Den Bybel met groter neersticheyt ghecorrigeert (Liesveltbijbel 1542)

Iosias hout dat feeste van Paesschen, Hy ordineert priesters ende Leuiten, die welcke onderwijsen connen tvolck inder wedt des HEREN te wandelen. Ende als hy teghen den coninck Egypti trect, so sterft hi ghewont sijnde

Dat .xxxv. Capittel.

1

⁺ENde Iosia hielt den HERE Passah te Ierusalem, ⁺ ende sloech dat Passah inden veerthiensten dach der eerster maent,

+ A vers 1

+ Sophonias die prophete leefde in deser tijt.

2

Ende hi stelde die priesters in hare hoede ende sterctese tot haren officie inden huyse des HEEREN,

3

ende sprack totten Leuiten, dye in gheheele Israel leerden, ende den HERE geheylicht waren. Doet die heylighe Arcke int huys dat Salomo die sone Dauids des Conincx Israel getimmert heeft, Ghi en sultse niet op die scouderen dragen. Dus dient nv den HERE uwen God, ende sinen volc Israhel,

4

ende schict dat huys uwer vaderen in sijn ordine, so si bescreuen is van Dauiden den Coninc Israel, ende sinen sone Salomo,

5

ende staet int Heylichdom, na die oordinancie der vaders huysen onder uwen broederen. Ooc die ordinancie der vaders huysen onder den Leuiten,

6

ende slaet dat Passah, ende schict uwe broeders, dat si doen na den woorden des HEREN door Mose.

7

Ende Iosia gaf totter Heffe voor den gemeynen man lammeren, ⁺ ende ionge geyten al totten Passaph voor alle die voor handen waren, int getal dertich duysent ende drie dusent runderen, alle vanden goede des conincx.

+ Die oude Tobias storf in deser tijt

8

⁺Sine vorsten ghauen totter heffe, vrywillich voor dat volc, ende voor die priesters ende Leuiten, te weten Hilkia, Zacharia ende Iehiel die princen inden huyse Gods, onder die priesteren, totten Passaph, twee duysent, ende ses hondert, daer toe drie hondert runderen,

+ B vers 8

9

Maer Hanania, Semaia, Nethaneel, ende sine broeders, Hasabia, Ieiel ende Iosabad, der Leuiten ouersten gauen totten Heffe den Leuiten totten Passah vijf duysent ende daer toe vijf hondert runderen.

10

Also werdt den dienst Gods beschict, ende die priesters stonden in hare plaetse, ende die Leuiten in hare ordine na dat ghebot des Conincx,

11

Ende si sloeghen dat Passaph, ende dye priesters nament van haren handen ende besprengdent, ende die Leuiten trocken hen dye huyt af,

12

ende deden dye brantofferen daer af, dat sijt souden gheuen onder die deelen haerder huysen, in haren gemeynen hoope, den HERE te offeren, gelijc het ghe-

[p. *]

screuen staet inden boecke Mose,

13

Also deden si metten runderen ooc. Ende si brieden dat Passah aent vier also het behoort, Mer dat gheheylicht was koocten si in potten, ketelen, ende pannen, ende si maecten haestelic voor den ghemeynen hoope. ⁺

+ Iheremias de prophete propheteerde doen hy noch ionc was tegen Ierusalem ende den tempele inden .xiij iare des Coninckrijcx Iosie, Hy propheteerde xlij. iaer in Iuda sonder dat hi gepropheteert heuet in Egypten.

14

Mer daer na bereyden si ooc voor hen seluen, ende voor die priesters, want die priesters, die kinderen Aaron waren onledich aen dat brantoffer ende vette tot inder nacht. Daerom moesten dye Leuiten voor hen seluen, ende voor die priesters die kinderen Aaron bereyden.

15

Ende die sangers die kinderen Assaph, stonden in hare plaetse na den gebode Dauid, ende Assaph ende Heman ende Iedithun des Beschouwers des Conincx ende die poortiers aen allen poorten, Ende si en weken niet van haren officie, Want die Leuiten hare broeders bereyden voor hen.

16

Alsoo wert beschict alle Gods dienste des HEREN, in dien daghe datmen Passah hielt, ende brantoffer dede opten outaer des HEREN, nae den ghebode des conincx Iosia.

17

Also hielden die kinderen Israel, die voor handen waren Passah in die tijt, ende dat feeste der ongesuerder brooden seuen dagen,

18

daer en was gheen Passah in Israhel gehouden gelijc dat, vander tijt Samuels des propheten aen, ende geen coninc in Israel en had sulcken Passah gehouden als Iosia Passah hielt, ende die Priesters, Leuiten ende geheel Iuda, ende wat van Israel voor handen was, ende die inwoonders te Ierusalem,

19

inden .xviij sten iaer des conincrijcx Iosia wert die Passah gehouden

20

⁺Na desen doen Iosia dat huys gereket hadde, ⁺ troc Neco die coninck van Egypten op, om te strijden tegen Charchemis, aen Phrath, ⁺ Ende Iosia trock wt hem teghen,

+ D vers 20

+ iiij.Reg. xxxiij.

+ Vrias dye prophete wert van desen Ioram ghedoot, ende Iheremias die prophete werdt inden kercker gheworpen. Aripus die vierde coninc van romen maeckte eerst een brugghe ouer den Tiber, tusschen den berch Auerternam, ende Ianiculum Hy stichte oock die stadt Hostia xvi. mijlen van Roomen op den zee cant, als dye wereldt ghestaen had .iiij.m. ende .vi c. iaer voor cristus gheboorte vi.c. iaer

21

Mer hi seynde boden tot hem, ende dede hem segghen. Wat heb ic met v te doen coninc Iuda, Ic en come nv niet tegen v, mer ic strijde teghen een huys, ende God heeft geseyt dat ic soude haesten, Hout op van God die met v is, op dat ic v niet en verderue.

22

Mer Iosia en keerde sijn aensicht niet van hem, maer hi stelde hem om tegen hem te strijden, ende en was niet niet ghenoech den woorden Necho wt den monde Gods, ende quam om teghen hem te strijden, op die pleyne of effen bi Magiddo,

23

Mer die schutters schoten den Coninck Iosia, ende die coninc sprac tot sinen knechten. Voert my herwaerts ouer, want ic ben seer gewont,

24

ende zijn knechten deden hem van dien wagen, ende voerden hem op sinen anderen waghen, ende brachten hem te Ierusalem, ende hi sterf, ende hi wert begrauen onder den grauen sijns vaders.

Ende geheel Ierusalem ende Iuda droeghen rouwe om Iosia,

25

ende Ieremia claechde Iosia, ende alle sangers ende sangerssen spraken haer claechliedeken ouer Iosia tot op desen dach, ende si maecten een ghewoonte daer wt in Israel. Siet, het is ghescreuen onder den claechliedekens.

26

Wat meer van Iosia te seggen is, ende sine ontfermherticheyt. na die schrift in dye wet des HEREN,

27

ende sine geschiedenisse, beyde die eerste ende die leste, siet, dat is ghescreuen in dat boeck der coninghen Israel ende Iuda.