Den Bybel met groter neersticheyt ghecorrigeert (Liesveltbijbel 1542)

¶ Ioiada maect Ioas Coninc, ende beueelt datmen Athalia dooden soude.

Dat .xxiij. Capittel

1

⁺INt seuenste iaer nam Ioiada eenen moet, ⁺ ende nam die ouerste ouer hondert, te weten Asaria den sone Ieroham, Ismael den sone Iohanam, Asaria den sone Obed, Maeseia den sone Adaia, ende Elisaphat den sone Sichri, met hem tot eenen verbonde,

+ A vers 1

+ iiij.Re. xi.a

2

die trocken alom in Iuda, ende brachten die Leuiten te hoope, wt allen den steden Iuda, ende die ouerste vaders in Israel, dat si te Ierusalem souden comen.

3

Ende die gheheel gemeynte maecte een verbont inden huyse Gods metten coninc, ende hi sprac tot hen, Siet des conincx sone sal coninc sijn, so die HEERE ghesproken heeft ouer die kinderen Dauid,

4

so suldy nv also doen.

⁺ Dat derden deel van v, die des sabbaths aengaen, sal sijn onder den priesteren ende Leuiten die poortiers zijn aen die dorpelen,

+ B vers 4

5

Ende dat derdedeel inden huyse des conincx ende dat derdendeel aen die fundament poorte, Mer allet volc sal sijn inden hof aenden huyse des HEREN,

6

Ende dat nyemant in dat huys des HEREN en gaet, dan die priesters ende Leuiten die daer dienen, die sullen daerinne gaen, want si sijn heylichdom, Ende allet volc neem waer der bewaringhen des HEREN,

7

Ende die Leuiten sullen hen ronts om den coninc maken, elc met sinen geweer in die hant. Ende wie int huys gaet, dien dodemen, ende si sullen byden coninc sijn als hi wt ende in gaet.

8

⁺Ende die Leuiten ende geheel Iuda, deden so dye priester Ioiada geboden hadde, ende elc nam sine lieden, dye des Sabbaths aengingen, metten ghenen die des Sabbaths afghingen, Want Ioiada die priester en liet dye twee hoopen niet van malcanderen comen,

+ C vers 8

9

Ende Ioiada die priester gaf den ouersten ouer hondert, spiesen ende scilden, ende die wapenen des conincx Dauid, die inden huyse Gods waren,

10

ende stelde dat volc, elc met sinen ghescut oft geweere in die hant, vanden rechten hoec des huys totten slincken hoec toe, totten outaer ende totten huyse waerts ronts om den coninc,

11

Ende si brachten des Conincx soon daer voor, ende setten hem die croone op, ende dat getuygenis, ende maecten hem coninc, Ende Ioiada, ende sine sonen, salfden hem

12

ende spraken, Geluc totten coninck.

Doen Athalia dat gecrijsch des volcx hoorde, dat toe liep ende den coninc loofde, ghinc si totten volc int huys des HEREN,

13

ende si sach, ende siet, dye Coninck stont op sine plaetse inden inganc, ende die ouersten, ende trompetten om den coninc, ende alle lantvolc was vrolijc ende blies trompetten, ende die sangers met alderley musijcspel geschict te louen, schoorde si haer cleederen, ende sprack, Oploop oploop,

14

Maer Ioiada die priestere maecte hem wt, metten ouersten ouer hondert die ouer die heyrmacht waren, ende seyde tot hen, Leytse wt, tusschen die mueren, ende wie haer na volcht dien salmen metten sweerde dooden, want die priester hadde beuolen, datmense niet inden huyse des HEREN dooden en soude,

15

ende si sloegen die handen aen haer, ende doen si quam totten inganc der peerden poorte, aenden huyse des conincx, dooden sise aldaer.

16

⁺Ende Ioiada maecte een verbont tusschen hem, ende alle den volcke, ende den coninc, dat si des HEREN volck sijn souden.

+ D vers 16

17

Doen ghinc allet volc int huys Baal, ende braken hem af, ende sine outaers, ende dye beelden braken si in stucken, ende dooden Mathan den priester Baal, voor dye outaren,

18

Ende Ioiada stelde die officiers inden huyse des HEREN, onder den priesteren ende den Leuiten, die Dauid gheoordineert hadde totten huyse des HEEREN, om den HERE brantoffer te doen, gelijc het gescreuen staet in die wet Mosi, met vruechden, ende liedekens door Dauid gedicht,

19

ende stelde duerwachters aen die poorte aenden huyse des HEREN, datter nyet onreyns in en soude comen, aen eenich dinck.

20

Ende hi nam die ouerste ouer hondert, ende die machtige, ende die heeren inden volcke, ende allet lantvolc, ende leyde den coninc af vanden huyse des HEREN, ende brachten hem door die hooge poorte, aenden huyse des conincx, ende deden den coninc op den coninclijcken stoel sitten,

21

Ende alle tlantvolc was vrolick, ende dye stadt was stille, Mer Athalia wert metten sweerde ghedoodet.