Den Bybel met groter neersticheyt ghecorrigeert (Liesveltbijbel 1542)

¶ Vanden God vreesenden Coninck Ezechia, hoe hi gheregneert ende wat hi ghedaen heeft.

Dat .xxix. Capittel.

1

⁺IEhiskia was .xxv. iaer out doen hi Coninc wert, ende regneerde .xxix. iaer te Ierusalem, sijn moeder hiet Abia, een dochter Zacharia, Ende hi dede dat den HERE wel beuiel, als sine vader Dauid,

+ A vers 1

2

Hi dede die dueren aenden huyse des HEREN open inder eerster maent, des eersten iaers sijns conincrijcx, ende hi maectese vast,

3

ende bracht die priesters ende dye Leuiten daer in, ende vergaderde opter breeder straten oostwaert, ende sprac tot hen.

4

⁺Hoort toe na mi ghi Leuiten, heylicht v nv, dat ghi dat huys des HEREN uwer vaderen Gods heylighet, Ende doet daer wt die onreynicheyt wt den heylichdom,

+ B vers 4

5

Want onse vaderen hebben hen ontgaen, ende gedaen dat den HERE onsen God qualijcken beuiel, ende hebben hen verlaten,

6

Want si hebben haer aensicht vander wooninghen des HEREN gekeert, ende den rugghe toe ghekeert,

7

ende hebben die dueren aenden poortale toe ghesloten, die lampen wt ghebluscht, ende gheen roocwerck gherooct, ende gheen brantoffer ghedaen inden heylichdom den Gode Israel.

8

⁺Daer wt is die gramscap des HEREN ouer Iuda ende Ierusalem gecomen, ende heeftse ghegeuen in verstroeyinge ende verwoestinghe, datmense aenpijpt, so ghy met uwen oogen siet,

+ C vers 8

9

Want siet om des selfs wille, sijn onse vaders geuallen, doort sweert, onse sonen ende dochteren, ende wijuen zijn wech geleyt.

10

Nv heb ic inden sin een verbont te maken metten HERE den God Israel, dat sine gramscap ende verbolgent-

[p. *]

heit haer van ons keere,

11

Nv mijne sonen, en sijt niet onachtsaem, want die HERE heeft v vercoren dat ghi voor hem staen sout, ende dat ghy sine dienaers ende roockers zijn soudt.

12

Doen stonden die Leuiten op, Mahat, dye sone Amasai, ende Ioel die sone Asaria, wt den kinderen der Kahathithen, Wt den kinderen Merari, Kis die sone Abdi, ⁺ ende Azaria dye sone Iehaleleel, wt den kinderen der Gersoniten, ⁺ Ioah, die sone Simma, ende Eden die sone Ioah,

+ D vers 12

+ Die propheten Amos, Ionas, Naamin Obeth waren in deser tijt.

13

ende wt den kinderen Elizaphan, Simri, ende Ieiel ende wt den kinderen Assaph, Zacharia, ende Mathania,

14

ende wt den kinderen Heman, Ieiel, ende Simei, ende wt den kinderen Iedethun, Semaea, ende Vsiel,

15

ende si vergaderden haer broeders, ende heylichden hen, ende ghinghen in, nae des conincx ghebode wt den woorden des HEREN, om te reynighen dat huys des HEREN.

16

Dye priesters ghingen binnen int huys des HEEREN om te reynigen, ende deden wt alle onreynicheit, die inden tempel des HEREN gheuonden werdt, op den hof aent huys des HEREN, ende die Leuiten namense op, ende droeghense in die beke Kidron,

17

Sy begonsten hen te heylighen inden eersten dach, der eerster maent, ende opten achsten dach der maent, ghingen si in dat poortael des HEREN, ende si heylichden dat huys des HEREN acht dagen, ende voleynden inden sesthienden dach der eerster maent.

