Den Bybel met groter neersticheyt ghecorrigeert (Liesveltbijbel 1542)

¶ Vanden Conincrijcke Iosaphat.

Dat .xvij. Capittel

1

⁺ENde sijn sone Iosaphat wert Coninck in sijn stede, ende wert machtich tegen Israhel,

+ A vers 1

2

Ende hi leyde crijschuolc in allen vasten steden Iuda, ende sette officiers inden lande Iuda, ende inden steden Ephraim die sijn vader Assa ghewonnen hadde,

3

ende die HERE was met Iosaphat, Want hi wandelde inden voorgaenden wegen sijns vaders Dauid, ende en sochte Baalim niet,

4

maer den God sijns vaders, ende wandelde in sinen geboden, ende niet na den wercken Israel.

5

Daeromme beuestichde hem die HERE dat conincrijc, Ende gheheel Iuda gaf Iosaphat ghiften, ende hy hadde rijcdom ende eere in oueruloedicheyt.

6

Ende doen sijn herte vroom wert inden wegen des HEREN, dede hi die Hoochten ende Boschkens voor af wt Iuda.

7

⁺Inden derden iare sijns conincrijcx, sandt hy sine vorsten Benhail, Obadia, Sacharia, Nethaneel ende Michaia dat si leeren souden inden strijden Iuda,

+ B vers 7

8

ende met

[p. *]

hen dye Leuiten, Semaia, Nethania, Sebaia, Asael Simramoth, Ionathan, Adomia, Tobia, ende TobAdonia, ende met hen die priesters, Elisama ende Ioram,

9

Ende si leerden in Iuda, ende hadden dat wetboeck des HEREN met hen, ende trocken alom in allen steden Iuda, ende leerden dat volck.

10

Ende die vreese des HEREN quam ouer alle Conincrijcken inden landen die rontomme Iuda laghen, dat si niet en streden teghen Iosaphat,

11

Ende die Philisteen brochten Iosaphat ghiften, eenen last siluers, Ende die Arabiters brachten hem seuen duysent ende seuenhondert rammen, ende seuen duysent ende seuen hondert bocken,

12

Also nam Iosophat toe, ende wert altoos grooter, Ende hy timmerde in Iuda sloten ende corensteden,

13

ende hadde vele wercken in die steden Iuda, ende strijtbaer mannen, ende machtige lieden te Ierusalem.

14

⁺Ende dit was die ordinancie onder haerder vaders huys, dye in Iuda ouer dye duysent ouerste waren, Adna een ouerste ende met hem waren drie hondert duisent machtige lieden,

+ D vers 14

15

Naest hem was Iohannan die ouerste, ende met hem waren twee hondert ende tachtentich dusent,

16

na hem was Amasia dye sone Sichri die vrywillighe des HEREN, ende met hem waren twee hondert duysent machtige lieden,

17

Vanden kinderen BenIamin was Eliada een machtich man, ende met hem waren twee hondert duysent, die met bogen ende schilden gewapent waren,

18

na hem was Iosabad, ende met hem waren hondert ende tachtentich duysent gereet oft ghewapent totten heyr.

19

Dese namen alle des conincx waer, wtgenomen dat die coninc noch gheleyt hadde in vasten steden in gheheele Iuda.