Den Bybel met groter neersticheyt ghecorrigeert (Liesveltbijbel 1542)

¶ Roboam verlaet die wet des HEREN, die Coninck Egipti ouerualt hem, mer die HERE verlost hem.

Dat .xij. Capittel.

1

⁺DOen dat conincrijc Rehabeam beuesticht ende becrachticht wert, soo verliet hi dye wet des HEREN, ende gheheel Israel met hem,

+ A vers 1

2

Mer inden vijfsten iare des Conincx Rehabeam, trock op Sisak die Coninck te Egipten teghen Ierusalem (want si hadden hen besondicht aenden HERE)

3

met duysent ende twee hondert wagens, ende met tsestich duysent ruyteren, ende dat volc en was niet te tellen dat met hem quam wt Egipten, Libia, Suchim ende Moren,

4

ende hi wan die vaste steden die in Iuda waren, ende quamen tot Ierusalem.

5

Doen quam Semaia die propheet tot Rehabeam, ende totten ouersten Iuda, die hen tot Ierusalem vergadert hadden voor Sisak, ende sprack tot hen. ⁺ So spreect dye HERE, ghi hebt mi verlaten, daerom heb ic v oock verlaten in Sisaks hant.

+ B vers 5

6

Doen verootmoedichden hen die ouersten in Israel, metten coninc, ende spraken. Dye HERE is gherecht,

7

Mer als die HERE sach dat si hen verootmoedichden, so quam dat woort des HEREN tot Semaia ende sprack, Si hebben hen verootmoedicht, Daeromme en wil icse niet verderuen, Mer ic wil hen een weynich verlossinghen gheuen, dat mijne verbolgentheyt niet en druype op Ierusalem door Sisak,

8

Want si sullen hem onderdaen zijn, op dat si weten wat het is, mi te dienen, oft den conincrijcken inden landen te dienen.

[afbeelding]

9

Also troc Sisak die Coninc in Egipten op te Ierusalem, ende nam die schatten inden huyse des HEREN, ⁺ ende die schatten inden huyse des Conincx, ende namt al wech, ende nam ooc die gulden schilden die Salomo maken dede,

+ C vers 9

10

In welcker stede die Coninc Rehabeam me-

[p. *]

talen schilden liet maken, ende beualse den ouersten der artsiers, die aen der dueren des Conincks huys bewaerden,

11

Ende so dicwil die Coninc in des HEREN huys ghinc quamen die nusiers ende droeghense, ende brachtense weder in die nusiers camer.

12

Ende want hy hem verootmoedichde, so keerde haer die gramscap des HEREN van hem, also dat het niet al verdoruen en wert, Want in Iuda was noch wat goets.

13

⁺Also wert Rehabeam dye coninck becrachticht te Ierusalem ende regneerde .xxi. iaer was Rehabeam out doen hi coninc wert, ⁺ ende regneerde .xvij. iaer te Ierusalem in die stadt die die HERE vercoren hadde wt allen stammen Israel, dat hy sinen naem daer soude stellen, Sijn moeder hiet Nahema, een Ammonitinne,

+ D vers 13

+ ij.re. v a

14

ende hi dede quaet, ende en voechde sijn herte niet dat hi den HERE ghesocht hadde.

15

Die gheschiedenissen Rehabeam, beyde dye eerste ende die laetste, sijn ghescreuen in dye gheschiedenissen Semaia des propheten, ende Iddo des Schouwers, ende op gheteekent, Daer toe die oorlogen Rehabeam ende Ierobeam haer leuen lanc.

16

Ende Rehabeam ontsliep met sinen vaderen, ende wert begrauen in dye stadt Dauid, Ende sijn soon Abia wert coninck ghemaect in zijn stede.