Den Bybel met groter neersticheyt ghecorrigeert (Liesveltbijbel 1542)

Salomon spreect totten volcke, ende looft God, Hi bidt hem dat hi die beschermen wille, die daer innen bidden.

Dat .vi. Capittel

1

⁺DOen sprack Salomo, dye HERE heuet gesproken, te woonen int duyster.

+ A vers 1

2

Ic heb (tis waer) een huys getymmert, v tot eender wooninghen, ende eenen setele, daer ghi eewelick woonen soudt,

3

ende die coninc keerde sijn aensicht omme, ende seegende die gheheele gemeynte Israel, want die geheel gemeynte Israel stont,

4

Ende hi sprac. Ghelooft si die HERE, dye God Israel, die door sinen mont mijnen vader Dauid gesproken, ende met sijnder hant veruult heeft, Doe hi seyde.

5

Sint ter tijt, dat ic mijn volc wten lande Egipti geleyt hebbe, so en hebbe ic geen stadt vercoren in allen stammen Israels, een huys te timmeren, dat mijnen name aldaer soude sijn, ende en hebbe ooc gheenen man vercoren, dat hi prince soude sijn, ouer mijn volck Israel,

6

Mer Hierusalem hebbe ic vercoren dat mijnen name aldaer si, ende Dauidem hebbe ic vercoren, dat hi ouer mijn volc Israel si.

[p. *]

7

Ende doen mijn vader Dauid inden sinne hadde een huys te timmeren den name des HEEREN, des Gods Israel, ⁺

+ i.para. xxij. ij.re. vij.

8

sprac die HEERE tot mijnen vader Dauid. Ghi hebt wel gedaen, dat ghi inden sinne hebbet, mijnen name een huys te timmeren,

9

doch en sult ghi dat huys niet timmeren, mer v sone die wt uwen lendenen comen sal, die sal mijnen name dat huys timmeren.

10

So heeft nv die HERE sijn woort beuesticht dat hi gesproken heeft, Want ick ben opgecomen in mijns vaders Dauids stede, ende sitte opten stoel Israel, soo die HERE gesproken heeft, ende hebbe een huys ghetymmert den name des HEREN, des Gods Israhel,

11

ende hebbe daer inne ghedaen die Arcke, daer dat verbont des HEREN in is, dat hi metten kinderen Israel ghemaect heeft.

12

⁺Ende hi tradt voor den outaer des HEREN, tegen der geheelder gemeynten Israel ouer, ende recte sine handen wt.

+ B vers 12

13

Want Salomo hadde eenen metalen ketel gemaect, ende gheset midden inden buycke des tempels vijf ellen lanc ende breet, ende drie ellen hooch, aenden seluen terde hi, ende viel neder op sijn knien, tegen die gheheele ghemeynte Israel ouer, ende strecte sine handen wt ten hemel, ende sprac.

14

HERE God Israel, daer en is geen God ws gelijc, noch inden hemel, noch opter aerden, ghi die hout dat verbont, ende die ontfermherticheit dijnen knechten die voor v wandelen, wt geheelder herten.

15

Ghi hebt uwen knecht Dauid, mijnen vader gehouden, al wat ghi hem gesproken hebt, met uwen monde hebt ghijt gesproken, ende met uwer hant hebt ghijt veruult, gelijc het heden ten dage blijct.

16

⁺Nv HERE God Israel, houdt uwen knecht Dauid mijnen vader, dat ghi hem gesproken hebt ende geseyt Het en sal v niet gebreken aen eenen man voor my, die opten stoel Israel sitte. Nochtans also verde, dat uwe kinderen haer wegen bewaren, dat si wandelen in mine wet, gelijc ghi voor mi gewandelt hebt.

+ C vers 16

17

Nv HERE God Israel, laet dijn woort warachtich worden dat ghi uwen knecht Dauid ghesproken hebt.

18

Want meynt ghi ooc, dat God by die menschen opter aerden woone? Siet, den hemel, ende alle der hemelen hemel, en can v nyet begrijpen, hoe sout dan dit huys gedoen, dat ic gesticht hebbe?

19

Mer HEERE, mijne God, keert v totten gebede ws knechts ende tot mijnen smeeken, Dat ghi verhoort dat bidden ende beden dat v knecht voor v doet,

20

Dat dijne oogen open sijn ouer dit huys dach ende nacht, ouer dye plaetse, daer ghi gesproken hebt uwen name te stellen, dat ghy hooren sout dat gebet, dat v knecht in dese plaetse doen sal.

21

Dus hoort nv dat smeecken ws knechts, ende ws volcx Israel, dat si bidden sullen op dese plaetse. Hooret van der plaetsen uwer wooningen, vanden hemele, ende als ghijt hoort, so wilt ghenadich sijn.

