Den Bybel met groter neersticheyt ghecorrigeert (Liesveltbijbel 1542)

Hiskia seynt tot Isaiam, die troostet hem. Hoe dat God Hiskia ontsettede, ende verloste.

Dat .xix. Capittel

1

⁺DOen dye Coninck Hiskia dat hoorde, scoorde hi sine cleederen, ende dede eenen sack aen, ende ginc in dat huys des HEREN,

+ A vers 1

2

ende sandt Eliakim den hoofmeester, ende Sebena den scrijuer metten outsten priesteren met sacken ghecleet, totten prophete Iesaia, den sone Amoz,

3

ende si spraken tot hem. So seit Hiskia Dit is eenen dach der noot, ende berispingen, ende blasphemien, die kinderen sijn aen die geboorte gecomen, ende daer en is geen cracht te baren,

4

Oft misscien dye HEERE v God wilde alle de woorden des oppersten scenckers hooren, dien sijn heere die coninck van Assirien, ghesonden heuet, schimp te spreken den leuenden God, ende te schelden met woorden, die de HEERE God gehoort heuet, so heft v ghebet op voor die ouerble-uene, die noch voor handen sijn.

5

Ende doe die knechten des Conincx Hiskia tot Iesaia quamen,

6

so sprac Iesaia tot hen. Also segt dinen here, Dus spreect die HERE, ⁺ en vreest v niet voor de woorden die ghi gehoort hebt, daer mede die knapen des conincx van Assirien gheblaphemeert oft ghelastert hebben,

+ B vers 6

7

Siet, Ic wil hen eenen geest laten gheuen, dat hi een geruchte hooren sal, ende weder in zijn lant trecken, ende wil hem doort sweert vellen in sijn landt.

8

Ende doen die ouerste scencker weder quam, vont hy den coninc van Assirien strijdende tegen Libna, want hi hadde gehoort dat hi van Lachis getrocken was ende hi hoorde van Thirhaka den coninc der Mooren Siet, hi is wt getrocken om tegen v te striden.

9

⁺Doe keerde hi omme ende sandt boden tot Hiskia, ende liet hem seggen Also segt Hiskia den Coninck Iuda, en laet v uwen God niet verleyden, op dien ghi v verlaet ende spreect, Ierusalem en sal niet in die handen des conincx van Assyrien gegeuen werden,

+ C vers 9

10

Siet ghi hebt ghehoort wat die coningen van Assyrien ghedaen hebben allen landen, ende die verbannet, ende sout ghi verlost werden?

11

hebben die goden der heydenen die ooc verlost, de welcke mijne vaders hebben verdoruen, Gozan, Haran, Reseph, ende die kinderen Eden, die tot Thelassar waren?

12

Waer is die coninc tot Hemath, die coninc tot Arphat, ⁺ ende die coninc der stadt Sepharnaim, Heua ende Iwa

+ D vers 12

13

Ende doe Hiskia brieuen vanden boden ontfaen ende gelesen hadde, ginc hi op totten huise des HEREN ende strecte hem wt voor den HERE ende badt voor den HERE

14

ende sprac, HERE God Israel, ghi die ouer Cherubin sidt, Ghi sijt alleen God onder alle conincrijcken opter aerden, ghi hebt hemel ende aerde ghemaect,

15

HERE neyghet v ooren ende hoort, doet uwe oogen open ende siet, ende hoort die woorden Saneherib die hier gesonden heeft schimpe te spreken den leuenden God,

16

Het is waer HERE, die coninghen van Assyrien hebben die heydenen metten sweerde vernielt, ende haer lant,

17

ende hebben hare goden int vier geworpen Want het en waren geen goden, mer wercken der handen der menschen hout ende steen. Daeromme hebben sise vernielt,

18

Maer nv HERE onse God helpt ons wt sijnder hand, op dat alle conincrijcken der aerden bekennen, dat ghi HERE alleen God sijt.

