Den Bybel met groter neersticheyt ghecorrigeert (Liesveltbijbel 1542)

¶ Het wert Esdra te kennen ghegheuen, dattet volc Gods hem met den heydenschen wijuen ghemengt ende veronreynicht hadde, waeromme dat hi droeuich is, ende dat Gode claghet.

Dat .ix. Capittel.

1

⁺INden vierentwintichsten dage deser maent quamen die kinderen Israel te samen, met vasten, ende sacken, ende aerde op hen,

+ A vers 1

2

ende schieden dat zaet Israel van alle vreemden kinderen, ende traden henen, ende bekenden haer sonden, ende haerder vaders misdaet,

3

ende stonden op haer plaetse, ende men las int wetboec des HEREN haers Gods viermael sdaechs, Ende si bekenden, ende aenbaden den HEERE haren God viermael des daechs.

4

Ende die Leuiten stonden op in die hoochte, te weten Iesua, Bani, Kadmiel, Sebania, Buni, Serebia, Bani, ende Chenani, ende si riepen luyde totten HERE, haren God,

5

Ende die Leuiten Iesua, Kadmiel, Bani, Hasabenia, Serebenia, Hodia, Sebania Pethahia spraken, Staet op looft den HERE uwen God, van eewicheyt tot eewicheyt, ende men loue den name uwer heerlicheyt, dye verhooghet is met alle seegheninge, ende loue.

6

HERE ghy sijt het alleene, ghy hebt den hemel ghemaect, ende alder hemelen hemele, met alle haren heyr, ⁺ die aerde ende al wat daer op is, die zee ende al watter inne is, ghy maket al leuende, ende dat hemelsche heyr aenbidt v,

+ B vers 6

7

Ghi sijt die HERE God, ghy dye Abram vercoren hebt, ende hem van Vr in Caldea wtgheleyt, ende Abraham genoemt,

8

ende sijn herte ghetrou voor v gheuonden, ende een verbont met hem ghemaect, sinen zade te gheuen dat lant der Cananiten, Hethiten, Amoriten, Pheresiten, Iebusiten, ende Girgositen, ende hebt v woort gehouden, want ghi sijt gherecht.

9

Ende hebt aengesien die allendicheyt onser vaderen in Egypten, ende haer roepen verhoort aen die roode zee,

10

ende teekenen ende woonderlicheden gedaen aen Pharao, ende alle sine knechten, ende aen allet volc sijns lants, Want ghi bekendet dat si stout tegen hem waren, ende hebt hen eenen name gemaect so het heden toe gaet,

11

Ende hebt die zee voor hen ghedeelt, dat si midden in dye zee drooch daer door ghingen, ende hare veruolghers geworpen in die diepte ghelijc steenen in machtighen wateren,

12

ende hebtse sdaechs in eender wolckcalomne gheleyt, ende tnachts in een viercalomne, om hen te lichtene, op den wech welcken si trocken.

13

⁺Ende zijt neder ghedaelt opten berch Sina, ende hebt met hen vanden hemel ghesproken, ende gegeuen oprechte rechten, ghetrouwe wetten, goede gheboden ende zeden,

+ C vers 13

14

ende uwen heyligen Sabbath condich gemaect, ende geboden zeden, ende wetten, hen geboden door uwen knecht Mose,

15

Ende hen broot vanden hemel gegeuen, doen hen hongerde, ende water wt den steenen laten gaen, doen hen doorstede, ende hen ghesproken dat si in souden gaen, ende dat lant in nemen, daer ghi uwe hant ouer hieft, hen te gheuene.

16

Mer onse vaders worden stout ende herdtneckich, dat si uwe gheboden niet en hoorden, ende weygerden hen te hooren, ende en ghedachten uwe wonderlicheden ooc niet die ghi aen hen deet,

17

Mer si worden hertneckich, ende worpen een hooft op, dat si hen souden keeren tot haren dienste, in hare ongehoorsaemheyt, Mer ghi mijn God vergauet ende wert genadich, ontfermhertich, verduldich ende van groter ontfermherticheit, ende en verlietse niet,

18

Ende hoe wel si een gegoten kalf maecten, ende spraken, dat is v God, die v wt den lande Egipti geleyt heeft, ende deden grote blasphemie,

19

noch en verliet ghise nyet inder woestijnen, na uwer grooter ontfermherticheit, ende die wolckcalomue en weke niet van hen des daechs hen te leyden op den wech, noch die viercalomne des nachts, hen te lichten op den wech dien si trocken.

