Den Bybel met groter neersticheyt ghecorrigeert (Liesveltbijbel 1542)

Hoe dat hi ordineerde dat die Arcke vanden Leuiten ghedragen souden worden.

Dat .xvi. Capittel.

1

⁺ENde hi tymmerde hem huysen in dye stadt Dauid, ende bereyde der Arcken Gods plaetse, ende bereyde eenen Tabernacule ouer haer.

+ A vers 1

2

Doen ter tijt seyde Dauid, Die Arcke Gods en is niet te dragen dan vanden Leuiten, Want dye selue heeft dye

[p. *]

HERE vercoren dat si die Arcke des HEEREN souden dragen, ende hem dienen eewelic.

3

Daeromme vergaderde Dauid dat geheel Israel, tot Ierusalem, dat si die Arcke des HEREN op souden brengen, aen die plaetse die hi daer toe bereyt hadde.

4

⁺Ende Dauid bracht te samen die kinderen Aaron, ende die Leuiten,

+ B vers 4

5

wt den kinderen Kahath. Vriel den oppersten met sinen broederen hondert ende twintich. Wt den kinderen Merari, Asaia, dye ouerste met sinen broederen, twee hondert ende twintich.

6

Wt den kinderen Gerson, Ioel die ouerste met sinen broederen hondert ende dertich.

7

Wt den kinderen Eliaphan Semaia dye ouerste met sinen broederen, twee hondert,

8

Wt den kinderen Hebron Eliel die ouerste met sinen broederen, tachtentich

9

Wt den kinderen Vsiel. Amminadab die ouerste met sinen broederen, hondert ende twalef.

10

⁺Ende Dauid riep Zadock ende Abiathar die priesteren, ende die Leuiten, te wetene, Vriel, Asaia, Ioeli. Semaia, Eliel, Aminadab,

+ C vers 10

11

ende sprac tot hen, Ghi zijt dye hoofden der vaders onder den Leuiten, so heylighet v nv, ende uwe broeders, dat ghi die Arcke des HEREN des Gods Israel op brenget, daer ict haer bereit hebbe.

12

Want te vooren doe ghi daer nyet tegenwoordich en waert, dede die HERE onse God eene rete of deelinge onder ons, daerom dat wi hem nyet en sochten, so het behoort.

13

Also heylichden hen die priesters ende Leuiten dat si die Arcke des HEREN des Gods Israel op souden brengen.

14

Ende die kinderen Leui droeghen dye Arcke Gods des HEREN op haer scouderen, met den hantboomen daer aen, gelijc Moses geboden hadde, na den woorde des HEREN.

15

Ende Dauid sprac totten ouersten der Leuiten, dat si haer broeders tot sangers souden stellen, met psalteren herpen ende hellen snarenspelen, ende cymbalen, dat si luyde souden singen, ende met bliscappe

16

Doe stelden dye Leuiten Hema den sone Ioel. Ende wt sinen broederen Assaph den sone Berechia. Ende wt den kinderen Merari haren broederen, Ethan den soon Kusaia,

17

ende met hen hare broeders des anderen deels te wetene, Sacharia, Iaesiel Semiramoth, Iehiel, Vnni, Eliab Benaia, Maeseia, Mathithia. Elipheleia Mikneia. ObedEdom Iriel dye doorwachters.

18

Want Heman Assaph, ende Ethan waren sangers met metalen cymbalen, om helle te clincken,

19

Mer Sacharia Asiel, Semiramoth Iehiel, Vnni, Eliab, Maesia, ende Benaia, met psalters ende Alamoth

20

Mathithia, Elipheleia, Mikneia, ObedEdom, Iriel, ende Asasia, met herpen inder hoochte

21

ouer hen ChenanIa der Leuiten ouerste, die sanckmeerster, dat hise soude onderwijsen te singen, want hi was verstandich.

22

Ende Berichia ende Elkana, waren doorwachters, der Arcke,

23

Maer Sachania, Iosaphat, Nethaneel, Amasai, Sacharia, Benaia, Eliezer, dye Priesters, bliesen met trompetten voor die Arcke Gods, ende ObedEdom ende Iehia waren doorwachters der Arcken.

24

Also ginc Dauid ende die Ouders Israel, ende die ouerste ouer duysenden op, om die Arcke des verbonts des HEREN te halen wt den huise ObedEdom met bliscappen. ⁺

+ ij.reg. vi a.

25

⁺Ende doen God den Leuiten halp, die die Arcke des verbonts des HEREN droegen, ⁺ offerdemen .vij verren, ende seuen rammen

+ D vers 25

+ ij.Para. xxij.f

26

Ende Dauid hadde eenen lijnen rock aen, ⁺ daer toe alle Leuiten die de Arcke droegen, ende die sangers ende ChenanIa de ouerste des sancx met den sangers, Ooc hadde Dauid eenen lijnen lijfroc aen.

+ ij.reg. vi

27

Also bracht dat gheheele Israhel dye Arcke des verbonts des HEREN op, met iuychen, basuynen trompetten, ende hellen cymbalen, met psalteren ende harpen

28

Als nv die Arcke des verbonts des HEREN in die stadt Dauid quam, sach Michal die dochtere Saul ter venster wt, ende doen si den coninc Dauid sach huppelen ende spelen, verachte si hem in haer herte.