18

Ende si ghingen in totten coninc Hiskia, ende spraken, wi hebben dat geheele huys des HEREN ghereyniget, ⁺ ende den brantoffer outaer, ende alle sijn ghereetscap, ende die tafel der thoonbrooden, ende alle haer gereetscap

+ E vers 18

19

ende alle vaten die die coninc Ahas doen hy coninc was wech geworpen hadde, doen hy hem ontginc, die hebben wi bereyt ende gheheylicht. Siet, si sijn voor den outaer des HEREN.

20

Doen stont die coninc Hiskia vroech op, ende vergaderde die ouerste der stadt, ende ghinc op, totten huyse des HEREN,

21

ende brachten derwaerts seuen varren, seuen rammen, seuen lammeren, ende seuen gheytbocken, tot eenen sondoffer, voor dat coninckrijck, voor dat Heylichdom, ende voor Iuda, Ende hy sprac totten priesteren der kinderen Aaron, dat si offeren souden opten outaer der HEREN.

22

Doen sloegen si die runderen, ende die priesters namen dat bloet, ende sprengdent op den outaer, Ende si sloegen dye rammen, ende si besprengden dat bloet opten outaer,

23

Ende sloegen die lammeren ende si besprengden dat bloet, opten outaer, ende si brachten die bocken totten sondoffer voor den coninc, ende voor die gemeynte, ende leyden haer handen op die,

24

ende die priesters sloegense, ende ontsondichden haer bloet opten outaer, om gheheel Israel te versoenen, Want die coninc hadde beuolen, brantoffer ende sondoffer voor geheel Israel te gheschiedene.

25

Ende hi stelde Leuiten int huys des HEREN, met cymbalen, psalteren, ende herpen, soo het Dauid beuolen hadde ende Gad die Siender des conincx, ⁺ ende dye Propheet Nathan, Want het was des HEREN ghebot, door sine propheten.

+ F vers 25

26

Ende dye Leuiten stonden metten musijcspelen Dauids, ende dye priesters metten trompetten,

27

ende Hiskia hiet hen brantoffer doen opten outaer, ende op dye tijt, doenmen dat brantoffer begonste, so begonste ooc den sanc des HEREN, ende die trompetten, ende oock menigerhande musijcspelen Dauids des conincx Israel,

28

ende die geheele ghemeynte aenbadt, ende den sanc der sangers, ende dat trompetten der trompetters, duerde tot allet brantoffer volbracht was.

29

Als nv dat brandtoffer volbracht was, buychde hem die coninc, ende alle die hem voor handen waren, ende aen-baden,

30

ende die coninc Hiskia metten ouersten hiet die Leuiten den HERE louen met den gedichten Dauids ende Assaph des sienders, Ende si loofden tot dat si vrolijc werden, ⁺ ende neychden hen, ende aenbaden.

+ G vers 30

31

Ende Hiskia antwoorde ende sprac, Nv hebt ghi uwe handen gheuult den HEERE, gaet toe ende brenget herwaerts die offerhanden, ende drancoffers totten huyse des HEREN, ende dye ghemeynte bracht daer toe offeren ende drancoffer, ende elc met vrywilligher herten brandtofferen,

32

Ende dat ghetal der brandtofferen, dye dye ghemeynte daer toe bracht, was .lxx. runderen, hondert rammen, ende twee hondert lammeren, ende dat alle tot brantoffer den HERE,

33

Ende si heylichden ses hondert runderen, ende drie duysent schapen.

34

Mer der priesters was te luttel, ende en consten dye brantofferen die huyt niet al af getrecken, Daerom namen si haer broeders die Leuiten, tot dat dat werc volbracht wert, ende tot dat hen dye priesters heylichden, Want die Leuiten sijn lichter te heyligen dan die priesters

35

Doe was des brantoffers vele, metten vette des dootoffers, ende drancoffers totten brantofferen. Also spoeyde dat ambacht aenden huyse des HEREN,

36

Ende Hiskia verblijde hem met alle den volcke, datmen met Gode bereyt was geworden, Want het gheschiede onuersiens.