datter yemant op leynt oft stuent, so sal hi hem in die hant gaen, ende die doorboren, Also is Pharao die coninc van Egypten, allen dye hen op hem verlaten,

22

Mer oft ghi tot mi wildet seggen, Wi verlaten ons opten HERE onsen God, En is hy dan niet die, des welcx Hoochten ende outaer Hiskia heeft afgedaen ende geseyt tot Iuda ende tot Ierusalem, voor desen outaer die tot Ierusalem is, sult ghi aenbeden.

23

Dus maect nv eenen hoope minen Coninck van

[p. *]

Assyrien so wil ick v twee duysent peerden gheuen, laet sien, oft ghi bi v ruyters daer toe moecht geuen,

24

hoe wilt ghi dan blijuen voor den minsten grauen een mijns heren ondersaten? Ende verlaet v op Egipten, om der wagens ende ruyters wille.

25

Meynt ghi dat, dat ic sonder den HEERE op ben getrocken, daer ick dese stede soude bederuen.

26

Die HEERE heuet mi geheeten, trect op in dat lant ende bederuet.

⁺ Doen sprac Eliakim die sone Hilkia, ende Sebena ende Ioab totten oppersten scencker. Spreect met uwen knechten in Syrijsch, want wi verstaent, ende en spreect niet met ons in Iootscer talen, voor den ooren des volcx dat opter mueren is,

+ F vers 26

27

Mer die opperste schencker sprac tot hen, Heeft mijn Heere mi dan tot uwen heere, oft tot v gesonden, dat ic dusdanige woorden soude spreken Ia totten mannen die op die mueren sitten dat si met v haer eyhen mist souden eten, ende haer pisse drincken.

28

⁺Also stont die opperste scencker ende riep met luyder stemmen in Iootscher talen, ende sprac seggende. Hoort dat woort des grooten conincx, des conincx van Assirien, So seyt die coninc,

+ G vers 28

29

En laet v Hiskia niet verleyden. Want hi en mach v niet verlossen van mijnder hant,

30

ende en laet v Hiskia nyet vertroosten op den HERE, dat hi seyt. Die HERE sal ons verlossen ende dese stadt en sal niet in die handen des conincx van Assirien gegeuen werden. En hoort Hiskia niet,

31

want dus spreect die coninc van Assirien.

Doet aen mi die seegeninghe, ende coemt tot mi wt so sal elc van sinen wijnstoc ende van sinen vijchboom eten ende van sijnder fonteynen drincken,

32

tot dat ic come ende hale v in een lant, dat uwen lande gelijc is, daer coren, most, broot, wijnbergen, olijfboomen, olye, ende honich in is, so sal haer leuen blijuen ende niet steruen, En hoort Hiskia niet, want hi verleyt v, dat hi seyt. Die HERE sal ons verlossen.

33

Hebben ooc die goden der heydenen een yegelijc sijn lant verlost vander hant des conincx van Assirien,

34

waer sijn die goden te Hemath ende Arphat, Waer sijn de goden tot Sepharnaim, Heua ende Iwa, hebben si Samaria ooc verlost van mijnder hant.

35

Waer is een God onder alle Goden der landen die sijn lant van mijnder hant verloste, dat die HERE Ierusalem van mijnder hant soude verlosten.

36

Dat volck sweech stille, ende en antwoorden hem niet, Want die coninc hadde geboden ende gheseyt, En antwoort hem niet.

37

Doen quam Eliakim die sone Hilkia die hoofmeester, ende Sebena die scriuer ende Ioab die sone Assaph die Cancellier tot Hiskia, met gescoorden cleederen, ende bootscapten hem de woorden des ouersten schenckers.