Den Bybel met groter neersticheyt ghecorrigeert (Liesveltbijbel 1542)

¶ Iehu die propheet straft den Coninck Iosaphat om dat hy den Godlosen hulpe gedaen hadde, Iosaphat betert hem ende hi leuet wel.

Dat .xix. Capittel.

1

⁺MAer Iosaphat dye coninc Iuda quam weder thuys met vreden te Ierusalem,

+ A vers 1

2

Ende Iehu die sone Hanan die Siender ghinc wt hem te gemoete, ende sprac totten Coninck Iosaphat, Soudt ghi den ongodlijcken helpen, ende beminnen die den HERE haten? ende om dies wille is ouer v die gramscap vanden HERE,

3

Maer doch so is wat goets aen v gheuonden, dat ghi die Boschkens hebt wt gheuaecht wt den lande, ende hebt v herte ghestelt God te soecken.

4

Also bleef Iosaphat te Ierusalem.

Ende hi trock wederom wt onder dat volc, van Berseba aen tot opt gheberchte van Ephraim, ende brachtse weder totten HERE haerder vaderen God,

5

⁺Ende hi stelde rechters inden lande in allen vasten steden Iuda in elcke stadt sommige,

+ B vers 5

6

Ende sprac totten rechteren. Siet toe wat ghi doet, Want ghi en hout dat gerecht oft oordeel den menschen niet, maer den HERE, Ende hi is met v int gherechte,

7

Daeromme, laet die vreese des HEREN bi v zijn, ende wacht v ende doet, Want bi den HERE onsen God en is gheen onrecht, noch aensien der persoonen, noch aennemen der ghiften.

8

⁺Ooc stelde Iosapaht te Hierusalem wt den Leuiten ende priesteren, ende wtden ouersten vaderen onder Israel, ouer dat oordeel oft gherechte des HEREN, ende ouer die saken, ende lietse te Ierusalem woonen,

+ C vers 8

9

ende gheboot hen, seggende. Doet also inder vreesen des HEREN inden ghelooue, ende met rechter herten

10

in allen saken die tot v comen, van uwen broederen, die in hare steden woonen tusschen bloet ende bloet, tusschen wet ende gebodt, tusschen sede ende rechten, sult ghise onderwijsen, dat si hen niet en besondighen aenden HERE, ende een gramschap ouer v, ende uwe broeders en come, Doet hen also, so en suldy v niet besondighen.

11

⁺Siet Amaria die priester, is die ouerste onder v, in allen saken des HEREN, So is Sabadia dye sone Ismael, vorste inden huyse Iuda in allen saken des Conincx, Soo hebt ghi officiers, die Leuiten voor v, Sijt ghetroost, ende doet dat, ende die HERE sal metten goeden zijn.

+ D vers 11