20

⁺Ende ghi gaeft hen uwen goeden gheest, hen te onderwijsen, ende v Manna en keerde ghi niet van haren monde, ende gaeft hen water doen hen dorstede,

+ D vers 20

21

Veertich iaren besorchde ghijse inder woestijnen, dat hen niet en gebrac, haer cleederen en verouden niet, ende haer voeten en bleynden niet,

22

Ende gaeft hen conincrijcken ende volcken, ende dreeftse in dye hoecken, dat si in namen dat lant Gihon, des conincx te Hesbon, ende dat lant Og, des

[p. *]

conincx te Basan,

23

ende vermenichfuldichde hare kinderen als die sterren aenden hemel, ende brochtse int lant dat ghy haren vaderen gesproken hadt, dat si in trecken ende in nemen souden.

24

Ende die kinderen trocken daer in, ende namen dat lant inne. Ende ghi verootmoedigeste voor hen die inwoonders des lants, die Cananiten, ende gaeftse in hare handen, ende haer coningen ende volcken inden lande, dat si met hen na haren wille souden doen.

25

⁺Ende si wonnen vaste steden, ende een vette lant, ende namen huysen in vol alderhande goeden, wtgehouwen putten, wijnbergen, olijfgaerden ende boomen daermen af etet oueruloedelic, ende aten ende worden sat ende vette, ende leefden in wellusten, door v grote goetheit.

+ E vers 25

26

Mer si werden onghehoorsaem, ende wederstonden v ende verworpen uwe wet achter hen te ruggen, ende verworchden v propheten, die hen getuychden, dat si hen tot v souden keeren, ende deden grote blasphemie, daer om ghaeft ghise in die handt haerder vyanden, diese benauden,

27

Ende inder tijt haerder benautheyt, riepen si tot v, ende ghi verhoordese vanden hemel, ende door uwe groote ontfermherticheydt gaeft ghi hen salichmakers, diese wt haerder vianden hant holpen.

28

⁺Mer als si tot rusten quamen, verkeerden si hem om quaet te doene voor v, so verliet ghijse in haerder vyanden hant, dat si daer ouer heerschten So bekeerden si hen dan, ende riepen tot v, ende ghi verhoordese vanden hemele, ende verlostese na uwer grooter ontfermherticheyt menichwerf,

+ F vers 28

29

ende liet hen getuygen, dat si haer bekeeren souden tot uwer wedt, mer si waren stout, ende en hoorden uwe gheboden nyet, ende sondichden aen v rechten. Die welcke, ist datse een mensce doet, daer inne leeft, ende si keerden haer schouderen wech, ende worden hartneckich, ende en hoorden nyet,

30

ende ghi vertroct vele iaren ouer hen, ende liet hen getuygen door uwen geest in uwen propheten, mer si en namens niet ter ooren,

31

daerom hebt ghise gegeuen in die hant der volcken inden landen, mer na uwer groter ontfermherticheit en hebt ghi niet geheelic met hen wt gemaect, noch haer verlaten. Want ghi zijt een genadich ende ontfermhertich God.

32

Nv onse God, ghi grote God, machtich ende veruaerlic, ghi die dat verbont hout ende ontfermherticheit hout, ende en achtet niet cleyne die moeite die ons beuaen heeft, ende onse coninghen princen, priesteren, ⁺ propheten, vaders, ende uwe geheele volc, vander tijt der Coningen tot Assur aen, tot op desen dach.

+ G vers 32

33

Ghy zijt gerecht in al dat ghi ons gedaen hebt. Want ghi hebt recht gedaen. Maer wi zijn ongodlic geweest,

34

ende onse coningen, princen, priesteren, ende vaders, en hebben niet gedaen nae uwe wet, ende geen achte ghehadt op uwe geboden ende getuygenissen, die ghi hem hebt laten ghetuygen,

35

si en hebben v nyet gedient in haren conincrijcke, ende in uwen groten goeden die ghi hen gaeft, ende inden breeden ende vetten lande, dat ghi hen ouergeleuert hadt in haren aensiene, ende en hebben hen nyet bekeert van haren quaden wesene.

36

Siet wi sijn heden ten dage knechten, ende inden lande, dat ghi onsen

vaderen gegeuen hebt te etene sine vruchten ende goeden, siet daer sijn wi knechten inne.

37

Ende sine incomen vermeerdert hem den coninghen dye ghy ouer ons geset hebt, om onser sonden wille, ende si heerscappen ouer onse lichamen, ende vee, na haren wille, ende wi zijn in grooter noot.

38

Ende in allen desen maken wy een vaste verbont, ende scriuent, ende latent onsen princen priesteren ende Leuiten besegelen.