Den Bybel met groter neersticheyt ghecorrigeert (Liesveltbijbel 1542)

¶ Van Ochosia, Hoe die Coninck met Achabs sone eens wert.

Dat .xxij. Capittel

1

⁺ENde die te Ierusalem maecten tot eenen coninc Ahasia, sinen ioncsten sone in sijn stede, Want die oorloochs lieden die wt den Arabiers metten heyr quamen, hadden dye eerste al ghedoot, Daerom wert coninck Ahasia dye sone Ioram des conincx Iuda,

+ A vers 1

2

Ahasia was .xlij. iaer out doen hi coninc wert, ende regneerde een iaer te Ierusalem, Sijn moeder hiet Athalia, die dochter Amri,

3

ende hi wandelde ooc inden wegen des huys Ahab, Want sijn moeder hielt hem daer toe, dat hi ongodlijc was,

4

Daerom dede hi dat den HEERE qualijc beuiel, gelijc dat huys Ahab, want si waren sine raetgheuers, nae sijns vaders doot, dat si hem verdoruen,

5

ende hi wandelde na haren raet.

Ende hi troc met Ioram den sone Ahab, den coninck Israel, inden strijt te Ramoth in Gilead, tegen Hasael den coninc tot Sirien,

6

⁺Mer die van Rama sloegen Ioram dat hi omkeerde, om hem te laten ghenesen te Iesreel, want hi hadde wonden, die hem gheslagen waren te Rama, doen hi street tegen Hasael den coninc te Sirien, Ende Ahasia die sone Ioram, dye coninc Iuda trock af, om te besien Ioram den sone Ahab te Iesreel, die cranc lach,

+ B vers 6

7

Want het was Ahasia van Gode toe geuoecht dat hi tot Ioram soude comen, ende also met Ioram wt trecken tegen Iehu den sone Nimsi, welcken die HERE ghesalft hadde, om wt te roeyen dat huys Ahab.

[p. *]

8

⁺Doen nv Iehu oordeel oeffende aenden huyse Ahab, vant hi sommighe ouerste wt Iuda, ende die kinderen der broeders Ahasia, die Ahasia dienden, ende hi doodese,

+ C vers 8

9

Ende hi socht Ahasia, ende hi creech hem, daer hy hem versteken hadde te Samaria, ende hy wert tot Iehu ghebracht, die doode hem, ende men begroef hem, Want si spraken, Hi is Iosaphats sone dye den HERE socht wt gheheelder herten, ende daer en was niemant meer wt den huyse Ahasia die coninc worde.

10

⁺Doen Athalia dye moeder Ahasia sach, dat haer soon doot was, so stont si op, ende verdede alle dat Coninclijcke saet inden huyse Iuda,

+ D vers 10

11

Maer Iosabeath des conincx suster, nam Ioas den sone Ahasia, ende stal hem onder die kinderen des conincx die gedoot werden, ende dede hem met sijnder voester in een slaepcamere, alsoo verberch si hem voor Athalia, Iosabeath de dochter des conincx Ioram, Ioiada des priesters wijf (Wandt si was Ahasia suster) dat hi niet ghedoot en wert,

12

Ende hi was met haer inden huyse Gods versteken ses iaer, ter wijlen dat Athalia coninghinne was inden lande.