22

⁺Ist dat yemant tegen sinen naesten sondicht, ⁺ ende wort hem eenen eedt opgeleyt, dien hi sweeren soude, ende den eedt coemt voor uwen outaer, in dit huys,

+ D vers 22

+ ij.regum. viij.d.

23

so wilt vanden hemel hooren, ende uwen knecht recht doen, also dat ghijt den Godlosen vergheldet, ende geeft sinen wech op sijn hooft, ende rechtueerdiget den gherechten, ende gheeft hem na sine gherechticheyt.

24

Ist dat v volck Israel voor sine vianden geslegen wordt, om dat si tegen v gesondicht hebben, ende bekeeren hen, ende belijden uwen name, ende bidden ende smeecken voor v in desen huyse,

25

so wilt hooren vanden hemel, ende genadich sijn der sonden ws volcx Israel, ende dye weder in dat lant brengen, dat ghi hen, ende haren vaderen gegeuen hebt.

26

⁺Ist dat den hemel gesloten wert, ende dattet niet en regent, om datsi tegen v gesondicht hebben, ende bidden in dese plaetse, ende belijden uwen name, ende bekeeren hen van haren sonden, om dat ghijse verootmoedicht hebt,

+ E vers 26

27

so willet hooren inden hemel ende genadich sijn den sonden uwer knechten, ende ws volcx Israhel, dat ghy haer den goeden wech leert, daer si in wandelen sullen, ende laet reghenen op v lant, dat ghi uwen volc ghegeuen hebt te besitten.

28

Ist dat een dierte inden lande wert, oft pestilencie, oft dorricheyt, brant, sprinchanen, rupsenen, oft als zijn viant inden lande sine poorten beleget oft eenige plage, oft crancheit.

29

Wie dan biddet oft smeecket onder alderhande menschen, ⁺ ende onder allen uwen volc Israel, ist dat yemant sijn plage, ende sijn smerte geuoelet, ende sine handen wstrect, tot desen huyse,

+ F vers 29

30

So willet hooren vanden hemel, vanden setele uwer wooningen ende genadich sijn, ende elcken gheuen na alle sine wegen, na dien ghi sijn hert kent, want ghy alleene bekent dat herte der menschen kinderen,

31

op dat si vreesen, ende wandelen in uwen wege, alle dage, alsoo langhe als si leuen opten lande, dat ghi onsen vaderen gegeuen hebt

32

Ist dat ooc een vreemde, die van uwen volcke Israel niet en is, wt verren lande coemt, om ws grooten naems, ende machtiger hant, ende wtgerecten arms wille, ende biddet tot desen huyse,

33

So wilt vanden hemel hooren, vanden setele uwer wooninghen, ende doent al, daerom, dat hi v aenroepet, op dat alle volcken opter aerden uwen name bekennen, ende dy vreesen, ghelijc v volc Israel, ende seker werden, dat dit huys dat ic ghetimmert hebbe, na uwen name ghenoemt si.

34

Als v volc wt trect inden strijt tegen sine vianden, door den wech dien ghijse seynden sult, ende tot v bidden tegen den wech, tot deser stadt, die ghi vercoren hebt, ende totten huyse dat ic uwen name getimmert hebbe

35

so wilt haer gebet ende smeeken hooren, vanden hemel ende hen tot haren rechte helpen.

36

⁺Ist dat si tegen v sondigen (wanter geen mensche en is, die niet en sondicht) ende ghi op hen gram sijt, ende geeftse voor haer vianden, dat sise geuangen wech voeren, in een verre, oft na lant,

+ G vers 36

37

ende si hen in haerder herten bekeeren, inden lande daer si inne geuangen sijn ende bekeeren hen, ende smeecken v inden lande haerder geuangenissen, ende seggen,

38

wi hebben gesondicht, misdaen ende sijn ongodlijc geweest, ende hen also wt gheheelder herten, ende wt geheelder sielen tot v bekeeren, inden lande haerder geuangenissen, daermense geuangen hout, ende si bidden teghen den wech te haren lande, dat ghy haren vaderen gegeuen hebt, ende totter stadt, die ghy vercoren hebt, totten huyse, dat ic uwen name ghetimmert hebbe.

39

So wilt haer gebet ende smeecken vanden hemel hooren, vanden setel uwer wooningen, ende hen tot haren rechte helpen, ende uwen volcke genadich sijn dat tegen v ghesondicht heeft.

40

So laet nv mijn God v oogen open sijn, ende uwe ooren toe luysteren opt ghebet in deser plaetsen,

41

Dus maket v nv op HERE God tot uwer rusten, ghi ende die Arcke uwer macht. Laet uwe priesters HERE God, met heyl ghecleet worden, ende uwe heyligen hen verblijden, ouer den goeden HEERE God,

42

en keert niet af dat aensichte des ghesalfden, gedenct der ontfermherticheyt ws knechts Dauid.