Den Bybel met groter neersticheyt ghecorrigeert (Liesveltbijbel 1542)

¶ Iosaphat maect vrientschap met Achab, Hi helpt hem oorloghen, Ende daerom so wert hi vanden HERE ghestraft.

Dat .xviij. Capittel.

1

⁺ENde Iosaphat hadde grooten rijckdom ende eere ende maecte vrientscap met Ahab

+ A vers 1

2

Ende nae dese twee iaren trock hi af tot Ahab, te Samaria, Ende Ahab liet voor hem, ende voor dat volc dat bi hem was, vele scapen ende runderen slaen, Ende hy bracht hem met woorden daer toe, dat hi op trock te Ramoth in Gilead,

3

ende Ahab die coninc Israel sprac tot Iosaphat den coninc Iuda, trect met mi tot Ramoth in Gilead, hi sprack tot hem, Ic ben als ghi, ende mijn volc als v volc, wy willen met v inden strijt.

4

⁺Mer Iosaphat sprack totten coninck Israel, Lieue vraecht, heden des HEREN woort,

+ B vers 4

5

ende die Coninck Israel vergaderde die propheten, vier hondert mannen, ende sprac tot hen, Sullen wi te Ramoth in Gilead trecken inden strijt, oft sal ict goet laten sijn? Si spraken, Trect op, God salse in des conincx hant gheuen.

6

Mer Iosaphat seyde, en isser nyeuwers noch een prophete des HEREN dat wi van hem vraechden?

7

Die coninc Israel sprac tot Iosaphat, Daer is noch een man, datmen den HERE door hem vrage, mer ic ben gram op hem, want hi en propheteert mi geen goet, maer altijt quaet, te weten, Michaia die sone Iemla. Iosaphat sprac, die coninc en spreke so niet.

8

⁺Ende die coninc riep sijnder camerlingen een, ende seyde Brengt haestelic tot hier Michaia den sone Iemla,

+ C vers 8

9

ende die coninc Israel ende Iosaphat die coninc Iuda saten elcx op sinen stoel, met cleederen gecleet, Si saten op dye plaetse voor die duere aen die poorte Samarie, Ende alle die propheten propheteerden voor hen,

10

Ende Zedekia die sone Canaena maecte hem yseren hoornen, ende sprack, So spreect die HERE, Hier mede suldi die Siriers stooten, dat ghijse vernielt,

11

Ende alle die propheten pro-pheteerden ooc also, ende spraken, Trect op ende sijt gheluckich, die HERE salse in des conincx handen gheuen.

12

Ende die bode die gegaen was om Michaia te roepen sprac met hem ende seyde, Siet der propheten redenen sijn eendrachtelic goet voor den coninc, ⁺ Lieue laet v woort ooc sijn, als dier eene, ende spreect doch goet.

+ D vers 12

13

Michaia sprac, Also warachtelick als die HERE leeft, Wat mijn God seggen sal, dat wil ic spreken,

14

ende doen hi totten coninc quam, seyde die coninc tot hem, Michaia sullen wy te Ramoth in Gilead inden strijt trecken, oft sal ict laten staen? Hi sprac, Trect op ende latet v welgaen, Het sal v in uwen handen gegeuen werden,

15

Mer die coninck sprac tot hem, Ic besweere v noch eens dat ghi mi niet en segt dan die waerheyt inden name des HEREN

16

Doen sprac hi, Ic sach geheel Israel verstroyt op die bergen, gelijc die scapen die gheenen herder en hebben, ende die HERE sprac, En hebben dese gheenen heere? elc trecke weder thuys met vreden.

17

Doen sprac die coninc Israel tot Iosaphat, En seyde ickt v niet, hi en propheteert ouer mi geen goet, mer quaet.

18

⁺Hy sprack, Daeromme hoort des HEEREN woort Ic sach den HERE sitten op sinen stoele, ende allet hemelsche heyr stont tot sijnder rechter, ende tot sijnder slincker siden

+ E vers 18

19

Ende dye HERE sprack, Wye wil Ahab den coninc Israel wijs maken dat hi op trecke ende valle te Ramot in Gilead?

20

ende doen dese aldus, ende die ghene also seyde, so quammer een gheest voort, ⁺ ende tradt voor den HERE, ende sprac, Ic wilt hem wijs maken. Die HERE sprack tot hem, Waer mede?

+ ij.regum. xxij.

21

Hi seyde. Ick wil wtvaren, ende eenen valschen geest sijn in alle sijnder propheten mont. Ende hi sprac, ghy sullet hem wijs maken, ende ghi sullet bescicken, vaert derwaert ende doet also,

22

Nv siet, die HERE heeft eenen valschen gheest gegeuen in deser uwer propheten mont, ende dye HERE heeft quaet teghen v ghesproken.

23

Doen tradt daer toe Zidekia die sone Canaena, die sloech Michaia op sijn kinnebacken ende sprac Door welcken wech is die geest des HEREN van mi gegaen dat hi door v spreken soude?

24

⁺Michaia sprac, Siet, ghy sullet sien, als ghi in die binnenste camer coemt, dat ghy v sout versteken.

+ F vers 24

25

Die coninc Israel sprac, Neemt Michaia ende laet hem blijuen bi Amon der stadt voecht oft amptman, ende bi Ioas den sone Melech

26

ende segt, So seyt die coninck, Legt desen in dye gheuanckenisse, ende spijset hem met broode ende water der tribulacien, tot dat ic wedep come met vreden

27

Michaia sprac, Coemt ghi weder met vreden, so en heeft die HERE niet door my ghesproken, ende sprac, Hooret ghi volcken alle.

28

Also trock op die coninc Israel, ende Iosaphat dye coninc Iuda, tot Ramoth in Gilead,

29

ende die coninck Israel sprac tot Iosaphat. Vercleet v, ende coemt inden strijt, dat ghi uwe cleederen aen hebt, Ende die coninc Israel vercleede hem, ende quam inden strijt,

30

Mer dye coninc tot Sirien hadde sinen ouersten ruyteren gheboden, Ghi en sult niet strijden, noch tegen groot noch tegen cleyne, Mer teghen den Coninck Israel alleene.

31

Als nv dye ouerste ruyters der Siriers Iosaphat sagen, dachten si, het is die Coninc Israel, ende trocken rontomme om op hem te strijden, ⁺ Mer Iosaphat riep, ende die HERE halp hem, God keerdese van hem,

+ G vers 31

32

Want doen die ouerste ruyters saghen dat hy die Coninc Israel niet en was, keerden si hen van hem af,

33

Een man spande sinen boge strangelic, ende schoot den Coninc Israel tusschen zijn mage ende longhere, Doen sprac hi tot sinen voerman keert v hant, ende voert my wten heyr, want ic ben ghewont, Ende den strijt nam

[p. *]

toe in dien dage,

34

ende die Coninck Israel stont op sinen waghen teghen die Siriers tot sauonts toe, ende hi sterf doen die sonne onder ghinc.