19

Doen sant Iesaia die sone Amoz tot Hiskia, ende liet hem seggen, So spreect die HEERE die God Israel, ⁺ Al wat ghi tot mi gebeden hebt van Saneherib den coninc van Assirien, dat heb ic gehoort.

+ E vers 19

20

Dit ist dat die HERE tegen hem gesproken heeft, Die maget die dochter Zion veracht v ende bespot v, die dochter Ierusalem schuddet haer hooft achter v,

21

Wien hebt ghi bescimpt ende belastert? ouer wien hebt ghi v stemme verheuen? ghi hebt v oogen verheuen teghen den heyligen in Israel,

22

ghi hebt den HERE door uwe boden bescimpt ende geseyt, Ic ben door die menichte mijnder wagens op die hoochte der bergen gestegen, opten siden des Libanon, Ic hebbe sine hoge cederboomen, ende wtgelesen dennenbomen afgehouden, ende ben gecomen aen de wterste herberge des wouts sijns Carmels,

23

⁺Ic heb gegrauen ende wtgedroncken die vreemde wateren, ende hebbe metten plante mijnder voeten die zeen verdroocht.

+ F vers 23

24

Mer en hebdi niet gehoort dat ic sodanich lange te voren gedaen hebbe, ende van beginne heb ict bereyt, Mer nv heb ict laten comen dat twistachtige vaste steden sullen vallen in eenen woesten steenhoop,

25

ende die daer inne woonen, sullen mat oft luesich zijn, ende vreesen ende hen scamen, ende sullen werden als tgras opten velde, ende als dat

[p. *]

groene cruyt totten hoy op die daken, dat verdorret eert rijp wert,

26

Ic weet v woonen, v wt ende in trecken ende v rasen tegen mi,

27

Want ghi dan tegen mi raest ende uwen ouermoet voor mijnen ooren opgeclommen is so wil ic v eenen ^a rinc aen v nuesen leggen, ende een gebit aen v lippen, ende wil v wederomme leyden door den wech, daer ghi door gecomen sijt.

a Rinc inde nuese setten dat is hem afkeeren, ende bedwingen van sijn quaet voornemen te moghen volbrenghen iob. xl.d

28

Ende dit si v een teeken, In desen iare etet wat geuallen is, Inden anderen iaer wat van selfs wascht, inden derden iare, saeyt ende maeyt ende plant wijnbergen, ende etet hare vruchten,

29

Ende die dochter Iuda die ontulucht ende ouerbleuen is, sal voorder onder haer wortelen, ende ouer haer seluen vrucht dragen.

30

Want van Ierusalem sullen wtgaen die ouergebleuene, ende vanden berch Sion die ontloopen sijn, Die zeloersheyt des HEREN Zebaoths sal dat doen.

31

Daeromme spreect die HERE vanden coninc tot Assyrien aldus,

32

hi en sal in dese stadt niet comen noch geenen pijl daer inne scieten, noch daer en sal geenen schilt voor comen, noch geenen wal en sal hi daeromme leggen,

33

mer hi sal den wech wederom reysen, dien hi gecomen is, ende en sal in dese stat niet comen de HERE seget,

34

ende ic wil dese stat bescermen, dat ic haer helpe om minent wille, ende om Dauid mijns knechts wille.

[afbeelding]

35

Ende die engel des HEREN voer inder seluer nacht wt, ende sloech inden leger van Assirien hondert ende lxxxv. duysent mannen, Ende als si hen smorgens vroech op maecten, siet, doen lagen daer al enckel doode lichamen,

36

Also brac Saneherib de coninc van Assyrien op, ende troc wech, ende keerde wederom, ende bleef te Niniue,

37

ende doen hi aenbede inden huise Nikroch zijns Gods so sloegen hem metten sweerde Adramelech ende Sarezer sine sonen, ende si ontuloden int lant Ararat. Ende sine soone Hassarhaddom wert coninc in sijn stede.